1 किरिस्‍तुनतोनि कलियसि मीवा दैरनेम बेर्सता, ओना पावरमहेंदाल मीकु समादानम दोर्कता, मिमेट ओना आत्माते उंदि आतिर, इंका ओना दया मीतोनि मंता. 2 इव अन्‍नि पोल्‍लें निजमे गदा! अय्ते मीवा अंटोरा विचाराल्क बस्‍केळ्‍क उंदे मन्‍निंकांटी, मिमेट वरोंक-वरोर उंदच्‍चोने पावरम कीम्‍टु, मीवा अंटोरद उंदे मनसु, उंदे उद्‍देसम मनना. इल्‍हा पिसतिरित्‍ते नना निजमते पुरागा कूस मनंतन. 3 सतता पाय्दाताहाटीं आयि, पेद्‍दातनम हुप्‍सालय आयि बदे कबळ कियमट. गानि वेरेतोरा कदर कीसेके मनम कुद्‍दु ओरा मुन्‍ने सिन्‍नोड आसि मनना. 4 बोरे आयिर, सिराप सतता इस्‍टाल्कुना बारेमतेन आयो, गानि वेरेतोरा बारेमतेगुडा विचारम कियगोम.

5 येसु किरिस्‍तुना गुनम मत्‍तापे मीवा गुनमगुडा मनना. 6 ओर अय्ते कुद्‍दु पेने आंदुर, अयना पेनदालेसीं मनना विचारमगुडा किया हिल्‍लोर. 7 दान्क बदुल ओर ओनगा मत्‍ता अदिकाराल्कुन होळ्‍सीतोर. होळसिसि वरोर दासुनलेसीं आसि मनकन रूपमते इद बूमिपोर्रो पुटतोर. 8 इल्‍हा मनकना रूपमते पुटसि ओनद ओर सिन्‍नगा कीकुत्‍तोर. इच्‍चोने आयका पेनबाबाना इच्‍चातुन पूरा कियालासि क्रुसुनपोर्रो जीवातुनगुडा हीतोर.*पेद्‍दा-पेद्‍दा तप्पुक कीतोर्कुंके ई क्रुसता सिक्‍सा हींतुर. 9 अदुनहाटीं पेन ओन अन्‍निटवुंकन्‍ना पेद्‍दोड कीसि ओना पोरोल्तुन अन्‍नि पोरोलींकन्‍ना पेद्‍दा कीता. 10 बारित्‍ते, मब्बुन पोर्रोटव, बूमि पोर्रोटव, बूमि हिळतव अन्‍नि येसुना मुन्‍ने टोंगरां ऊनसि ओन्‍के मोळ्‍काना. 11 इंका “येसु किरिस्‍ते सामि आंदुर,” इंचि हरेक नाल्के ओप्कुनगोम. इल्‍हा पेनबाबांक कदर दोर्कना इंचि अल्हा कीता.

12-13 अदुनहाटीं नावा पावरमगल्‍ला विस्वासुल्‍कुनिटा! नना मीकु वेहनद बतल इत्‍ते, नना मीवातोनि मत्‍तस्के बस्‍केळ्‍क मिमेट नना वेहतापे ताकतिट. इंदके नना मीवातोनि हिलाकोन्‍ना गानि अस्केटदानकन्‍ना एक्‍को जेगर्ताते सामिना आदेसकुन पीसि ताकट. पेनदा इच्‍चा परकारम बतलन्‍ना कीकुनगोम इंचि मीवा मनसुने वाता इत्‍ते, अद इच्‍चा पेने मीवा मनसुने वाटता. अदुन पूरा कियालय गावाले मत्‍ता ताकतगुडा मीकु पेने हींता. इंचि पेनदुन बेस कदर कीसेके, वेर्रे कोद्‍दिगा पेन हीता मुक्‍ति परकारम मत्‍ता कबाह्‍क कीसेके पिस्‍सट.

14 बद कबळ कियिनागानि गुल्‍गाकोंटा, जगडम कियाकोंटा कीम्‍टु. 15 अस्‍के मिमेट बतले दोसेम हिलवा बेस लोकुल्‍क आकिट. तप्‍पुड कबाह्‍क किय्‍याना ई दुनियाता लोकुल्‍कुना नड्‍डुम आनि पापि लोकुल्‍कुना नड्‍डुम मिमेट बतले दोसेम हिलवोर आसि पेनदा मर्क-मियाह्कुनलेसीं मंदकिट. इंका मिमेट हीकटते पिस्वर पिस्सना लोकुल्‍कुना नड्‍डुम पोत्‍तना वेडसीलेसीं दिसकिट. 16 पिस्वर हियना पेनदा पोल्‍लेतुन गट्‍टिगा पीसि ताकट. इदुना हेंदाल किरिस्‍तु वायाना रोजुने, मीवाहाटीं नना कीता कस्‍टम, वितलाटा एर्तम आयाहिल्‍ले इंचि कुसिते वेहंतन.

