1 पजा एडुं सिक्‍कानाल उंदि सिक्‍कातुन आ गोर्रे पोरि नेम्‍हाचि विच्‍चुता. अस्‍के जीवाते मत्‍ता आ नालुं जिवरासिनाल उंदि जिवरासि, पिडगु वाटते वायानसोंटा आवाजते, “वा” इत्‍तद नना केंजतन. 2 अस्‍के अगा नाकु उंदि तेल्‍ला गुर्रम दिसता, दानपोर्रो वरोर बानम पीसि उद्‍दिस मत्‍तोर. ओन्क उंदि किरिटम हियमळ जर्गता. ओर लडाईं गेल्सतोर, अय्नागानि इंका गेल्सना इंचि पेय्सतोर. 3 गोर्रे पोरि रोंडो सिक्‍कातुन नेम्‍हाचि विच्‍चुता अस्‍के, जीवाते मत्‍ता आ नालुं जिवरासिनाल रोंडो जिवरासि, “वा” इंचि इत्‍तद नना केंजतन. 4 अस्‍के उंदि एर्राटा गुर्रम पलाते पेय्सानद नना हूळतन. लोकुल्‍क वरोंक-वरोर हव्ककुनना इंचि, अद गुर्रमपोर्रो उद्‍दिस मत्‍तोन्कु, बूमिपोर्रोटाल सांतितुन येतकुनना अदिकारम हियमळ जर्गता. ओन्क उंदि पेद्‍दा कसेर हियमळ जर्गता. 5 बस्के अय्ते गोर्रे पोरि मूडो सिक्‍कातुन नेम्‍हाचि विच्‍चुता, अस्‍के मूडो जिवरासि, “वा” इत्‍तद नना केंजतन. पजा नाकु अगा उंदि कर्रे रंगुना गुर्रम दिसता. आ गुर्रमपोर्रो उद्‍दिस मत्‍तोना कय्‍दे उंदि तराजु मत्‍ता. 6 अच्‍चोटेन, जीवाते मत्‍ता आ नालुं जिवरासिना नड्‍डुमताल, “उंदि रोजुना बूतितच्‍चोन कोत्‍ताने, उंदि किलो गोह्कु दोर्कंता, इंका अचोने कोत्‍ताने मूड किलोना जोन्‍नां दोर्कंता. गानि नियदुन, अंगुर पानकमतुन नासडेम कियमा,” इंचि उंदि लेंग केंजावाता. 7 गोर्रे पोरि नालुंगो सिक्‍कातुन नेम्‍हाचि विच्‍चुतस्के जीवाते मत्‍ता आ नालुं जिवरासिनाल नालुंगो जिवरासि, “वा” इत्‍तद नना केंजतन. 8 पजा नाकु अगा उंदि पस्पु रंगुना गुर्रम दिस्ता. आ गुर्रमपोर्रो उद्‍दिस मत्‍तोना पोरोल हामुर, ओना पज्जो-पज्जो नरकम वासेक मत्‍ता. ओन्क बूमिता नालुं बागाल्कुनाल उंदि बागमपोर्रोटा लोकुल्‍कुन कसेरते, कर्वुने, बिमार्कुने आनि केडाता जिवरासिन हेंदाल नासडेम कियाना अदिकारम हियमळ जर्गता. 9 गोर्रे पोरि हेय्युंगो सिक्‍कातुन नेम्‍हाचि विच्‍चुतस्के, पेनदा पोल्‍लें लोकुल्‍कुंक वेहताहाटीं आनि ओरा गवाइ वेहताहाटीं मोक्‍कु हिय्यना गद्‍दे हिळु हव्‍किसि मत्‍तोर्कुना आत्मान हूळतन. 10 आ आत्मां पेद्‍दा आवाजते, “ए सामि, पवित्र आनि सत्‍तेम मनानोन, माकुन हव्कुता बूमिपोर्रोटा लोकुल्‍कुना न्‍यायम निमे बस्के कींतिन? ओरा न्‍यायम कीसि मावा नेत्‍तुरता बदला बस्के एतांतिन?” इंचि वरगेयालय दल्‍गतां. 11 पजा ओर्क अंटोर्क तेल्‍ला कपडिं हीसि, “मीकुन हव्‍कुतापे मीवा दंटाता सेवाकुल्कुन आनि विस्‍वासुल्‍कुन हव्कना मंता, ओरा लेक्‍कांगुडा पुरागा आयानदाका मिमेट गळसेप आराम कीम्‍टु,” इंचि ओर्कु वेहतोर. 12 गोर्रे पोरि हारुंगो सिक्‍कातुन नेम्‍हाचि विच्‍चुता, अस्‍के पेद्‍दा बुकंप आतद नना हूळतन. अस्‍के पोळ्‍दु कर्रे गोंगोळिलेसीं कर्रेगा आनि वेळ्‍सिअंता बारे नेत्‍तुरलेसीं एर्रगा आता. 13 पेद्‍दा वळि दुमारम वाते तोया मराता पंडिं बल्हा हिड अर्रंता, अल्‍हेने सुक्‍कां मब्बुनाल बूमिपोर्रो अरतां. 14 मब्बु उंदि कागदेम हुटताप हुटकुंचि मायसोत्‍ता. अल्हेन हरेक गुट्‍टा, दीबे अवुना जागानाल जर्गतां. 15 अस्‍के बूमिपोर्रोटा राजालोर, अदिकारिल्‍क, सायाबुल्क, सिरमंतुल्‍क, ताकतवर्क, दासुल्क, दासुल्क आयवोर, इल्‍हा अंटोर लोकुल्‍क गुट्‍टाना बुयाराल्कुने, पेद्‍दा बंडा सोर्रेने होंचि मकतुर. 16 मक्‍किसि गुट्‍टां आनि बंडानतोनि, “मापोर्रो अर्सि, राजगद्‍देपोर्रो उद्‍दिस मत्‍तोना नदरताल आनि गोर्रे पोरिना होंगुनाल माकुन मक्‍किचट. 17 बारित्‍ते, पेनदा होंग हुप्‍सना कतरनाक रोजु एवता. ओरा मुन्‍ने बोर नित्‍ता परांतुर?” इंचि इनालय दल्‍गतुर.