पिलिपिया
पिलिपिया विस्वासुल्कुंक पौलुसना सिट्‍टि
इद सिट्‍टिता बारेमते गिचचो परिचयम
रासतोना पोरोल: पौलुस
रासता कालम: इसवि सन 60
पौलुस इद सिट्‍टितुन जेलने मत्‍तास्‍के पिलिपिया कलिसियातोर्क रासतोर. जेलनाल पेय्सि बेसता कबुर वेहना कबळतुन मर्रा सुरुव कियना इंचि ओना आसे. इंका पौलुस इल्‍हा रासतोर गदा, “येसु किरिस्‍तु बोगांचतसोंटा तकलिपकु आनि इंदके नना बोगांचनसोंटा तकलिपकु, येसु किरिस्‍तुनपोर्रो विस्वासम इरताहाटीं मीकगुडा वायावच्‍चु. असोंटस्‍के किरिस्‍तुनपोर्रो विस्वासम इरताहाटीं दोर्कता तकलिप्‍कुन पेनदा आसिर्वाद इनकुंटु,” इंचि रासतोर.
पौलुस इद सिट्‍टि रासता इंकुंदि कारनम बतल इत्‍ते, पिलिपियाते, “मूसाना नियमकु वेहताप ताकट, हिलाकोंटे मीकु मुक्‍ति दोर्को,” इंचि तप्‍पुड बोदां कराहनोर मत्‍तुर. ओरा कराहमळ पौलुसुंक इस्‍टम हिलाका, “नय्‍कुनलेह्का मुच्‍हनोरगटाल हुसारते मंटु,” इंचि वेहालय पौलुस इद सिट्‍टि रासतोर. अचोने आयका कस्‍टाल्‍क, दुक्‍काल्क वायिनागानि किरिस्‍तु हुपिस्‍ता हरदेने अंटोर विस्वासुल्‍क कलियसि कुसिते ताकना इंचिगुडा पौलुस रासतोर.
बगा बतल मंता
जोहार आनि परिचयम 1:1-11
पौलुसना सतता परिस्‍तितिं 1:12-26
किरिस्‍तुनतोनि पिस्सना पिस्वर 1:27–2:18
तिमोति आनि इपपरदिसुनाहाटीं पिलानकु 2:19-30
पगातोरगटाल जेगर्ता मनना बारेमते 3:1–4:9
पौलुस आनि पिलिपियाता ओना दंटागाह्‍क 4:10-20
आकिरता बोदां 4:21-23
1
पिलिपिया कलिसियातोर्क पौलुसना जोहार
पिलिपिया सहरते येसु किरिस्‍तुना लोप्पो मनना पेनदा अंटोर पवित्र लोकुल्‍कुंक, पेद्‍दाल्कुंक आनि अदिकारिल्कुनाहाटीं नना पौलुस, नावा दंटातोर तिमोति, मोमोट येसु किरिस्‍तुना सेवाकुल्‍कुम इद सिट्‍टि रासेक मंतोम.
मना पेनबाबानाहेंदाल, मना सामि येसु किरिस्‍तुनहेंदाल मीकु कुर्पा, सांति दोर्कि.
पौलुसना पारतना
मीकुन नना बस्के-बस्के अय्ते मति कींतन, अस्‍के-अस्‍के पेनदुक दन्यवाद कींतन. 4-5 बेसता कबुर केंजसि विस्वासम कीता रोजुनाल अय्ते इदवेरदाकागुडा बेसता कबुरतुन वेहना नावा कबळते मिमेट नाकु तोळ मंतिर. अदुनहाटीं नना बस्के-बस्के अय्ते पारतना कींतन अस्‍के-अस्‍के वेल्‍लेन कुसिते मीवाहाटीं पारतना कींतन. मीवा नड्‍डुम इच्‍चोन बेसता कबळतुन पेने सुरुव कीता. इद कबळ पुरागा आयनदाका, इत्‍ते येसु किरिस्‍तु मर्रा तिरियसि वायना रोजुनदाका पेने इद कबाटुन ताकिच्‍चेक इर्रंता इंचि नाकु पुरागा बरोसा मंता.
