4
1 Hâye ki be ulusiku, abakazi balinda bagakizi fyedekania umushosi muguma, ti:
«Ewe! Ibyokulya neꞌbyambalwa, byohe, tugakizi biyigulira twengwa.
Si byo tuloziizagi naaho, utuyange, maashi!
Utushaagize ishoni, we kongwa we!»
Akaaya keꞌYerusaleemu kagashubi gashaanirwa
2 Ku yikyo kyanya, mu kihugo, Nahano agaameza mweꞌshibwe liija, linabe lyoꞌbulangashane. Ee! Abahisiraheeri ábagaaba basigiiri, bagakizi siima ibitumbwe byalyo, banabiyihayire. 3 Ábasigiiri i Yerusaleemu bagakizi detwa Bataluule. Naꞌmaziina gaabo, ganabe gayandisirwi mu kitaabo kya ábali bagumaana i Sayuni. 4 Abakazi baꞌkaaya keꞌYerusaleemu, kundu bâli kizi yifunda mu bitalaalwe, haliko Nahano agaki bayeruusa. Na kundu umuko gukayoneka bweneene mu yako kaaya, agaki kashuka. Ee! Agashuka i Yerusaleemu ku njira íkwaniini, kiri na ku yoꞌmuliro.
5 Ha nyuma, Nahano agabwikira umugazi Sayuni, kuguma naꞌbandu booshi ábagukumaniri kwo. Emwe! Mwiꞌzuuba, agaleeta ikibungu kyeꞌkyusi. Na bushigi, analeete umuliro, halinde ubulangashane bwa Nahano bunakizi ba kibwikwa.*4.5 Kulyoka 13.21; 24.16. 6 Yikyo kibwikwa, kigabasiika ku kyanya kiꞌzuuba. Kiri na ku kyanya kyeꞌnvula, na ku kyeꞌkihuhuuta, bagalonga ubutibitiro, gira bakizi yibisha mwo.