17 पेनदा सेवा कियनाहाटीं मिमेट उंदि मोक्‍कुनलेह्का आसि वेल्‍लेन तिप्‍पल्‍क अरसंतिर. इदंता मीकु पेनदापोर्रो वेल्‍लेन विस्वासम मत्‍ताहेंका आसंता. अदुनहाटीं इसोंटा मीवा मोक्‍कुनतोनि नावा जीवा हीसि नेत्‍तुर वारागिच्‍चालयगुडा नना पजोळ्क होन्‍नोन, गानि वेल्‍लेन कूस मनंतन. 18 इल्‍हा मिमेट इरगा कूस मंटु, मीवातोनि ननागुडा कूस मनंतन.

19 तिमोतिन मिहगा बिरानेन लोहकन इंचि नना सामि येसुनाहेंदाल आसे पळसंतन. ओर मीवा बारेमता कबुर नाकु वासि वेहनुर, अस्‍के नाकु इरगा कुसि आयार. 20 मीवा बेसताहाटीं मनसुनाल चिंता कियानोर नहगा ओन्क तप्‍पा वेरे बोरे हिल्‍लोर. 21 अंटोर ओर-ओरा कबाह्‍कुने मुळ्‍गिसि मंतुर, येसु किरिस्‍तुना बारेमते विचारम कियानोर बोरे हिल्‍लुर. 22 गानि तिमोति असंटोर आयोर. वरोर मर्रि बाबनतोनि कलियसि कबळ कीताप, ओर बेसता कबुर वेहना सेवाते नावातोनि इमानदारिते कस्‍टपळतोर. ओना गुनम बसंटदो मीकु बेस एरपाट. 23 जेलनाल नाकुन होळसींतुरो, होळसुरो इद पोल्‍ले तेळियतारित्‍ते ओन नना मीहेके लोहकन इंचि आसे पळसंतन. 24 ननागुडा बिरानेन मिहगा वांतन, इंचि सामिनपोर्रो नाकु पुरागा बरोसा मंता.

25-26 नाकु अव्‍सरम अरतस्के सहायम कियनाहाटीं मिमेट इपपरदिसुन नाहेके लोहतिर. बेसता कबुर वेहनेंके वरोर सिपाइन लेह्का ओर नावा तोळ मत्‍तोर आंदुर, ओर नावा तम्मुनसंटोर आंदुर. गानि ओन मर्रा मीहेके लोहना इंचि नावा मनसु मंता. मीकुन हूळालय ओर इरगा गाबर आसंतोर. ओर बिमार अरता संगति मिमेट केंजतिर इंचि ओन्क तेळियतस्के ओर वेल्‍लेन नाराज आतोर. 27 ओर बिमार अर्सि हायानाल आसि मत्‍तोर इद निजमे! गानि पेनदा दया ओनपोर्रो मत्‍ताहेंका ओन्क बतल आयाहिल्‍ले. ओर बिमारताल बेस आयाकोंटा मंचि मत्‍ते, नावा दुक्‍कम इंका बेरसि मनवळ इंचि पेन नावा पोर्रोगुडा दया हुपिच्‍चि ओन बेस कीता. 28 अय्ते ओन मिहगा बल्हैना लोहना इंचि नना विचारम कीतन. ओर मिहगा वाते मिमेट ओन हूळसि कूस आकिट, अस्‍के नावा चिंतागुडा तक्‍को आंता. 29-30 मिमेट नावाहाटीं किया पर्वा सेवातुन ओर ओना जीवाक तेग्गिचि पूरा कीतोर. किरिस्‍तुना कबळतुन पूरा कियनाहाटीं ओर हायालय आसि मत्‍तोर. अदुनहाटीं ओर मिहगा वातस्के मावा दंटाता विस्वासि इंचि सामिना पोरोलते मिमेट ओन बेस कल्‍पकुंटु. ओनालेसीं सेवा कियना हरेक मनकना बेस कदर कीम्‍टु.