नना मीवा बारेमते इल्‍हा विचारम कियमळ बेसे आंद. बारित्‍ते, नना जेलने मत्‍तस्के आयि, बेसता कबुर वेहचि अव्टे मत्‍ता निजमतुन हुपिच्‍चि कापाळसेके तिरियतस्के आयि, इव अन्‍निटवुने पेनदाहेंदाल कुर्पा दोर्कता, अवुने नावातोनि मिमेटगुडा तोळ मंतिर. अदुनहाटीं मिमेट इत्‍ते नाकु वेल्‍लेन पावरम! किरिस्‍तु येसुनलेसीं ननागुडा मीकुन पावरम कींतन, इंचि नावा जीवा मीकुन हूळानाहाटीं बस्‍केळ्‍क तनलाळंता. दीनकु कुद्‍दु पेने गवाइ मंता.
मीवा पावरम बेस बेरस्सेक मनना, पेनदाहेंदाल मीकु बुद्‍दि, मंचि-सेड्‍डातुन एरपाट कियना तेल्वि बेरसना इंचि नना बस्‍केळ्‍क पेनदुक पारतना कीसेक मनंतन. 10 दीनहेंदाल मिमेट मंचि-सेड्‍डातुन एरपाट कीसि बेस पिस्वर पिसकिट. अस्‍के किरिस्‍तु वातस्के मिमेट अंटोरगुडा ओना मुन्‍ने नीतिमंतुल्क आनि दोसेम हिलवोर आसि निलकिट. 11 मीवा पिस्वरते येसु किरिस्‍तु मत्‍ताहाटीं, मिमेट बस्‍केळ्‍क नीति कबाह्के कीसेक मंदना. दीनहेंदाल पेनदा पोरोल, कदर वेल्‍लेन बेरस्सेक दांता.
बेसता कबुर बेर्सताहाटीं पौलुसना कुसि
12 नावा विस्वासुल्‍कुनिटा! मिमेट उंदि पोल्‍ले अर्तम कीकुंटु, नावा पिस्वरते जर्गता अन्‍नि गटनां किरिस्‍तुना बारेमता बेसता कबुर बेरसालये सहायम आतां. 13 इल्‍हा जर्गताहेंकेन, किरिस्‍तुनाहाटींगे नाकुन जेलने वाटतुर इंचि राजवाडाते कावेल कियना अंटोर सिपाइल्कुंक आनि अगा मत्‍ता अंटोर लोकुल्‍कुंक तेळियसोत्‍ता. 14 इचोने आयका, नना जेलने मत्‍ताहेंका सामिनाहाटीं वेल्‍लेन मंदि विस्वासुल्कुंक दैरनेम दोर्कता. ओर बोर्के वेरियाकोंटा वेल्‍लेन दैरनेमते किरिस्‍तुना बारेमता पोल्‍लेतुन वेहालय तयार आतुर.
