7
1 Nahano anashubi deta kwokuno: «Ku kyanya ndi mu looza ukukiza Abahisiraheeri,
ibyaha bya beene Hifurahimu binabe byo bigashubi boneka.
Kiri naꞌmabi gaꞌBasamariya, nago ganayulubuke.
Mukuba, bali banabibeesha.
Abazimba bagweti bagatula inyumba.
Kiri neꞌmbuga, abanyazi bagweti baganyagaza abandu.
2 Yabo bandu batayiji kwo ngweti ngabalangiiza.
Si ibyaha byabo, bikoli bazungulusiri.
Ee ma! Ngiisi byo bagweti bagaagira, ngoli bibwinagi.»
Igambi hiꞌgulu lyaꞌbaami
3 «Abandu bagweti bagaagira amabi, gira lyo basimiisa mwami.
Ikyanya bagweti bagabeesha, lyaꞌbakulu bali mu sheka.
4 Balya booshi, si balyagagi bashule!
Bali mu lungumirwa bweneene nga muliro gweꞌfuuru,
úguli mu yaka buzira kugusibwa ukulyoka ku kyanya umuyosi weꞌmikate ali mu kanda irobe halinde ku kyanya irobe ligaaba keera lyaheema.
5 Ku lusiku lukulu lwa mwami, abakulu bali mu lalusibwa naꞌmaavu.
Mwami naye, anakomeerane neꞌnzereezi.
6 Yabo bandu, si imitima yabo igweti igayaka nga fuuru!
Bushigi bwoshi, uburaakari bwabo buli mu hooha.
Halikago, iri buli mu kya, bunayami yaka bweneene nga mbigi zoꞌmuliro, wa gwi-gwi!
7 Yabo booshi, ikyanya baki duusiri nga fuuru,
bali mu yami zimiiza abatwali baabo.
Bali mu yita abaami baabo booshi, muguma-muguma.
Kundu kwokwo, ndaaye kiri noꞌmuguma wabo úli mu mbuuna ubutabaazi.»
Abahisiraheeri bayihega ku gindi milala
8 «Beene Hifurahimu bali mu komeerana neꞌbinyamahanga.
Bali bandu ba busha,
nga mukate úgwakalangwa buzira kuhindulwa.
9 Ibinyamahanga keera bikamúmala imisi, bátanamenya.
Yabo Bahisiraheeri, invwi keera zakwiraga itwe lyoshi, keera banaluha bweneene!
Kundu kwokwo, batali noꞌmwazi.
10 Bwo bagweti bagayikangaata bweneene, bakola bagaalegwa.
Kundu kwokwo, batagweti bagangalukira.
Batanagweti bagaagira, mbu banjakule.
11 «Beene Hifurahimu balyagagi nga ngunde íri mu hendwa duba-duba.
Bali mu tee tabaaza abandu beꞌMiisiri.
Ha nyuma, banabuli gendi tabaaza abeꞌHasuriya.
12 Aahago! Ikyanya bagaaba baki gweti bagagenda yo,
ngayami batega noꞌlushenga,
na mbashungululire haashi nga tunyuni twa mu kyanyaanya.
Na bwo bagweti bagaagira amabi, ngayami bahaniiriza.
13 Yayewe imwabo, bwo bakanyiyogookola!
Kundu nâli kizi looza ukubakiza, haliko banakizi mbeeshera.
Aahago! Bwo keera bakandahira, leka ngana bafwe!
14 «Kundu bagweti bagandirira, halikago kuli mu ba naaho ku bulyalya.
Si bagweti bagayibulaga-bulaga ku ngingo zaabo.
Banali mu yikera-kera,
mu kuhuuna imizimu yeꞌmahanga kwo balonge ingano neꞌdivaayi.
Banaki genderiiri ukundahira.
15 Nie kabayigirizagya, nie kanababiika mweꞌmisi.
Kundu kwokwo, banagenderera naaho noꞌkunjungikira igambi libi.
16 Ikyanya bagweti bagalooza ubutabaazi,
batali mu bulooza imwani.
Balyagagi ba busha, nga muheto úguhengamiri.
Na bwo bagweti bagavwajagira byoꞌbusha,
abimangizi baabo bagayitwa ku ngooti.
Abamiisiri bagakizi bashekeereza.»