12
Beene Hifurahimu keera bambetuza ikinyoma.
Abahisiraheeri, si bagweti bagandyalyania.
Abayuda nabo, batatwaziizi Rurema,
kundu alyagagi Mutaluule, anali mwemeera.
 
Emwe! Yabo beene Hifurahimu, bali mu shiiba bagweti bagalandiriza imbuusi ukulyoka isheere.
Bagweti bagakizi deteereza ibinyoma, iri banayitana.
Banagweti baganywana ikihango naꞌBahasuriya.
Banagweti bagalungika amavuta geꞌmizehituuni i Miisiri, lyo balonga yoꞌbutabaazi.
 
Nahano agweti agalega Abayuda, beene Yakobo.
Anakola agabahana hiꞌgulu lyoꞌbulyalya bwabo.
Ee! Agabahaniiriza, ukukulikirana na ngiisi kwo âli kizi gira.
 
Uyo Yakobo, ikyanya âli ki riiri mu nda ya nyina,
anakizi zezeera umukulu ku kasiizira.
Neꞌri akaba akola mundu úkoli bwini,
anayiji hagana kiri na Rurema yenyene.
Ee! Anahagana noꞌmuganda, anamúhima.
Yakobo anamúyinginga kwo amúgashaanire, iri anahonya imigenge.
Ha nyuma, ikyanya âli riiri i Beteeri, anabonaana na Rurema masu ku gandi.
Ikyanya âli riiri yaho, Rurema anamúganuuza.
Nahano, ye nali mu buuzibwa Rurema woꞌbushobozi bwoshi.
Yenyene naaho, ye Nahano.
 
Kwokwo buno, mugalukirage Rurema winyu!
Munakizi múyegamira.
Mukizi kundana, iri munakizi gira íbikwaniini.
 
Abahisiraheeri basiimiragi ukukizi tebana.
Bagweti bagakizi koleesa ibigero byoꞌkugungana.
Yabo beene Hifurahimu bagweti bagayiraata kwokuno:
«Twehe, tuli bagale! Si tukoli yigaziizi!
Ndaaye úkabona ngiisi kwo tugweti tugagungana.
Ndaanalyo igambo lyo twangalegwa kwo.»
 
10 Nahano adetaga kwokuno: «Mumenyage kwo nie Rurema Nahamwinyu.
Nie kamùlyosagya mu kihugo kyeꞌMiisiri.
Kundu kwokwo, mugaki gooka, mu kushubi tuula mu maheema,
nga kwo mwâli kizi gira ku siku ziinyu ngulu.
11 Nâli kizi ganuula naꞌbaleevi,
nanakizi mùyigiriza ku njira yaꞌmabone.
 
12 «Halikago, abandu beꞌGiryadi boohe, balyagagi banangora-mabi,
banali ba busha-busha.
Kundu bagweti bagatanga amatuulo geꞌshuuli i Girigaali,
halikago ututanda twabo tugahongoka,
tunasigale nga mbongolo mu ndalo.»
 
13 Yakobo akatibitira mu kihugo kyeꞌHaraamu.
Neꞌyo munda, anakolerana, gira lyo alonga umukazi.
Ee! Âli kizi ragirirana ibibuzi lyo amúgonda.
 
14 Ha nyuma, Nahano anakoleesa umuleevi mu kulyosa Abahisiraheeri mu kihugo kyeꞌMiisiri.
Na ku njira yoꞌyo muleevi, Rurema anakizi balanga.
 
15 Si yabo beene Hifurahimu, banayagaza Nahano bweneene, mu kukizi yitana,
banakizi múgayiriza.
Kyo kitumiragi Nahano agabahaniiriza hiꞌgulu lyeꞌbyaha byabo.