8
Amahube mahamu gaꞌBahisiraheeri
«BwaꞌBahisiraheeri bakahongolaga ikihango kyani, batanatwaziizi imaaja zaani,
abagoma bagayiji bayihwika kwo nga nyunda, mu kubateera, wa vwi!
Kwokwo, mugirage mudihirize ibibuga, mu kubakengula!
Yabo Bahisiraheeri, si bagweti bagandakira kwokuno:
“Si ulyagagi Rurema witu! Aahago! Ututabaale!”
Kundu kwokwo, baki genderiiri naaho noꞌkushemya íbiri biija.
Kyo kinatumiri abagoma bakola bagabahiiva.
 
«Yabo bandu, si bâli kizi yiyimikira abaami, buzira kumbanuusa!
Banatoolaga naꞌbatwali, buzira kummenyeesa.
Bagweti bagakizi tula imigisi mu harija, na mu nooro,
kyo kitumiri bagashereezibwa.
E Basamariya! Gulya mugisi gwinyu úgushushiini neꞌnyana,
ngushombiri ngana-ngana!
Uburaakari bwani bukoli yasiri hiꞌgulu liinyu.
Aahago! Mugagenderera ukuyiyulubaza halinde lihi?
Yugwo mugisi úgushushiini neꞌnyana, si naluganda naaho ye kagutula,
gutanali ye Rurema yenyene!
Ku yukwo, iyo mugisi yinyu yeꞌSamariya, igahongolwa lwoshi.
 
«Yabo bandu, bakabyala imbuusi.
Si mu kuyimbula, bagakizi yimbula ikihuhuuta!
Imbuto zeꞌngano, kundu zigweti zigakizi mera mu ndalo,
halikago, ndaayo mihuli igakizi bitongeka kwo.
Na kundu yangatongesiri kweꞌmbuto,
si ibinyamahanga byo bigakizi zirya.
Abahisiraheeri keera bamirwa.
Banakoli kabuliirwi mu mahanga, nga kirugu íkitakiri mu koleesibwa.
Ikyanya bakagendi tabaaza Abahasuriya,
banaba nga punda úgweti úgayangaara.
Si keera bakatangira ibindi bihugo ibindu, mbu lyo babalanga.
10 Na kundu bakahaana indengu mu bandu baꞌmahanga mingi-mingi,
si ngolaga ngabakuumania, gira bakozibwe ngana.
Ikyanya umwami mukulu agakizi balibuza,
bagakizi kandamirwa mwiꞌdako lyage.* 8.10 umwami mukulu kandi iri «umwami weꞌHasuriya».
 
11 «Beene Hifurahimu bagweti bagayiyubakira ututanda twingi-twingi,
gira bayishaagize ibyaha.
Ehee! Ha yutwo tutanda, haꞌbandu bagweti bagashubi girira ibindi byaha.
12 Kundu nâli kizi baheereza imaaja íziri tiita,
si batazitwaziizi.
13 Abahisiraheeri basiimiri naaho ukubaaga amatuulo geꞌbitugwa,
gira lyo bakizi lya inyama.
Haliko, imwani yago matuulo gaabo galyagagi ga busha.
Bwo bâli gweti bagakizi yifunda mu mabi bweneene, ngakizi gakengeera,
na mbahanirize, mu kushubi bagalulira i Miisiri.
 
14 «Abahisiraheeri, keera bakayibagira Umulemi wabo,
banayiyubakira inyumba nyiija-nyiija za kahebuuza.
Abayuda nabo, keera bakayiyubakira inzitiro ngomu mu twaya twabo.
Kundu kwokwo, tulya twaya, ngatujigiivya twoshi, kuguma noꞌbutibitiro bwabo.»

*8:10 8.10 umwami mukulu kandi iri «umwami weꞌHasuriya».