4
Rurema akoza ibinyamahanga
1 Nahano adetaga kwokuno:
«Ku yikyo kyanya, ngashubi genduusa ikihugo kyeꞌBuyuda, kuguma naꞌkaaya keꞌYerusaleemu.
2 Ibinyamahanga ngabikuumania,
na mbilindimulire mu ndekeera íri mu detwa “Nahano atwa ulubaaja”.
Haaho, ngayiji bakoza, ku byoshi byo bakagirira abandu baani, Abahisiraheeri.
Ee! Si bakabashabulira mu gindi milala, banagabaana ikihugo kyabo.
3 Ee! Bakagabaana kiri naꞌbandu baani, mu kutaara ikibare.
Bâli kizi guliisa imisore mitabana, mbu balonge abashule.
Banakizi guliisa neꞌmisore minyere, mbu balonge idivaayi.
4 E bandu beꞌTiiro naꞌbeꞌSidooni, na mweshi ba mu twaya twaꞌBafirisiti,
Biki byo mundoziizi kwo? Ka muloziizi ukunyihoola?
Iri kwangiba kwokwo, ndagaki tindiriza ukuyihoola.
5 Si mukayabiira iharija yani neꞌnooro, kiri neꞌbindu byani byeꞌkishingo,
mwanabitwala mu ndaaro ziinyu.
6 Keera mwanaguliisa abatuulaga beꞌBuyuda naꞌbeꞌYerusaleemu, imwaꞌBagiriki,
mbu lyo mubatwala hala neꞌkihugo byabo.
7 Kundu kwokwo, ngola ngabagalula, balyoke ngiisi ho mukabaguliisa.
Ha nyuma, ngiisi byo mukabakolera, niinyu ngamùkolera byo.
8 Emwe! Bagala biinyu, na banyere biinyu, ngabaguliisa imwaꞌBayahudi.
Ha nyuma, nabo, banabaguliise imwaꞌbandu beꞌSheeba, kwo batuuziri hala bweneene.
Kwokwo, kwo nie Nahano ndesiri.»
Izibo lizinda noꞌkutwirwa imaaja
9 Mumenyeese ibinyamahanga kwokuno:
«Muyilingikanie kwiꞌzibo, muvyule indwani ziinyu.
Abasirikaani biinyu booshi, bayegeerage, gira bayiji tuteera.
10 Ifuka ziinyu, muzitule, zihinduke ngooti.
Noꞌtushibuulo twinyu, tuhinduke matumu.
Ábali noꞌbukaholwe mu kati kiinyu, mubakomeereze, bahinduke ndwani.
11 E milala yoshi mituulani! Mukwabadukage, munakorane mwiꞌyo ndekeera.»
E Nahano! Manulaga abasirikaani baawe, bayiji bateera.
12 Nahano adesiri kwokuno: «Yibyo binyamahanga, biyegeerage!
Bayije ha ndekeera íri mu detwa “Nahano atwa ulubaaja”.
Haaho, ho ngaaba mbwatiiri, mu kutwira booshi ulubaaja.
13 Muyabiire utushunguulo, munabazinge, mukuba umwimbu keera gwayera.
Muyiji bahonda-honda, nga muli mu kanda imizabibu íyijwiri mu mukenge.
Ee! Indango, zikoli yijwiri amabi gaabo.»
14 Kwokwo, abandu kandaharuurwa bagweti bagalindirira mu ndekeera yoꞌkutwira mwoꞌluhango.
Ee! Lulya lusiku lwo Nahano agaatwa kweꞌmaaja, keera lwayegerera.
15 Izuuba noꞌmwezi, bitakiri mu yaka.
Kiri neꞌndonde, nazo zigaazima.
Rurema agagashaanira abandu baage
16 Halya ku mugazi Sayuni, emwe! Nahano agweti agalunduma.
Izu lyage liri mu yuvwikana ukulyokera i Yerusaleemu.
Igulu neꞌkihugo, bigweti bigajungubana!
Haliko yabo bandu ba Nahano, boohe ali mu balanga.
Ee! Ye butibitiro bwaꞌBahisiraheeri.
17 «Haaho, lyo mugaamenya ku kasiisa kwo nie Nahano, Rurema winyu.
Ee! Nduuziri i Sayuni, ku mugazi gwani mutaluule.
Akaaya keꞌYerusaleemu, kagayama kali keꞌmwani imyakuula.
Abasirikaani beꞌmahanga bataye ki shubi kayifunda mwo.»
Abandu ba Rurema bagashubi ramba mu butoge
18 «Yulwo lusiku, imigazi igayeza imizabibu ku bwingi.
Kiri neꞌbitugwa mu migazi, bigakizi kamwa bweneene.
Inyiiji zooshi zeꞌBuyuda, zigayijula mwaꞌmiiji.
Neꞌshyoko igazununuka mu nyumba ya Nahano,
inakizi nywisa indekeera yeꞌbiti byaꞌkasiya.
19 Ikihugo kyeꞌMiisiri, kigahinduka biguuka.
Neꞌkihugo kyeꞌHedoomu kigahinduka shamba liyanuule,
Mukuba, yabo bandu bakateera abandu beꞌBuyuda,
banakizi bayita, kundu bâli bazira mahube.
20 Ikihugo kyeꞌBuyuda, kigakizi tuula mwaꞌbandu imyaka neꞌmyakuula.
Akaaya keꞌYerusaleemu, kagayama ho, halinde ku bibusi byoshi.
21 Amahube gaꞌbandu baani, kundu ndazi gakoga,
haliko ngaki bakoga go.
Nie Nahano nganatuula i Sayuni mu kaaya keꞌYerusaleemu, twe naꞌbandu baani.»