Ikitaabo kyoꞌmuleevi
Hagayi
Indangiriro
Yiki kitaabo kya Hagayi, kiyerekiini ngiisi kweꞌnyumba ya Rurema ikaba itazi yijula, kundu abandu bakaba bakoli hisiizi imyaka ikumi niꞌtaanu bagalusiri ukulyoka i Babeeri. Umuleevi Hagayi anabwira abandu kwo batwikire ukuyubaka inyumba zaabo, banatee yijuza inyumba ya Rurema.
Hagayi ali mu koleesa ibibuuzo mu kuyerekana byo aloziizi ukudeta (lola 1.4, 9; 2.3, 19). Anali mu galukira-galukira amagambo. Ku mugani, amagambo: «Muyitoneese bwija» gali mu boneka mu 1.5, 7; 2.15, 18. «Nyamiri ndi kuguma na niinyu» gali mu boneka mu 1.13; 2.4. «Ngashubi shagania igulu neꞌkihugo» gali mu boneka mu 2.6, 21.
Imiziizi miguma yiꞌsikamiro, iri mu Hagayi 1.5-6: «Kwokwo, nie Nahano woꞌbushobozi bwoshi nadetaga kwokuno: “Ngiisi íbigweti bigamùkoleka kwo, mubiyitoneese kwo bwija! Kundu mukabyala imbuto nyingi, haliko mwanayiji yimbula biniini naaho. Na kundu mugweti mugaalya, si mutali mu yiguta. Na kundu mugweti mugaanywa, si muki nyotiirwi. Na kundu mugweti mugayambala, si muki kaywiri. Neꞌkyanya muli mu longa imbembo, ziri mu yami mala, nga zikalokezibwa mu ludaha lutule.”»
Íbiri mwo ku bwofi
a) Hagayi abwiririra Abahisiraheeri kwo bayubakulule inyumba ya Rurema (1.1–2.19)
b) Nahano agagingika Zurubaberi nga kamangu kaage ka yenyene (2.20-23)
1
Rurema akyula kweꞌnyumba yage ishubi yubakululwa
1 Ikyanya mwami Dariyo weꞌPerisiya akahisa imyaka ibiri atwaziri, mu lusiku lwa mbere lwoꞌmwezi gweꞌndatu, Nahano anatuma umuleevi Hagayi imwa guvuruneeri Zurubaberi mugala Shalityeri, kuguma noꞌmugingi mukulu Yoshwa mugala Yozadaki.
2-3 Uyo Hagayi, anagendi bwira abandu kwo Nahano woꞌbushobozi bwoshi adetaga kwokuno: «Yaba bandu, bagweti bagaadeta kweꞌkyanya kyoꞌkuyubakulula inyumba ya Nahano, kitazi hika. 4 Aaho! Ka bimùkwiriiri mutuule mu nyumba ndimbiise bwija, neꞌnyumba yeꞌmwani iki shasiri?
5 «Kwokwo, nie Nahano woꞌbushobozi bwoshi nadetaga kwokuno: “Ngiisi íbigweti bigamùkoleka kwo, mubiyitoneese kwo bwija!
6 Kundu mukabyala imbuto nyingi, halikago mwanayiji yimbula biniini naaho.
Na kundu mugweti mugaalya, si mutali mu yiguta.
Na kundu mugweti mugaanywa, si muki nyotiirwi.
Na kundu mugweti mugayambala, si muki kaywiri.
Neꞌkyanya muli mu longa imbembo, ziri mu yami mala, nga zikalokezibwa mu ludaha lutule.”
7 «Nie Nahano woꞌbushobozi bwoshi, nadetaga kwokuno: “Ngiisi íbigweti bigamùkoleka kwo, mubiyitoneese kwo bwija!”
8 «Muzamuukire mu migazi, munaleete ibiti, munayubakulule inyumba yani. Ee! Iyo nyumba, ngagishambaalira ngana, na ndonge ukukizi huuzibwa mwo.
9 «Mwehe, kundu mukalangaalira umwimbu mwingi, haliko mwanayiji yimbula muniini naaho. Gulya muniini, ikyanya mukagutaahana, nꞌgayami guyehuulira hala.
«Nie Nahano woꞌbushobozi bwoshi, namùbuuza kwokuno: “Kituma kiki byaba kwokwo? Yuvwagwi! Inyumba yani iki shasiri. Kundu kwokwo, ngiisi muguma winyu agweti agahahalira iyeꞌmwage naaho. 10 Kyo kitumiri igulu lyahangama, litananyeesa invula. Niꞌdaho likoli gubuusiri. 11 Mu kihugo, nꞌgaleeta mweꞌkikamo, gira kishereeze imigazi, neꞌngano, neꞌmizabibu, neꞌmizehituuni, kiri neꞌzindi mbuto. Abandu bakola mu libuuka, kiri neꞌbitugwa. Ngiisi kyo mwâli kizi yitubanula kwo, kikasherebera ngana.”»
12 Ha nyuma, lirya igambo lyo Rurema Nahamwabo akababwira ku njira yoꞌmuleevi Hagayi, uyo Zurubaberi mugala Shalityeri, noꞌyo mugingi mukulu Yoshwa, mugala Yozadaki, kuguma naꞌbandu booshi ábakahunguuka, banalisimbaha. Ee! Uyo Hagayi, Nahano ye kamútuma. Kwokwo, abandu banayoboha Nahano.
13 Ha nyuma, ulya Hagayi, indumwa ya Nahano, anabwira abandu kwokuno: «Nie Nahano nadetaga kwo nyamiri ndi kuguma niinyu.»
14 Kwokwo, guvuruneeri Zurubaberi weꞌporoveesi yeꞌBuyuda, Nahano anamúkania umutima, kuguma noꞌlya mugingi mukulu Yoshwa, kiri na ngiisi ábakahunguuka. Kyanatuma bagatondeera ukuyubakulula irya nyumba ya Rurema wabo, anali ye Nahano woꞌbushobozi bwoshi! 15 Ku kyanya bakatondeera, kwâli riiri mu siku makumi gabiri na zina zoꞌmwezi gweꞌndatu, gwa gwogwo mwaka gwa kabiri gwoꞌbutwali bwa mwami Dariyo.