11
Rurema âli kuuziri bweneene Abahisiraheeri
1 «Hisiraheeri, ikyanya âli ki riiri mwana mwanuke,
nâli múkuuziri bweneene.
Umwana wani, nꞌgamúhamagala kwo alyokage i Miisiri.*11.1 Mataayo 2.15.
2 «Haliko, ikyanya nâli genderiiri ukumúhamagala,
anakizi nyisunga hala.
Anakizi hoza imizimu ya Baali,
iri anayokera imigisi yayo umubadu.
3 Nienyene, nie kamúyigiriza ukugenda,
nanakizi músholera, mu kumúgwatira ku maboko.
Kundu kwokwo, ataki bwinagi kwo nie kamúlera!
Atanaki ndwaziizi.
4 Nâli kizi múrongoora, mu kukizi múgirira bwija.
Nanamúkombeera bweneene ku rukundo.
Nanamúsaagiza irya ngata mwiꞌgosi lyage.
Nanakizi goka, mu kumúheereza byo agaalya.
5 «Abahisiraheeri kundu bâli bandu baani, si bakalahira ukungalukira.
Kyo kitumiri mwami weꞌMiisiri ye gashubi ba mwami wabo.
Baganakizi kolera na mwami weꞌHasuriya.
6 «Ingooti zikolaga zigalavya-lavya mu twaya twabo.
Abagoma banakizi yifunda mu miryango yabo.
Mwomwo, mweꞌshungi zaabo mbi zigahekera.
7 Abandu baani keera bakahiga kwo banjande.
Kundu bali mu kizi deta kwo nie riiri hiꞌgulu lya byoshi,
haliko ndaaye úli mu mbeereza ulushaagwa mu kati koꞌkuli.
8 «E Bahisiraheeri, ka byanganzigira kwo nimùjande?
Kutagi kwo nangamùbiika mu maboko gaꞌbagoma?
Ka mubwini kwo nangamùshereeza,
nga kwo nâli shereziizi akaaya keꞌHadima?
Ka nangamùhongolera akaaya,
nga kwo nꞌgahongola akaaya keꞌSeboyimu? Nanga maashi!
Umutima gwani, gutaki yisiri mu nda!
Na ngweti ngamùyuvwirwa indengeerwa bweneene.
9 Aahago! Buno, ndagaki mùfuka kwoꞌburaakari bwani,
ndaganaki mùshereeza.
Si nie Rurema, ndali mundu wa kufwa naaho.
Niehe, ndi Mutaluule mu kati kiinyu, ndaganamùyijira mu buraakari.
10 «Bwo nie nahamwinyu, mugaki ngulikira.
Nâye ki lundume nga ndare.
Neꞌkyanya ngalunduma,
abandu baani bagakizi nyijira ukulyoka imbembe bakoli yobohiri.
11 Na kwakundi, bagalyoka neꞌMiisiri, bakoli jugumiri nga tunyuni.
Banalyokage mu kihugo kyeꞌHasuriya, bali nga ngunde.
Ngashubi bagalulira mu kihugo kyabo.»
Kwokwo, kwo Nahano adesiri.