5
Ulwimbo lweꞌndalo yeꞌmizabibu
1 Ngayimbira umukundwa wani ulwimbo, hiꞌgulu lyeꞌndalo yage yeꞌmizabibu:
Ee! Âli hiitagi indalo yeꞌmizabibu, ku higangazi íhiri kweꞌnagiira.*5.1 Mataayo 21.33; Mariko 12.1; Luka 20.9.
2 Iyo ndalo, âli kizi girima, anagilyose mwaꞌmabuye gooshi.
Ha nyuma, anafulika mweꞌmilandira miija yeꞌmizabibu.
Ha kati keꞌyo mizabibu, anayubaka hoꞌlwingo lwoꞌkukizi neekera kwo,
anahumba na mweꞌkishimo kyoꞌkukizi kandira mwo.
Analindirira kwiꞌyo milandira itongeke kweꞌmizabibu miija, shoobe!
Yanakizi tongeka naaho kweꞌmizabibu milulu.
3 Kwokwo, uyo mukundwa wani anadeta: «Mwe batuulaga beꞌYerusaleemu, naꞌbeꞌBuyuda! Mwe bakongwa mwe!
Mututwirage ulubaaja, twe neꞌyo ndalo yani yeꞌmizabibu.
4 Iyo ndalo, nâli kizi gikuya-kuya.
Emwe! Ndaakwo kundi kwo nâli kwiriiri ukugigirira.
Njubi langaliiri kwo igatongeka kweꞌmizabibu miija.
Halikago, shoobe! Imizabibu íyatongeka kwo, kiri kiiza kyayo naaho.
5 «Iyo ndalo yani, buno ngolaga ngamùbwira ngiisi kwo ngagigira.
Ngahongola inzitiro zaayo, halinde inasherebere,
naꞌbandu banakizi gilibata-libata mwo.
6 Ee! Iyo ndalo, ngagisivya lwoshi-lwoshi.
Imizabibu yamwo, itâye ki yahulirwe, kandi iri kuyufirirwa.
Igaamera naaho mweꞌmigenge neꞌmihanda-njovu.
Nganahangika ibibungu, bitaginiekeze invula.»
7 Iyo ndalo yeꞌmizabibu, gulyagagi mulala gwaꞌBahisiraheeri. Neꞌmizabibu miija, bali bandu beꞌBuyuda.
Nahano woꞌbushobozi bwoshi ye mwene yo, anâli gikuuziri bweneene.
Yabo bandu, Nahano âli loziizi kwo bakulikirage imaaja zaage,
banatuule ku njira íkwaniini.
Si bâli kizi yamiza-yamiza naaho, mu kukomeresania,
iri banakizi yitana.
Nahano agaahana ikihugo kyeꞌBuyuda
8 Yayewe imwinyu, mwe mugweti mugagaaza inyumba ku zaabo,
munali mu kizi gaaza indalo ku zaabo.
Si abiinyu booshi, keera mukabahavya mu kihugo,
munakoli kisigiiri mwo mwenyene!
9 Nayuvwa kwo Nahano woꞌbushobozi bwoshi ambwiraga kwokuno:
«Yizo nyumba, kundu ziryagagi nyiija, si zigasigala biguuka!
Na kundu ziri mbamu, zinalimbisiibwi,
haliko, zigasigala mushaka, buzira bandu.
10 Ihekitaari zishatu zeꞌndalo yeꞌmizabibu,
zigakizi kandwa mweꞌlitiri makumi gataanu naaho zeꞌdivaayi.
Ngiisi úgakizi byalaga ibitigiri ikumi byeꞌmbuto zeꞌngano,
agakizi yimbula ikitigiri kiguma naaho.»
11 Yayewe, imwa ábali mu zindukiri vyukira mu bilalusa,
banali mu kizi yiza ku divaayi, halinde banalaluke lwoshi-lwoshi!
12 Ikyanya bali mu kizi yilala mu bitali nga byo,
bali mu ba bashambiiri, mu kukizi ziha ikinubi, neꞌnzeeze,
banalase neꞌngoma, neꞌmiteera-teera.
Kundu kwokwo, ngiisi byo Nahano ali mu kizi gira, batabitwaziizi.
Kiri na yenyene, batanamútwaziizi.
13 Abahisiraheeri, bwo batanyiji, kyo kitumiri bagatwalwa imbohe.
Abatwali baabo, kiri naꞌbagunda booshi, bagayuvwa umwena,
bananyoterwe, halinde banakizi fwa.
14 Kwokwo, bakoli balindiriiri i nakwere,
keera yanayashuula akanwa kaayo.
