6
Rurema ahamagala Hisaaya kwo abe muleevi
1 Mu mwaka gwo mwami Huziya akafwa kwo, lyo nâli riiri mu mabone. Nanalangiiza Nahano abwatiiri ku kitumbi kyeꞌkyami, kyanâli shuumiri bweneene! Ikanju lyage lyâli kizi lembeera mu nyumba yage yoshi. 2 Na hiꞌgulu lyage, hâli riiri ibiremwa íbilangashiini! Ngiisi muguma âli hiiti ibyubi ndatu. Ibyubi bibiri, byâli bwisiri amalanga. Neꞌbindi bibiri, byâli bwisiri amagala. Neꞌbindi bibiri, byo bâli kizi balala mwo. 3 Yibyo biremwa, byâli kizi koobezania kwokuno:
«Nahano woꞌbushobozi bwoshi ali mweru bweneene!
Ee! Ali mweru! Ali mweru!
Ikihugo kyoshi kiyijwiri mwoꞌbulangashane bwage.* 6.3 Bwigule 4.8.»
4 Yago mazu gaabo gâli kizi juguuvya indaliro zeꞌnyumba ya Nahano, halinde iyo nyumba yanayijula mweꞌkyusi.† 6.4 Bwigule 15.8.
5 Iri nꞌgabona kwokwo, nanadeta: «Ala nie! Si leero ngola ngashereera! Si akanwa kaani kayulubiiri. Naꞌbandu bo tutuliinwi, nabo utunwa twabo tuyulubiiri. Kundu kwokwo, keera nayibonera Umwami. Ye na Nahano woꞌbushobozi bwoshi!»
6 Yabo baganda, muguma wabo anambalalira kwo, afumbiiti ulubaazi úluli mwiꞌkala lyoꞌmuliro, lyo alyosa ku katanda.
7 Lyeryo lirya ikala, analindeeza ku kanwa, anambwira kwokuno: «Lolaga! Yiri ikala, bwo lyalenga ku kanwa kaawe, ibyaha byawe keera byakogwa, bitanakiri ho.»
8 Ha nyuma, nanayuvwa Nahano adeta kwokuno: «Nyandagi ye ngaatuma? Nyandi úgatugendera?» Naani, ti: «Ndi hano, e waliha! Mbe nie ugaatuma.»
9 Nahano anambwira, ti: «Yaba bandu, ugendi babwira kwokuno:
“Ukuyuvwa, mugakizi yuvwa. Haliko mutâye sobanukirwe!
Ukulola, mugakizi lola. Haliko, mutâye bone!‡ 6.9-10 Luka 8.10; Mikolezi 28.26-27.”
10 Yaba bandu, ukizi yumuusa imitima yabo!
Naꞌmatwiri gaabo, ukizi gaziba.
Naꞌmasu gaabo, ukizi gabwikira.
Buzira kwokwo, hali ikyanya amasu gaabo gangalonga ukubona.
Naꞌmatwiri gaabo ganalonge ukuyuvwa.
Naꞌmenge gaabo ganalonge ukusobanukirwa.
Kwokwo, lyo bangangalukira, mbu balongage ukukira.§ 6.10-11 Mataayo 13.14-15; Mariko 4.12; Yohana 12.40.»
11 Nanabuuza: «E Nahamwitu, yibyo byoshi, ngwiriiri ukukizi bigira, halinde mangoki?» Naye, ti:
«Ukizi giraga kwokwo,
halinde ku kyanya utwaya twabo tugaaba tusigiiri mushaka.
Neꞌnyumba zaabo, zinasigale biguuka.
Neꞌkihugo kyabo kinasherebere lwoshi-lwoshi.
12 Balya bandu, nie Nahano ngabayimula hano, bagendi beera i mahanga.
Kino kihugo kyabo kyohe, kigasigala mushaka.
13 Yikyo kihugo, kundu kyangasigiiri mwaꞌbandu nga kihande kiguma kiꞌkumi,
si kigaki shubi shereezibwa ngana!
Yabo Bahisiraheeri bagaaba bakola nga kiti kyoꞌmwalooni,
ku kyanya kyakubwa, kinasigalire ku naludakwe.
Kwokwo yabo bandu nabo, bagasigala nga naludakwe.
Uyo naludakwe agaki mina kweꞌshibwe litaluule.»