Ikitaabo kyoꞌmuleevi
Hamoosi
Indangiriro
Yiki kitaabo kikayandikwa na Hamoosi, kinayerekiini ngiisi kwo âli kizi kanukira Abahisiraheeri, bwo bâli kizi libuza abakeni, banâli kizi hambirira ukulonga amatongo mingi-mingi.
Hamoosi atâli muleevi, kandi iri mwana woꞌmuleevi (7.14). Si âli riiri mungere weꞌbibuzi, anâli kizi tanduula ibiti byeꞌkikuyu. Kundu kwokwo, Rurema akamútuma, ayiji menyeesa ngiisi kwo agahaniiriza abandu baage.
Hamoosi âli kizi menyeesa igambo lya Rurema, mu kukoleesa imigani. Ku mugani: «Ku byaha bishatu byeꞌDamasiki, kiri neꞌbina…», (1.3; 1.6; 1.9; 1.11; 1.13; 2.1; 2.4; 2.6) Anakizi buuza ibibuuzo byoꞌkushembuulana (3.3-6). Akakoleesa imigani, ngeꞌnzige (7.1-3), noꞌmuliro (7.4-6), noꞌmugozi gwoꞌkugera mwo (7.7-9), noꞌlugega lweꞌbitumbwe íbiyeziri (8.1-14). Âli loziizi kwoꞌkuli kukizi hinga «nga lwiji úluli mu golomba.» Anadeta: «Kwokwo balya beene Yusefu ábasigiiri, hali ikyanya Nahano Rurema woꞌbushobozi bwoshi angabakejeerera.» (5.15b)
Muziizi muguma gwiꞌsikamiro, guli mu Hamoosi 5.14: «Mukizi yiyeka noꞌkugira amabi. Si mube noꞌmwete gwoꞌkukizi gira amiija, lyo mulama. Haaho, lyo Nahano Rurema woꞌbushobozi bwoshi agamùtabaala, nga kwokulya muli mu kizi deta.»
Íbiri mwo ku bwofi
a) Rurema agaahana ibihugo íbiri ha butambi lyaꞌBahisiraheeri (1.2–2.5)
b) Amagambo goꞌkudaaka Abahisiraheeri boonyene (2.6–5.17)
c) Abahisiraheeri bagatwalwa imbohe mu mahanga (5.18–6.14)
d) Amabone goꞌkuyerekana ngiisi kwo Rurema agahaniiriza abandu (7.1–9.10)
e) Mu siku ízâye yije, Abahisiraheeri bagaki galulirwa imwa Rurema (9.11-15)
1
1 Ino ndumwa, Rurema akagimenyeesa umuleevi Hamoosi. Âli riiri mungere wa mu kaaya keꞌTekowa, mu kihugo kyeꞌBuyuda. Inadesiri hiꞌgulu lyeꞌkihugo kyeꞌHisiraheeri. Ku kyanya uyo Hamoosi akagiyigulirwa, umusisi muhamu gwâli mali hisa imyaka ibiri guleeziri. Kinali kyo kyanya Huziya âli twaziri mu kihugo kyeꞌBuyuda. Yerobwamu naye, mugala Yohaashi, ye wâli twaziri mu kihugo kyeꞌHisiraheeri.
2 Uyo Hamoosi anadeta kwokuno: «Nahano agweti agalunduma ku mugazi Sayuni.
Izu lyage ligweti ligayuvwikana mu Yerusaleemu.
Kyo kitumiri indagiriro nyija zikola mu yuma.
Kiri niꞌrango lyoꞌmugazi Karimeeri, nalyo keera lyahangaluka.»
Rurema agaahana abatuulani baꞌBahisiraheeri
3 Nahano adetaga kwokuno: «Abandu beꞌDamasiki bagweti bagakizi yifunda mu byaha.
Aahago! Ukubahana, ngola ngabahana ngana-ngana!
Si bâli kizi kuba-kuba abandu beꞌGiryadi,
nga ábali mu komoolola indalo neꞌfuka yaꞌmiino.
