6
Abahisiraheeri bayilega ku bulyalya
1 Haaho mugaadeta kwokuno: «E maashi, mugirage tugalukire Nahano!
Kundu akatujanganula-janganula, haliko ye ganashubi tukiza.
Na kundu akatubeza zirya nguma, haliko ye ganashubi tulunga zo.
2 «Ha nyuma lyeꞌsiku zibiri, agatuvyula tushubi ba bagumaana.
Neꞌri bwangakya, agashubi tugira ngiisi kwo twâli riiri,
gira tulonge ukuramba imbere lyage.
3 «Emwe! Bwangaba bwija tulongage ukumenya Nahano nga ngiisi kwo ali.
Ee! Tukizi gira umwete bweneene, halinde tumúmenye bwija.
Na kwo kali kasiisa kwiꞌzuuba liri mu kizi huluka,
kiri neꞌnvula iri mu bombeesa idaho ku mahona-nvula,
kwo kanalyagagi kasiisa kwo agatushuvya.»
4 Nahano abuuza kwokuno: «E beene Hifurahimu, na mwe Bayuda! Nimùgirage kuti?
Si urukundo lwinyu, luli mu yami nyerera nga luuta lwa shesheezi!
Luli mu ba nga kimi íkiri mu mala duba-duba mwiꞌzuuba.
5 Kyo kitumiragi nꞌgamùtumira abaleevi baani, bamùkenguule kwo ngamùyita.
Ee! Ngamùyita ku njira yaꞌmagambo gaani.
Ninayami mùhana duba, nga kweꞌkiryamu kiri mu lyamuza.
6 «Byo ndoziizi, kutali kutangirwa amatuulo.
Si ndoziizi kwo mukizi kundana.
Na ndoziizi mube munyiji bwija, kwo nie Rurema.
Yukwo, kwo kuhimiri ukukizi ndangira amatuulo goꞌkusiriiza.*6.6 Mataayo 9.13; 12.7.»
Amabi gakwira hooshi mu kihugo
7 «Kundu keera tukanywana ikihango twe na niinyu,
haliko mwanaba nga Hadamu, mwanakihongola.
Mutanaba bemeera imwani.
8 «Abandu beꞌGiryadi balyagagi banangora-mabi.
Ngiisi ho bagweti bagalenga, ishando zaabo ziri mu siga hoꞌmuko naaho.
9 «Abagingi baani nabo, balyagagi nga banyazi,
bwo bagweti bagategeera abandu, gira babayite.
Ee! Ikyanya abalenga-njira bali mu genda i Shekemu, banayami bayita.
Banali mu teezania ishoni, mu kugira íbitali nga byo.
10 «Mu kihugo kyeꞌHisiraheeri, keera nꞌgabona amagambo geꞌkisoomeza.
Mwe beene Hifurahimu! Si mugweti mugayiyulubaza nga bashule, mu kuyikumba imizimu!
11 E Bayuda! Kundu nâli loziizi ukushubi mùgenduusa,
haliko mukoli shungikiirwi ukuhanwa.»