22
Ulwimbo lwoꞌkuyivuga Nahano
1 Ikyanya Nahano akakiza Dahudi mu maboko ga Sahuli, na mu gaꞌbandi bagoma baage, anayimbira Nahano kwokuno:
2 «Nahano, ye lwala lwani.
Ye butibitiro bwani. Ye na Lukiza wani.
3 Rurema ye lwala lwani.
Ye mu ndanga.
Ye siribo yani. Ye ndi mu longera mweꞌmisi.
Anali ye Lukiza. Yehe, ye lwingo lwani.
E Lukiza wani, wangiza mu bagoma.
4 Nahano, ye kwaniini ukukizi yivugwa,
bwo ayamiri ali mu ngiza mu bagoma.
Kinatume ndi mu kizi mútabaaza.
5 Imidunda yoꞌlufu, yâli koli nzokaniini.
Neꞌmigezi ya Narufu, yâli kola iganyihonga kwo.
6 Ishumi za Nakuzimu, zâli koli ngoniri.
Naꞌmalamba gaage, gâli kola ha mbere lyani.
7 Mu yago malibu gaani, nꞌgatabaaza Nahano.
Ee! Nꞌgahamagala Rurema wani.
Yaho mu nyumba yage, anayuvwa izu lyani.
Amalira gaani, ganahika mu matwiri gaage.
8 «Lyeryo, ikihugo kyanalenga mwoꞌmusisi, kyanajugumbana.
Kiri neꞌnguliro ziꞌgulu, nazo zanahunga-hunga.
Zanalenga mwoꞌmusisi, bwo Rurema âli koli rakiiri.
9 Mu mazuulu gaage, mwanatutumuka ikyusi.
Na mu kanwa kaage, mwanahuluka umuliro gwoꞌkujigiivya,
kuguma niꞌbengesheeshe.
10 Anayanuula igulu, anashonookera haashi,
atabisiri ibibungu biiru mwiꞌdako lyaꞌmagulu gaage.
11 Anashonera ku makerubi, anamúbalalana.
Anaboneka mu kyanyaanya.
12 Ikibungu kiiru kyanamúzunguluka,
kyanaba ngiꞌheema.
13 Mu bulangashane bwage, imilavyo, lya-lya!
14 Nahano, Rurema kwo ali hiꞌgulu lya byoshi,
anayimokooza,
halinde izu lyage lyanayuvwikana.
15 Akavugumula abagoma baani mweꞌmyambi, banashaabuka.
Analeeta neꞌmilavyo, yanabayimula.
16 Ikyanya Nahano akabakanukira,
ikyanya umuuka gukalyoka mu mazuulu gaage,
haaho, amabenga geꞌnyaaja ganayanuuka.
Indaliro zeꞌkihugo zanayami boneka ku bweranyange.
17 «Rurema akagolola ukuboko kwage ukulyoka hiꞌgulu,
ananyogorora mu miiji mingi.
18 Kundu abagoma baani balyagagi ndwani, haliko Rurema anangiza mu maboko gaabo.
Ee ma! Akangiza mu kati kaabo, kundu bâli njombiri, banâli mbimiri imisi.
19 Ikyanya nâli kolaga mu malibu, haliko banandeera.
Kundu kwokwo, Nahano ananjuutira
20 Anandyosa yaho, anandwala áhali umutuula.
Ayamiri anguuziri, kyanatuma aganguluula.
21 «Bwo nâli kizi gira íbikwaniini imbere lya Nahano, buzira kuhuba,
kyanatuma agambemba.
22 Na bwo ndi mu simbaha imaaja zaage, anambemba.
Ndakanayihandula ku Rurema wani mbu ngizi kola amabi.
23 Imaaja zaage, ndanazijanda.
Si byo akanzikiiriza byoshi, ngakizi bisimbaha.
24 Ndâli gweti akashembo imbere lya Rurema,
si nâli kizi yihangirira, gira ndayifunde mu byaha.
25 Nahano ayiji-yiji kwo ndi mweru, na kwo ndi mu kizi gira íbikwaniini,
kyo kitumiri akambemba.
26 «E Nahano, mu bemeera, uli mu yerekana kwo uli mwemeera.
