7
1,44,000 लोकुल्कुंक सिक्कां तनमळ
1 इवन्नि जर्गतारित्ते, बूमिता नालुं मूलांक पेनदा नालुं दूतां नित्तिसि मत्तद नना हूळतन. अव बूमिपोर्रो आयि, समुद्रमते आयि आनि बवे मराकुन पोर्रो आयि वळितुन वायाकोंटा आपसि पीसि मत्तां. 2-3 अस्के मर्रा उंदि दूतातुन जीवाते मनना पेनदा सिक्कातुन पीसि पोळ्द पेयसनाहेंदाल पोर्रो वासेक मनानद हूळतन. बव नालुं दूतांक अय्ते, बूमितुन आनि समुद्रमतुन नासडेम कियाना अदिकारम हीसि मत्ता, अव नालुं दूतन अद पेद्दा आवाजते, “बदवेरादाका अय्ते मोमोट पेनदा सेवाकुल्कुना कपालमपोर्रो सिक्कां तन्नोम अदवेरदाका बूमितुन आयि, समुद्रमतुन आयि, अल्हेने मराकुन आयि नासडेम कियमट” इंचि इत्ता. 4 अस्के सिक्कां तंचि मत्तोरा लेक्का केंजतन अय्ते, ओर उंदि लक्सा नल्पै नालु वेय्कु मत्तुर आनि अव्टे इस्राएलना हरेक वंसंमता लोकुल्क मत्तुर.
5-8 यहुदाना वंसंमताल पन्नेंड वेय्कु लोकुल्कुंक सिक्का तनमळ जर्गता. रुबेनना वंसंमताल पन्नेंड वेय्कु, गादना वंसंमताल पन्नेंड वेय्कु, अस्सेरना वंसंमताल पन्नेंड वेय्कु, नप्तालिना वंसंमताल पन्नेंड वेय्कु, मनसेना वंसंमताल पन्नेंड वेय्कु, सिमोनुना वंसंमताल पन्नेंड वेय्कु, लेविना वंसंमताल पन्नेंड वेय्कु, इसाकुना वंसंमताल पन्नेंड वेय्कु, जबलुनना वंसंमताल पन्नेंड वेय्कु, योसेपना वंसंमताल पन्नेंड वेय्कु, बेंजामिनना वंसंमताल पन्नेंड वेय्कु, इल्हा पन्नेंड गोत्राल्कुना लोकुल्कुंक सिक्कां वाटमळ जर्गता.
राजगद्देता मुन्ने वेल्लेन लोकुल्क
9 अद आता पजा, पेनदा राजगद्दे आनि गोर्रे पोरिना मुन्ने तेल्ला कपडिं केरसि, कजूर मराता कोम्मां कय्दे पीसि हरेक जातितोर, हरेक बासातोर, हरेक लोकुल्क आनि अन्नि देसेल्कुनोर इल्हा लेक्कुते बोरे लेक्का पर्रुर अच्चोन मंदितुन नना हूळतन. 10 ओर अंटोर पेद्दा आवाजते, “राजगद्देपोर्रो उद्दिस मनना मना पेनबाबानगा, गोर्रे पोरिनगा मुक्ति हियना सक्ति मंता” इंचि इनालय दल्गतुर. 11-12 अन्नि दूतां राजगद्दे सुट्टु, पेद्दाल्क आनि जीवाते मत्ता आ नालुं जिवरासिना सुट्टु नित्तिसि मत्तां. अव अन्नि दूतां राजगद्दे मुन्ने बोक-बोर्लें अर्सि पेनदुन आरादना कीसेके इल्हा इनालय दल्गतां, “आमीन, स्तुति, महिमा, तेल्वि, ताकत आनि दन्यवाद बस्केळ्ताहाटीं मावा पेनदावे आंदुं, आमीन” इंचि इत्तां. 13 अस्के पेद्दाल्कुना अव्टेटाल वरोर “तेल्ला कपडिं केरसि मन्नानुर ईर बोर आंदुर? ईर बगाटाल वातुर?” इंचि नाकुन पूसकीतोर. 14 अस्के, “नीकु एरपाटे महाराज,” इंचि नना ओन इत्तन. अस्के ओर, “ईर अंटोर वेल्ले तिप्पल्कुनाल पलाते वातोर आंदुर. ईर ईरा कपडिं गोर्रे पोरिना नेत्तुरते हुक्किसि तेल्लगा कीतुर आंदुर. 15 अदुनहाटीं ईर अंटोर इंदके पेनदा राजगद्दे मुन्ने मंतुर. नर्का-पिय्यल गुळितगा मंचि दाना सेवा कींतुर. राजगद्देपोर्रो उद्दिस मनानोर ईरापोर्रो डेरा कीसि कापाळांतोर. 16 ईरकु इंदकेटाल बस्केने दूपा आयो, कर्वेस्सो, अचोने आयाका ईरकु पोळ्दुना एद्दिहेंदाल दगळागुडा दल्गो. 17 बारित्ते ईर अंटोर्कुन मेहानोर, राजगद्दे नड्डुम उद्दिस मनना गोर्रे पोरि आंदुर. ओर ईरकुन पिस्वरता एता उटानगा ओंतोर. पेन ओरा कळ्कुना कंडेह्कुन पुरागा उसमंता,” इंचि वेहतोर.