1 विस्वासुल्‍कुनिटा! आकिरते नना इंकुंदि मल्का वेहांतन, पेनदापोर्रोटा मीवा विस्वासमते मिमेट कूस मंटु. रासता पोल्‍लेंगें ऊके-ऊके रासालय नाक बतल तकलिप आयो. बारित्‍ते इव पोल्‍लें मीकुन तप्‍पुड बोदानाल कापाळंतां. 2 अदुनहाटीं तप्‍पुड कबाह्‍क कियना नयकस्‍केल गुनमतोरगटाल जेगर्ता मंटु. कतना*कतना यहुदि आनि मुसलमान लोकुल्‍कुनद उंदि रिवाज आंद. इद रिवाज परकारम उळकानगटा कोस्सा तोलदुन कोय्यांतुर. इसंटा रिवाज कीते पेनतोनि करार कीताप इंचि ओर नम्मंतुर. रिवाज कीतेन नीतिमंतुल्क आंतुर इंचि ओर कराहंतुर. 3 गानि मनकालोरा कबाह्कुनपोर्रो बरोसा इरताहेंका मनाकु मुक्‍ति दोर्कता इंचि आयो. येसु सामि मनाकुन पिसागोटतोर इंचि ओन्क मनम बस्‍केळ्‍क कदर हींतोम. अदुनहाटीं पेनदा आत्मा वेहताप दान मोळ्‍कानोरम मनमे निजम कतना आतोरम आंद, ओर आयुर. 4 बोरन्‍नागिंटा सतता कबाह्कुनपोर्रो बरोसा इरसि पोंगसेके तिरियानय्ते, नावा कबाह्कुनपोर्रो बरोसा इरसि पोंगालय ओनकन्‍ना एक्‍को कारनाल्क नहगा मंतां. 5 अद बल्हा इत्‍ते, नना पुट्ता एनिमिदि रोजकुंके नावा कतना आता, नना इस्राएल देसेमते पुट्ता पिव्‍वर यहुदि जातितोन, बेंजामिनना गोत्रमतोन आंदुन, मूसाना नियमकुन उंदि पोल्‍लेगुडा तप्‍पाकोंटा पीसि ताकाना परिसिल्कुना गुंपुनोन आंदुन, इब्रानि कुंटुबते पुट्ता इब्रानि मनकन आंदुन. 6 जोसने वासि, नना कलिसियातुन वेल्‍लेन तकलिप कियुंदुन. इंका मूसाना नियम परकारम नीतिते ताकमळते अय्ते नना बदे तप्‍पु किया हिल्‍लेन.

7 इव अन्‍नि पोल्‍लें नाकु वेल्‍लेन पायदातव इंचि नना मुन्‍ने इनकुनुंदुन. गानि इंदके किरिस्‍तु नावाहाटीं कीतदुन मुन्‍ने, अव अन्‍नि एर्तमे इंचि नाक तेळियसोत्‍ता. 8 अचोने आयाका, नावा सामि येसु किरिस्‍तुन एरपाट कीतदे पेद्‍दा पोल्‍ले आंद. कळमतव अन्‍नि अट्‍टि पोल्‍लेंगें, येसु किरिस्‍तुन दोर्किच्‍कुनालय अव अन्‍निन नना लेक्‍का किय्योन कचरा इनकुंतन. 9 इंका किरिस्‍तुनतोनि उंदि आसि मनमळे नावा उद्‍देसम. मूसाना नियमपोर्रो बरोसा कीसि नीतिमंतुड आया पराहिल्‍लेन, गानि किरिस्‍तुनपोर्रो विस्वासम कीताहाटीं पेनदा नदरते नीतिमंतुड आतन. 10-11 येसु किरिस्‍तुन आनि ओर हासि मर्रा जीवाते तेदता ताकततुन तेलपिचकुनना इंचि नाकु मंता. ओर बोगांच्‍ता तकलिपकु आनि हामुरतुनगुडा बोगांचि, ओनलेह्केन नाकु आयगोम. बल्हा अय्नागानि उंदि रोजु पेन नाकुन हामुरताल जीवाते तेहंता इंचि नावा आसे.

12 पोर्रो बव पोल्‍लें अय्ते रासतन, अव नावा पिस्वरते पूरा आतां इंचि वेहोन. अगा एवतन इंचि इनोन, गानि बगा एवालय अय्ते किरिस्‍तु नाकुन पीतोर, अगा एवालय नना वित्सेक मंतन. 13 विस्वासुल्‍कुनिटा! नना अगा एवतन इंचि विचारम किय्योन, गानि इद कबळ कींतन. पज्जो जर्गता पोल्‍लेन मति मरंग्सि, मुन्‍ने जर्गना पोल्‍लेन अंदकुनालय वित्सेक मंतन. 14 स्वर्गमतगा एवानोर्कुंक पेन बद इनाम हींतन इंचि केयता, अद इनामतुन येसु किरिस्‍तुनाहेंदाल दोर्किच्‍कुनालय नना वित्सेक मंतन.

15 अदुनहाटीं मना लोप्पोटाल विस्वासमते बेस बेर्सतोरम मनम अंटोरम, इव अन्‍नि पोल्‍लेना बारेमते उंदासि मंदकोम. ओक्‍कला बद्‍दना पोल्‍ले बारेमते मीवद वेरे बतलन्‍ना विचारम मत्‍ते, अदुनगुडा पेन मीकु समजांचि वेहंता. 16 अय्नागानि मनम मात्रम पेन मनाकु इदवेरादाका हुपिस्‍ता सत्‍तेमतुन पीसे ताकसेक मनना.

17 विस्वासुल्‍कुनिटा! मिमेट अंटोर उंदासि, नना ताकतापे ताकट. इंका मोमोट वेहताप बोर अय्ते ताकसंतुरो, ओर्कुन हूळसि मिमेट करियट. 18 बारित्‍ते वेल्‍लेटुर लोकुल्‍क किरिस्‍तु क्रुसुनपोर्रो हातोर इत्‍ता पोल्‍लेक विरोदमते ताकसेक मंतुर. ओर किरिस्‍तुना क्रुसता पगातोर आंदुर. ओरा बारेमते नना मीकु बच्‍चुंगो मल्कां वेहतन, इंदकेगुडा अळसेके वेहासेक मंतन. 19 आकिरते ओर नासडेम†नासडेम नासडेम इत्‍ते, नरकमते बस्‍केळ्‍क पोत्‍तना तळमिते मंचि तनलाळसेक मनमळ. आयानुर, ओरा पिस्वर पीटाहाटींगे. सिग्गु होनना कबाह्‍क कीसेके ओर पेद्‍दातनम वेह्‍कुंतुर. दुनियाता पोल्‍लेन पोर्रेन ओरा मनसु मनंता. 20 गानि मनम अय्ते ई दुनियाता लोकुल्‍कुम आयोम, मनम स्वर्गमता लोकुल्‍कुम आंदुम. अगाटाले मनाकुन पिसागोटानोर सामि येसु किरिस्‍तु वांतोर इंचि मनम ओना एदुर हूळसेक मंतोम. 21 अन्‍निटवुन ओना कय्‍दा हिळु इर्रना ताकत ओनगा मंता. ओर वातस्के आ ताकततोने मना नासडेम आयाना इद मेंदुलतुन बदलांचि ओर हासि तेदतस्‍के ओन्क दोर्कतसोंटा महिमाता मेंदुललेसीं कियानुर.