13
Yaho keera, ikyanya Hifurahimu âli kizi deta,
abaabo booshi bâli kizi múyoboha, iri banajuguma.
Mukuba, yabo ye wâli kuliiri abaabo.
Halikago, ikyanya bakatondeera ukuyikumba umuzimu Baali,
lyo bakayiji yikululira ulufu.
Na buno, beene Hifurahimu bagenderiiri ukuyifunda mu byaha,
mu kukizi yitulira imigisi mu harija.
Bâli kizi koleesa ubuhinga naꞌmaboko gaabo,
banakizi deta: «Iyo migisi, mukizi gitangira amatuulo!»
Banadete kandi: «Iyi migisi yeꞌnyana, mukizi ginyunyuguta!»
 
Yabo bandu, bwo bakagiraga kwokwo, baganyerera nga luuta lwa shesheezi,
banamale nga kimi, ku kyanya izuuba liri mu tunduuka.
Bagayeluulwa nga byula ha kiyeluuliro.
Banabe nga kyusi, íkiri mu huluka imbuga mu kulenga ha kaazo.
 
«Mumenyage kwo ho nꞌgamùlyokeza mu kihugo kyeꞌMiisiri,
nie Nahano Rurema winyu.
Ndaanaye gundi Rurema, átali nienyene.
Ndaanaye gundi Lukiza ye mugweti.
Ikyanya mwâli riiri mwiꞌshamba, lyâli yumuusiri, halinde abandu banakizi nyooterwa.
Kundu kwokwo, nâli kizi mùkuya-kuya bweneene.
 
«Haliko, ikyanya nꞌgamùheereza ibyokulya, mwanayiguta.
Haahago, mwanatondeeza ukuyikangaata, mwanayami nyibagira lwoshi-lwoshi.
Ku yukwo, ngola ngamùteera nga ndare.
Ninamùtegeere ku njira nga ngwi.
Ninamùjanganule-janganule, nga nyamiishwa ndangi íyanyagwa abaana baayo.
Ninamùmiranguse nga ndare,
Ninamùgire buvungu-vungu nga nyamiishwa ya mu kishuka.
 
«E Bahisiraheeri, si mukola mugashereezibwa!
Kundu nie mutabaazi winyu, haliko nienyene nie gamùshereeza.
10 Aahago! Mwami winyu ali hayi?
Lekagi, abe ye gayiji mùkiza!
Mu kihugo kiinyu, abatwali biinyu bali hayi?
Si mwenyene mukambuuna bo, ti:
“Utuheerezagye mwami kuguma naꞌbatwali biitu.
11 Kyanatuma ngamùheereza mwami,
haliko kukaba ku buraakari bwani.
Uyo mwami, ku bwobwo buraakari, nanashubi yiji múlyosa.”
 
12 «Yabo beene Hifurahimu, amabi gaabo gakola masingule mu kihinda.
Ibyaha byabo, bikoli balindiriziizi ikihano.
13 Bakoli gweti bagalyanirwa, nga mukazi úkola mu liibwa noꞌmukero.
Banali kandi nga mwana muhwija.
Uyo mwana, si ikyanya kyoꞌkubutwa ali mu lahira ukuhuluka mu nda ya nyina!
14 Yabo bandu, ka ngwiriiri nyiji bakiza mu shinda?
Ka mbakize na Narufu? Nanga, maashi!
E Narufu! Uleetage ikiija!
Na naawe, e Nakuzimu! Uyiji bashereeza!
Ee! Ndagaki babonera kandi ulukogo!* 13.14 1 Bakorindo 15.55.»
 
15 Yabo Bahisiraheeri, bo bagendukiirwi bweneene mu bandu beꞌgindi milala!
Kundu kwokwo, Nahano agavyula ikihuhuuta ukulyoka isheere.
Kigahuluka mwiꞌshamba, kinayiji kamya ibirigo byalyo.
Kiri neꞌshyoko zaalyo zinayume.
Yabo Bahisiraheeri, ibihinda byabo byoshi, agabishereeza ngana-ngana.

*13:14 13.14 1 Bakorindo 15.55.