10
Abahisiraheeri, ibindu byabo byoꞌkuyikumba, byashereezibwa
1 Abahisiraheeri bâli riiri nga muzabibu mwija,
úgwali kizi joojeka bweneene.
Halikago, ikyanya bakalonga ibindu bingi,
banatondeera ukukizi yubaka ututanda twa kundi-kundi.
Na ngiisi kweꞌkihugo kyabo kyâli kizi genderera ukugala,
banakizi limbiisa inguliro zaabo ndaluule zoꞌkuyikumbira kwo.
2 Balya bandu, imitima yabo ikoli tebesiri bweneene.
Bakoli kwaniini ukuhanwa.
Yutwo tutanda twabo, Nahano akola agatuhongola.
Na zirya nguliro zaabo ndaluule, akola agazivungula-vungula.
3 Ha nyuma, bagayiji deta, ti: «Íbitumiri tutahiiti mwami,
bwo tutâli simbahiri Nahano.
Na kundu uyo mwami angabiiri ho, bikagi byo angatugiriiri?»
4 Yabo Bahisiraheeri bagweti bagalagaania amagambo ga kwingi-kwingi,
banali mu gabiika kweꞌndahiro zeꞌkinyoma.
Kwokwo, mu kutwa imaaja, ukuli kukola mu bambalwa,
nga kishuka íkimeziri mu ndalo mbinge, kinali mwo kolobwe.
5 Abasamariya bakoli gweti bagajuguma hiꞌgulu lya gulya mugisi gweꞌnyana, úguli i Beeti-Haweni.
Ee! Bakoli yobohiri íbigagukoleka kwo.
Yabo bandu bakola mu gulirira bweneene, kuguma naꞌbagingi baabo!
Kundu bâli kizi shambaala hiꞌgulu lyoꞌbulangashane bwagwo,
haliko, gukola guganyagwa, gunatwalwe i mahanga.
6 Yugwo mugisi gukola gugatwalwa mu kihugo kyeꞌHasuriya,
gunahaabwe mwami mukulu weꞌyo munda, libe ituulo lyage.
Yugwo mugisi, beene Hifurahimu bâli kizi gubiika kwoꞌmulangaaliro,
kyo kitumiri bagateezibwa ishoni.
7 Abasamariya kuguma na mwami wabo bagatwibwa,
banatwalwe nga hiti íhiri mu yehuulwa ku nyaaja.
8 Na bwo bâli kizi yifunda mu byaha mu mbeero ku marango,
yizo mbeero zooshi, Rurema agazihongola.
Kiri noꞌtutanda twazo tugamera kweꞌmigenge neꞌbigunga.
Banatondeere ukubwira imigazi, ti: «Mutubindikire!»
Banakizi bwira noꞌtugangazi, ti: «Mutuhongokerage kwo!*10.8 Luka 23.30.»
9 «E Bahisiraheeri, ukulyokera ku kyanya mwâli ki riiri i Gibeya,
muyamiri mugweti mugayifunda mu byaha.
Kiri na buno, muki biyifuuziri mwo.†10.9 Batwi beꞌmaaja 19–21.
Si balya banangora-mabi beꞌGibeya bakaminikwa!
10 Ikyanya ngola ibiringiini, naani ngamùteera.
Ngakuumania ibinyamahanga, gira bimùlwise, binamùgire baja.
Mukuba, ibyaha biinyu, keera byaluguuka.
11 «Mwe beene Hifurahimu muli nga nyana íkomiiri ukukizi fina ingano,
iri inashambaalira umukolwa gwayo gwoꞌkugihungumula.
Halikago buno, kundu muhiiti igosi írinonosiri,
ngola ngalishwekera mweꞌngata yeꞌmbahwa.
Kwokwo, mwe naꞌBayuda, kiri naꞌbandi beene Yakobo, mugakizi yitubanula mu kuhinga indalo,
kwiꞌdaho íyumagusiri.
12 Nꞌgamùbwira: “Mukizi byala íbikwaniini,
lyo mukizi yimbula ibitumbwe byoꞌrukundo.
Kundu imitima yinyu keera ikasiba, haliko mukizi gisibuulula.
Kikola kyanya kyoꞌkundoozagya nie Nahano,
halinde nyiji mùyonera íbikwaniini, binamùhikire nga nvula.”
13 «Halikago mwehe, mwâli gweti mugakizi byala amabi,
ganali gaago-gaago go mukayimbula.
Ngiisi kwo mukabyala ikinyoma,
keera mwalyagaga ibitumbwe byakyo.
Mwâli kizi langaalira imisi yaꞌbasirikaani biinyu,
iri munayitoneesa kwo bo bagakizi mùlanga.
14 Ku yukwo, mukola mugateerwa naꞌkashiba kiꞌzibo.
Inzitiro ziinyu zooshi, zigayami hongolwa,
nga kwo mwami Salimani akashereeza Beeti-Haribeeri.
Kiri na bamaawe, bakanyanyagwa haashi, banafwa kuguma naꞌbaana baabo.
15 «E bandu beꞌBeteeri, maashi! Si mukoli bihuusiri.
Kwokwo, niinyu mugaminikwa ngana!
Mango ulusiku lwoꞌkutwibwa kweꞌmaaja lwahika,
lyo mwami waꞌBahisiraheeri naye agayami yitwa.»