Neꞌmwa ábakwaniini, uli mu yerekana íbikwaniini.
27 Imwaꞌbeeru, uli mu yerekana kwo uli mweru.
Haliko imwa banangora-mabi boohe, ulyagagi nga ngengya.
28 Abatuudu, uli mu bakiza.
Si abanabwikangaate, uli mu batindimaza.
29 E Nahano, uli itara lyani.
Uli mu hindula ikihulu, gube mulengeerwe.
30 Ku butabaazi bwawe, ndi mu hima ikiso kyaꞌbasirikaani.
Unali mu njoboleesa ukusimbuka ikigo.
31 «E Rurema, ngiisi byo uli mu gira, bikwaniini bweneene.
Ngiisi byo uli mu ndagaania, uli mu bigira.
Ngiisi úli mu kutibitira, we siribo yage.
32 Ndaaye gundi Rurema, átali Nahamwitu naaho.
Ee ma! Rurema yenyene, ye lwala lwitu.
33 Rurema, ye mu nzikamya.
Ye nali mu njongaaniza ho ndi mu lenga.
34 Ibigere-gere byani, ali mu bisikamya ngeꞌnenge zaꞌkabale.
Kiri na ku marango, ali mu ndanga.
35 Amaboko gaani, ayamiri ali mu gakomereza mwiꞌzibo.
Na kundu bakatula umuheto mu miringa, haliko amaboko gaani gali mu yami gufwora.
36 Uyamiri uli mu njuutira neꞌsiribo zaawe, gira ungize.
Na ku butabaazi bwawe, ndi mu sikama.
37 Ugweti ugakizi nyeshuhya,
halinde ishando zaani zitakizi ki tyerera.
38 Nâli kizi bingiriza abagoma baani, halinde na mbaminike.
Ndanâli kizi galuka índazi baminika.
39 Yabo bagoma baani, ndi mu bajigiiriza lwoshi,
halinde batangaki yimuka.
Banakizi gwa mwiꞌdako lyeꞌshando zaani.
40 We kanjoboleesa, halinde ngizi gira izibo,
wanafukamya abagoma baani mu magulu gaani.
41 Yabo bagoma baani, wanabapuumusa.
Na ábâli njombiri, nanabaminika.
42 Yabo bagoma baani, ikyanya bâli kizi looza úgabatabaala, batanamúlonga.
Na kundu bâli kizi kutakira e Nahano, haliko utanabayakula.
43 Nanabafutiiriza, halinde banaba nga luvu.
Nanakizi genda ngabalibata mu njira, nga bidaka.
44 «Kiri ikyanya abiitu bakandeera, ukangiza.
Neꞌkyanya ukangira mbe mutwali waꞌmahanga, wanakizi ndanga.
Kundu hali abandi bo ndâli yiji. Nabo kwakundi, bakoli gweti bagangolera.
45 Ibinyamahanga, biri mu yija bigweti bigaagoka imbere lyani.
Ikyanya bali mu nyuvwa, banakizi nzimbaha.
46 Yabo bandu bakayija bakoli vunisiri imitima.
Na ábâli bishamiri, banakizi yibishuula iri banalenga mweꞌkinyukura.
47 «Nahano ayamiri ho. Na bwo ye lwala lwani, akizi yivugwa.
Rurema wani, akizi huuzibwa! Ye Lwala lwani, ye na Lukiza wani.
48 Ye mu nyihoolera.
Anali mu biika ibinyamahanga mwiꞌdako lyani.
49 Ayamiri ali mu nguluula mu maboko gaꞌbagoma baani.
E Nahano, keera ukambiika hiꞌgulu lyaꞌbagoma baani.
Wanangiza, kiri na mu biitani.
50 E Nahamwitu, ngakizi kuhuuza mu bandu baꞌmahanga gooshi.
Iziina lyawe, ngakizi lilumbuusa mu kuliyimba.
51 Nie Dahudi, Rurema akandoola, ananyimika, kwo mbe mwami wage.
Na buno, agweti aganjoboleesa, halinde ngizi hima.
Ayamiri ali mu ngirira amiija, kuguma neꞌmbaga yani,
halinde imyaka neꞌmyakuula.»