2
1 Nahano adetaga kwokuno: «Abandu beꞌMohabu bagweti bagayifunda mu byaha.
Si bakayabiira imigongolo ya mwami weꞌHedoomu,
banagisingoola, banagigira mwoꞌluhemba.
Aahago! Ukubahana, ngola ngabahana ngana-ngana!
2 Ku yukwo, ngola ngashonoolera ikihugo kyabo mwoꞌmuliro,
gunasingoole inyumba ngomu za mu kaaya keꞌKeryoti.
Yabo Bamohabu, bagaminikwa mu lunganga lwiꞌzibo.
Bagakizi banda akashiba, iri banadihiriza ibibuga.
3 Kiri na mwami wabo, ngamúyita kuguma naꞌbatwali baage booshi.»
Kwokwo, kwo Nahano adesiri!
4 Nahano adetaga kwokuno: «Abayuda, bagweti bagayifunda mu byaha.
Aahago! Ukubahana, ngola ngabahana ngana-ngana!
Si bâli kizi jajaaka imaaja zaani, batanakizi kulikira imigeeza yazo.
Ngiisi kwo bashokuluza baabo bâli kizi yikumba imizimu yeꞌbibeesha,
kwo nabo keera yabahabura.
5 Ku yukwo, ngola ngashonoolera ikihugo kyabo mwoꞌmuliro,
gunasingoole inyumba ngomu zooshi za mu kaaya keꞌYerusaleemu.»
6 Nahano adetaga kwokuno: «Abahisiraheeri bagweti bagayifunda mu byaha.
Aahago! Ukubahana, ngola ngabahana ngana-ngana!
Mu kulooza ukugala, bagweti bagaguza abandu bazira buhube, babe baja mbu bwo batabayishula imyenda yabo.
Banagweti bagakizi guza umukeni ku kishingo kyeꞌbiraato naaho.
7 Babwinagi kwaꞌbakeni bali nga lukungu naaho,
banagweti bagakizi balibata-libata kwo.
Balya bakeni, ikyanya bali mu ba imbere lyaꞌbatwi beꞌmaaja, bali mu bayima ukuli kwabo.
Lolaga ibala! Umwana na yishe, bagweti bagashangiira umukazi muguma.
Kwokwo, kwo bagweti bagatukiisa iziina lyani, na ndi nie Mutaluule.
8 Bali mu nyaga abakeni imirondo, hiꞌgulu lyoꞌmwenda.
Neꞌyo mirondo, ikyanya bali mu gendi yikumba ha tutanda twabo,
bali mu giyaja haashi, banagigwejere kwo.
Neꞌkyanya bali mu ba mu ndaaro zeꞌmizimu yabo,
bali mu kizi nywa amaavu go bakagula ku ndiho ízitakwaniini.
9 «Abahamoori bâli bala-bala, nga biti byeꞌmyerezi,
banâli neꞌmisi mingi, nga biti byeꞌmyalooni.
Kundu kwokwo, nꞌgabaminika imbere lyaꞌBahisiraheeri.
Nꞌgashereeza ibitumbwe ku matavi gaabyo, nanakuula kiri neꞌmizi.
10 Nie kamùlyosa mu kihugo kyeꞌMiisiri,
nanahisa imyaka makumi gana, ngweti ngamùrongoora mwiꞌshamba.
Kwokwo, lyo mulonga ukuyabiira ikihugo kyaꞌBahamoori, kibe kyeꞌmwinyu.
11 Mu baana biinyu, nanatoola mwo baguma babe baleevi.
Naꞌbandi, banaba bo Bataluule.
E Bahisiraheeri! Nie Nahano namùbuuzagya kwokuno: Bino ngweti ngamùbwira, ka bitali byoꞌkuli?
12 Kundu kwokwo, yabo Bataluule, mukabahubiisa mu kubanywesa idivaayi.
Ha nyuma, ikyanya abaleevi bakayija mbu bamùkanukire,
mwanakizi banaakira kwo bazibe utunwa!
13 «Buno, ngola ngamùhotamia,
ngiꞌgaare ku kyanya liyijwiri ingano.
14 Kundu abandu bangayihayiri kwo bo bali mu tibitaga mulindi,
si ndaaye kiri noꞌmuguma úgafuushuka.
Kiri neꞌbishugusha, imisi igabimalira.
Neꞌbikalage byaꞌbasirikaani, nabo bagayabirwa ukuyikiza.
15 Ábagweti bagafwora imiheto, batagazibiiriza.
Na ábayiji ukusuula umulindi, ndaaye úgayikiza.
Kiri na ábali mu gendera ku fwarasi, ndaaye úgafuushuka.
16 Yulwo lusiku, kiri neꞌbikalage byaꞌbasirikaani, bagatibita balyagagi bukondwe!»
Kwokwo, kwo Nahano adesiri.