15 अव्टेटाल इच्‍चुर कळ्‍क पोत्‍सि, नावा पोर्रोटा पगा तीरिचकुनालय किरिस्‍तुना बारेमते वेहचंतुर, इंका इच्‍चुर बारे बेस उद्‍देसमते वेहचंतुर. 16 बेस उद्‍देसमते वेहानोर, नावा पोर्रोटा पावरमहेंका अल्हा कींतुर. बारित्‍ते येसु किरिस्‍तुना बारेमता बेसता कबुर सत्‍तेम आंद इंचि हुप्‍सालये नना इगे मंतन इंचि ओर्क एरपाट मंता. 17 गानि नापोर्रो कळ्‍क पोत्‍सि, किरिस्‍तुना बारेमता पोल्‍लेतुन वेहना लोकुल्‍क मात्रम नना जेलने मननेंके नाकु इरगा तकलिप आयागोम इंचि, ओरा सतता पाय्दाहाटीं अल्हा कीसंतुर. 18 अयना बतल आयो. बेस उद्‍देसमते आयि, कराब उद्‍देसमते आयि, अद बल्हे आयि! किरिस्‍तुना बारेमतेन वेहमळ जर्गसंता इंचि नाकु वेल्‍लेन कुसि आसंता. आनि नना इल्हेन कुसिते मनंतन. 19 बारित्‍ते मीवा पारतनां अल्हेन येसु किरिस्‍तुना आत्माता सहायमतोनि नाकु वायना ई कस्‍टाल्के नाकुन तप्‍पाकोंटा पलाते पेच्‍हंतां इंचि नाकु एरपाट मंता. 20 नाकु बसोंटा परिस्तिति वायिना सिग्गु अर्रोन, नना इदवेरादाका दैरनेमते किरिस्‍तुना सेवा कीतन, अल्‍हेने इंदकेगुडा कीसेक मंतन. नना हायिना-पिस्सिना नावा पिस्वरताहेंदाल किरिस्‍तुना पोरोल्तुन अंटोर कदर कियगोम इंचि नना वेल्‍लेन आसेते एदुर हूळसेक मंतन. 21 बारित्‍ते नना पिस्‍संतन इत्‍ते किरिस्‍तुनाहाटींगे. नना हायिनागानि किरिस्‍तुनगेन दांतन इंचि हामुरगुडा नावा पायदातदे आंद. 22-23 इव रोंडुन नड्‍डुम नना इरगा अचाह्ताप आतन. नना पिस्सि मत्‍ते पेनदाहेंदाल इनाम दोर्कनलायक बेस कबळ किया परंतन. इल्‍हा नना हामुरतुन पेरकाना मरि पिस्वरतुन पेरकाना नाकु बतले तेळियसेक हिल्‍ले. नाक अय्ते इद मेंदुलतुन होळसि किरिस्‍तुनगेन होंचि मंदकन बारे अनपिच्‍चंता. बारित्‍ते इदे बच्‍चोनो बेस. 24 गानि नना मीवाहाटीं, पिस्सि मनमळ वेल्‍लेन अव्‍सरम. 25 नना पिस्सि मंचि, मिमेट विस्वासमते बेस गट्‍टि पळना इंका मीवा पिस्वरते मीकु बेस कुसि दोर्कनाहाटीं सहायम कीसेके मीवातोने मनंतन इंचि नाकु पूरा बरोसा मंता. 26 इल्‍हा नना बस्के अय्ते मर्रा मिहगा वांतनो, अस्‍के सामि नावाहेंदाल बतल-बतल अय्ते कीतोर अवुन केंजसि मिमेट येसु किरिस्‍तुन वेल्‍ले कदर हीकिट.
बेसता कबुरते वेहताप पिसालय पौलुसना विनंति
27 बद बतले आयि, मीवा पिस्वर मात्रम किरिस्‍तुना बेसता कबुरते मत्‍ताप मनना. अस्‍के बतल आंता इत्‍ते, नना मिहगा वायिना, वायाकोन्‍ना मिमेट अंटोर उंदे आत्माते गट्‍टिगा बेस मंतिर आनि बेसता कबुरहाटीं अंटोर कलियसि पिस्सेक मंतिर इंचि वेरेतोरा हेंदाल नना केंजना. 28 बदे पोल्‍लेक आयि, बेसता कबुर वेहते तकलिप कियानोर्कुंक मिमेट वेरियमट, दैरनेमते मंटु. मीवा दैरनेमतुन हूळसि, मोमोट नासडेम आंतोम, पेन ओर्कुन कापाळंता इंचि तकलिप कियानोर्कुंक तेळियंता. इद पेनदा कबळे आंद. 29 सिराप किरिस्‍तुन विस्वासम कियालये आयो गानि ओनाहाटीं तिप्‍पल्‍क अर्रालयगुडा पेन किरिस्‍तुनहेंदाल मीकु आसिर्वाद हीता. 30 नना अरता तिप्पल्कुन मिमेट हूळतिर, इंदके केंजसंतिर आनि मिमेटगुडा अदे तिप्पल्कुने मंतिर.