9
Hosheya amenyeesa kwaꞌBahisiraheeri bagaahanwa
1 E Bahisiraheeri! Mutakizi shambaala, mutanakizi banda akabuuli, nga kweꞌbinyamahanga biri mu gira.
Si mutali bemeera imwa Rurema winyu!
Si keera mukayiguliisa, gira mubaagage bashule.
Musiimiri bweneene ukuhembwa ha ngiisi kiyeluuliro hiꞌgulu lyoꞌbushule bwinyu.
2 Aaho! Buno, imimbu yinyu igamùniihira.
Mugaabula imizabibu mihyahya yoꞌkukanda mweꞌdivaayi.
3 Mutagaki hanguulwa ukubeera hano mu kihugo kya Nahano,
si mugagalukiraga i Miisiri.
Kiri na mu kihugo kyaꞌBahasuriya, mugakizi lya íbitaluke naaho.
4 Mutagakizi ki tangira Nahano amatuulo geꞌdivaayi.
Kiri naꞌmatuulo giinyu geꞌbitugwa, gatagaki músimiisa.
Yago matuulo gooshi, gagaaba gakoli yulubiiri.
Gagaaba nga byokulya byeꞌkigandaaro.
Ngiisi úgaabilya kwo, naye agayami yulubala.
Ibyokulya mwene yibyo, bagakizi birya boonyene.
Halikago, bitakwiriiri bileetwe mu nyumba ya Nahano.
5 Aaho! Kutagi kwo mugaagira ku zirya siku ngulu za Nahano?
6 Kundu mwangakira Abahasuriya,
haliko ikihugo kyeꞌMiisiri kigaki mùhima.
Ee! I Mefiisi, yo munda mweshi mugaziikirwa.
Kundu mushubi hiiti ibindu byeꞌkishingo,
halikago ikishuka kigabimera mwo.
Kiri neꞌnyumba ziinyu, zigayijula mweꞌmigenge.
7 E Bahisiraheeri! Isiku zo mugaahanwa kwo, keera zahikaga.
Kikola kyanya kyoꞌkuyihoola ibyaha biinyu.
Yizo siku, mwe Bahisiraheeri mukwiriiri muzimenye bwija!
Bweꞌbyaha biinyu bikoli luguusiri, munakoli shombiini bweneene,
kyo kitumiri mugweti mugaadeta kwokuno:
«Si abaleevi bakoli sirehiri!
Abakozi ba Rurema, bakola mu deta íbitali nga byo!»
8 Umuleevi, kundu agweti agakolera Rurema mu kulaliira beene Hifurahimu,
halikago, abandu bagweti bagamútega ngiisi ho ali mu lenga.
Kiri na mu nyumba ya Rurema, bali mu ba bamúshombiri.
9 Mwehe, mugweti mugavwebeeba mu mabi,
nga kwaꞌbandu beꞌGibeya bâli kizi gira kare.
Yago mabi giinyu, Rurema agakengiiri,
aganamùhana hiꞌgulu lyago.*9.9 Batwi beꞌmaaja 19–21.
10 Nahano adetaga kwokuno:
«Ikyanya nꞌgatee bona Abahisiraheeri,
nanayiyuvwa nga mundu úwagwana imizabibu mwiꞌshamba.
Bashokuluza biinyu, bâli riiri nga bitumbwe bya mbere byoꞌmutiini.
Halikago, ikyanya bakahika i Baali-Pehoori,
banayami tondeera ukuyikumba umuzimu Baali, kundu guli mu teezania ishoni.
Buzira kutinda, banabihuuka,
banaba babi, nga gulya mugisi gwo bâli kizi yikumba.
11 Ku yukwo, ubulangashane bwa beene Hifurahimu bugabayisunga hala, nga hinyuni.
Abakazi batâye ki heekage inda, batanâye ki bute!
12 Na kundu bangabiiri naꞌbaana,
si yabo baana, booshi bagaafwa.
Ikyanya ngabasigaga boonyene, agaaba yayewe imwabo!
13 «Yaho keera, nꞌgabona ngiisi kwo beene Hifurahimu bâli biisirwi ahandu hiija bweneene.
Halikago buno, bakola bagatwala abaana baabo iwa kugendi yitwa.»
14 E Nahano! Kutagi kwo nangahuunira abandu baani?
Ngahuuna kwo bakaabo batakizi buta.
Amabeere gaabo, gatakizi yoza!
15 Nahano adetaga kwokuno: «Bakatondeerera ukugira amabi i Girigaali.
Haaho, ho nꞌganatondeerera ukubashomba.
Na bwo baki gweti bagakizi gira amabi,
ngabayimula booshi mu kihugo kyabo.
Bwaꞌbimangizi baabo bakoli huniri booshi, ndagaaba ngi bakuuziri.
16 Beene Hifurahimu, keera bakanyanyagwa haashi.
Imizi yabo, ikoli yumiri, ndaanabyo bitumbwe byo bagatongeka.
Kundu bangabusiri abaana, banabe bakundwa baabo,
halikago ngabayita naaho.»
17 Yabo beene Hifurahimu, Rurema wani agabalahira, bwo batamúsimbahiri.
Bagaaba naaho bandu boꞌkukizi zereera-zereera mu binyamahanga.