Iyo munda i nakwere, abanalushaagwa beꞌYerusaleemu, kiri naꞌbagunda,
booshi bakoli lindiiri ukumanukira yo,
kuguma naꞌbalalwe booshi ábagweti bagaagira akalugi.
15 Abandu booshi bagaki biikwa haashi.
Kiri naꞌbanabwikangaate booshi, nabo, bagaki teezibwa ishoni.
16 Nahano woꞌbushobozi bwoshi agakizi twa imaaja ku njira íkwaniini,
kinatume agakizi huuzibwa.
Ee! Rurema agakizi gira íbikwaniini,
mu kuyerekana kwo ali Mweru bweneene.
17 Haaho, abandu baage bagaaba nga bibuzi,
binakizi liisa ngiisi ho biloziizi.
Kiri neꞌbyanabuzi bigayiloogeza ibyokulya haahalya mu biguuka.
18 Yabo bandu, yayewe imwabo!
Si ibyaha byabo, bibayizingiiri kwo!
Bagweti bagakizi yikululira umwama,
nga bandu ábali mu kululwa noꞌmugozi.
19 Si bakola mu naakira Rurema kwokuno: «E Nahano, uvwarukage!
Ngiisi byo ukatulagaania, ubigirage, gira tubiyibonere.
Bwo uli Mutaluule waꞌBahisiraheeri,
ukwizagye ishungi zaawe, gira nyiitu tuzimenye.»
20 Yayewe imwa ngiisi ábakola mu deta kwaꞌmabi go miija,
na kwaꞌmiija go mabi!
Banadesiragi kweꞌkihulu gwoꞌmulengeerwe,
na kwoꞌmulengeerwe kyo kihulu.
Banadesiri kweꞌbilulu byo binunu,
na kweꞌbinunu byo bilulu.
21 Yayewe imwa ngiisi ábakola mu yitoneesa
kwo bo bitegeereza, na kwo bo benge.
22 Yayewe imwa ábali mu kizi gotomera idivaayi, wa guti-guti!
Banagweti bagatindika amaavu ku bukalage.
23 Si abanamahube bali mu kizi balekeerera, gira lyo balonga ikitulire.
Kiri na ábakwaniini, bakola mu bayima ukuli kwabo.
24 Keera bakajanda amigirizo ga Nahano, anali ye Mwene Ubushobozi.
Ee! Kundu Umutaluule waꞌBahisiraheeri agweti agaadeta, si batamútwaziizi.
Ku yukwo, bagashereezibwa ngana,
nga kwoꞌmuliro guli mu boyola ikishuka.
Bagaaba nga mbuto yeꞌmizi ikoli boziri,
na nga kwoꞌtwaso, tuli mu yehuulwa nga lukungu.
25 Nahano akoli rakariiri abandu baage,
anakoli bangwiri ukuboko kwage, gira abahane.
Kiri neꞌmigazi ikoli gweti igajugumbana.
Neꞌbirunda bikoli luuzirwi mu njira ngiꞌjolera.
Kundu kwokwo, ubute bwa Nahano buki yasiri.
Akoli bangwiri ukuboko kwage, gira ahaniirize abandu baage.
26 Nahano alengeziizi irembera,
gira alonge ukukema ibinyamahanga.
Anali mu balakiza uluguuju,
gira abagoma bayijage ukulyoka mu mbeka zeꞌkihugo.
Lolagi! Yabo bagoma, bagweti bagatuyijira mulindi-mulindi!
27 Mu kati kaabo, ndaaye úluhiri, ndaanaye úgweti úgasiitara.
Ndaanaye úli mu tendera, kandi iri ukuhunira.
Imikaba yabo, ibagwasiri bwija.
Neꞌmigozi yeꞌbiraato, itatwisiri.
28 Imyambi yabo ishongosiri bweneene,
keera banagifwora mu miheto yabo.
Ibinogosho byeꞌfwarasi zaabo, biri bikomu nga mabuye.
Naꞌmapine gaꞌmagaare gaabo giꞌzibo, gali mu kizi suula umulindi nga munyaga.
29 Abasirikaani baabo bagweti bagayamiza-yamiza.
Bali mu lunduma nga ndare ndangi.
Ikyanya bali mu gwata abandu imbohe, bali mu bahunguukana.
Ndaanaye úgabahangirira, mbu batazitwale hala.
30 Yulwo lusiku, bagalundumira abagoma,
nga midunda ígweti igayibirindula mu nyaaja.
Hooshi mu kihugo, abandu bagaabona ikihulu naaho naꞌmalibu.
Umulengeerwe gugayidika mweꞌkibungu.