2
1 Niehe ngashonera ku lwingo lweꞌnaazi, mbeere yo.
Ngakizi lindirira, nyuvwirize Nahano.
Mukuba keera nꞌgamúyidodombera, na ndoziizi ukumenya ngiisi kwo aganjuvya.
Rurema ashuvya Habakuki
2 Nahano ananjuvya kwokuno: «Gano mabone, ugayandikage!
Ugayandike ku mbahwa, ku fwabe ízigasomeka bwija.
Kwokwo, ngiisi úgagasoma, alonge ukuyami menyeesa abandi.
3 Yago mabone, galindiriiri ikyanya kyo gashungikiirwi kwo.
Gagweti gagaadeta hiꞌgulu lyeꞌmberuuka, ganali goꞌkuli.
Na kundu gangatinda, ulindirire naaho.
Si gagakoleka ngana, gataganakeereza.
4 Uyandike kwokuno: “Ulolage yaba banabwikangaate.
Bagweti bagatuula ku gindi-gindi njira, ítakwaniini.
Si abandu ábakwaniini boohe,
bagaramba ku njira yoꞌkulangaalira Rurema.* 2.3-4 Barumi 1.17; Bagalatiya 3.11; Baheburaniya 10.37-38.
5 Nga kweꞌdivaayi iri mu teberezania,
kwo na kwokwo, ngiisi ábagweti bagayikangaata, batagayama ho.
Si bali nga nakuzimu, mu kulooza ukumirangusania.
Na nga kwo Narufu atali mu yiguta, nabo kwo na kwokwo.
Si bagweti bagayikumaniza abandu baꞌgandi mahanga gooshi,
gira balonge ukubamirangusa.”
6 Abandu mwene yabo bagakizi mùhonyoleza, ti:
“Yayewe imwinyu! Mwe mugweti mugayilundira íbitali byeꞌmwinyu.
«“Munagweti mugayilugiza imyenda, mutanali mu giyishula!
Aahago! Amagambo mwene yago, ka gangagenderera? Nanga, maashi!”
7 Kundu mukayabiira ibindu byabo,
si lusiku luguma, bagayami mùyubukira, banamùtakamire.
Lyeryo niinyu, banamùshahule ibyeꞌmwinyu.
8 Mwâli kizi shereeza ibihugo bingi, kuguma noꞌtwaya twabyo,
iri munashahula ibindu byabo.
Na ngiisi ábâli tuuziri mwo, mwanakizi bayita.
Kwokwo, ibindu biinyu nabyo, ngiisi ábagaaba baki sigiiri, bagayiji bishahula.
9 «Yayewe imwinyu! Mwe mugweti mugahombeesa abandi, mbu lyo muyigaza.
Munagweti mugasalira ukugendi yubaka kwiꞌrango, mbu lyo mufuuka ubuhanya.
10 Si keera mukashungika kwo mugagendi shereeza abandu bingi.
Aahago! Mumenye kwo keera mwayiteeza ishoni imbere lya beene winyu.
Kwokwo, mukola mugaafwa.
11 Kyo kitumiri, kiri naꞌmabuye go muyubasiri mweꞌnzitiro, gagateera akashiba mu kumùlega.
Emwe! Kiri neꞌmiganda, nayo igamùyimomootera!
12 «Yayewe imwinyu!
Si utwaya twinyu, mugweti mugatuyubaka mu kuyitana, na mu kuvindagazania!
13 Kundu kwokwo, Nahano woꞌbushobozi bwoshi keera akalagaania
kwo ngiisi byaꞌbandu bali mu himbuukira kwo, bigaki herera mu muliro.
Haliibwi! Si yabo bandu bagweti bagayitubanulira ubusha!
14 Nga kwaꞌmiiji gayijwiri hooshi mu nyaaja,
kwo na kwokwo, ubulangashane bwa Nahano bugamenyeekana hooshi mu bandu.
15 «Yayewe imwinyu, mwe mugweti mugalalusa abatuulani biinyu.
Mugweti mugakizi balungira kolobwe mu divaayi, gira balaluke,
lyo mulonga ukuloleera ubukondwe bwabo.
16 Aaho! Kundu mukiri mu longa ulushaagwa,
haliko masaasa atabukwa, mugaki teezibwa ishoni.
Niinyu, mugaanywa idivaayi, munakizi yibumbulika neꞌndalwe.
Emwe! Nahano yenyene agamùyijira ku buraakari bwage.
Kwokwo, niinyu, ubulangashane bunahinduke ishoni!
17 Si keera mukayita abandu bingi i Lebanooni, mu twaya twabo,
mwanayita kiri neꞌnyamiishwa.
Buno niinyu, mukolaga mugayoboha, munakomeresibwe.
Ngiisi byo mukagirira abandi mu twaya twabo, niinyu, bigaamùba kwo.
18 Aahago! Ikyanya umundu agweti agayibaajira imigisi, ali mu longa akamaro kaki?
Si irya migisi iri mu tulwa mu byuma,
inali ya kutebana naaho!
Itashobwiri kiri noꞌkudeta!
Uyo mundu, si ali mu biika umulangaaliro ku kindu kyo akayigirira yenyene!
19 «Yayewe imwinyu! Si mugweti mugabwira umugisi mubaaje mu mbahwa, ti: “Vyukaga!”
Munabwire umugisi gwiꞌbuye, ti: “Yimukaga!”
Aaho! Yugwo mugisi, ka gwangakuyigiriza? Nanga maashi!
Kundu gulyagagi mubugiirize kweꞌnooro neꞌharija, haliko gutali mugumaana!
20 Haliko, Nahano atuuziri mu nyumba yage ndaluule.
Abandu booshi ba mu kihugo bakizi beera munyerere imbere lyage!»