4 Kwokwo, akajumiro keꞌmbaga yoꞌmuhisi mwami Hazaheeri, ngola ngakashonoolera kwoꞌmuliro.
Ee! Irya nyumba nyiija ya mwami Beni-Hadaadi, ngagisingoola lwoshi.
5 Kiri neꞌmigaliro yeꞌmiryango yaꞌkaaya keꞌDamasiki, ngagitwisa-twisa.
Ninaminike abandu ba mu ndekeera yeꞌHaweni.
Na nzimiize noꞌmutwali weꞌBeeti-Hedeni.
Kiri naꞌBaharaamu bagatwalwa imbohe i Kiiri.»
Kwokwo, kwo Nahano adesiri!
6 Nahano adetaga kwokuno: «Abandu beꞌGaza bagweti bagayifunda mu byaha.
Aahago! Ukubahana, ngola ngabahana ngana-ngana!
Si bakagwata abandu booshi mu twaya tulebe,
banabatwala imbohe, gira bagendi ba baja i Hedoomu.
7 Yako kaaya keꞌGaza, ngola ngakashonoolera kwoꞌmuliro.
Gunasingoole kiri neꞌnyumba zaamwo ngomu zooshi.
8 Abahashidoodi nabo, ngabazimiiza kuguma na mwami weꞌHashikelooni.
Na mbuli hindukiraga akaaya keꞌHekurooni, na ngateere.
Ee! Abafirisiti booshi ábagaaba basigiiri, bagaminikwa ngana-ngana!»
Kwokwo, kwo Rurema Nahamwitu adesiri.
9 Nahano adetaga kwokuno: «Abandu beꞌTiiro bagweti bagayifunda mu byaha.
Aahago! Ukubahana, ngola ngabahana ngana-ngana!
Kundu bakanywana ikihango naꞌBahisiraheeri, si bakakihongola!
Banagwata abandu booshi mu twaya tulebe,
banabatwala imbohe, gira bagendi ba baja i Hedoomu.
10 Ku yukwo, inzitiro zaꞌkaaya kaabo, ngola ngazishonoolera kwoꞌmuliro,
gunasingoole kiri neꞌnyumba zaamwo ngomu zooshi.»
11 Nahano adetaga kwokuno: «Beene Hedoomu bagweti bagayifunda mu byaha.
Aahago! Ukubahana, ngola ngabahana ngana-ngana!
Si bagweti bagahiiva beene wabo,* 1.11 beene wabo Abahisiraheeri bâli riiri ba mu kibusi kya Yakobo, mwene wabo Hesahu, shokuluza waꞌBahedoomu. Abahisiraheeri,
iri banabayita neꞌngooti, buzira kubayuvwirwa indengeerwa!
Banayamiri bali mu savya-savya hiꞌgulu liꞌshavu, iri banalangama.
12 Ku yukwo, akaaya kaabo keꞌTemaani, ngola ngashonoolera kwoꞌmuliro,
gunasingoole kiri neꞌnyumba ngomu zooshi za mu keꞌBosira.»
13 Nahano adetaga kwokuno: «Beene Hamooni bagweti bagayifunda mu byaha.
Aahago! Ukubahana, ngola ngabahana ngana-ngana!
Si bakateera beene Giryadi, mbu lyo bayajabula ikihugo kyabo!
Haaho-haaho, banakizi gwata abakazi ábâli kola neꞌnda, banazibunduule.
14 Ku yukwo, inzitiro zaꞌkaaya kaabo keꞌRaba, ngola ngazishonoolera kwoꞌmuliro,
gunasingoole kiri neꞌnyumba zaamwo ngomu zooshi.
Emwe! Yulwo lusiku, izibo ligakungula ngana-ngana!
Hanabaagage ulunganga lwingi, nga lweꞌkihuhuuta.
15 Mwami weꞌHamooni agatwalwa imbohe, kuguma naꞌbatwali baage booshi.»
Kwokwo, kwo Nahano adesiri!
*1:11 1.11 beene wabo Abahisiraheeri bâli riiri ba mu kibusi kya Yakobo, mwene wabo Hesahu, shokuluza waꞌBahedoomu.