3
Mu kihugo kyeꞌBuyuda mwaba akamburugu
1 Lolagi! Ibindu bya mu kihugo kyeꞌBuyuda, kiri neꞌbya mu kaaya keꞌYerusaleemu,
Nahano Rurema woꞌbushobozi bwoshi, agaki bisivya.
Abandu batanaki be noꞌbulyo bwoꞌkulonga ibyokulya, kandi iri miiji.
2 Mu yako kaaya, mutagaki boneka ibikalage,
kandi iri abasirikaani, kandi iri abatwi beꞌmaaja,
kandi iri abaleevi, kandi iri abalaguza, kandi iri bashaaja,
3 kandi iri abakulu baꞌbasirikaani, kandi iri abakulu boꞌtwaya,
kandi iri abahanuuzi, kandi iri abanamaleere,
kandi iri abafumu ba kaminuuza.
4 Nahano adetaga kwokuno:
«Ngayimika abaana beꞌkitaba, babe bo bagakizi mùtwala.
Ee! Yabo baana, baba bahwija, si bagakizi ba batwali biinyu naaho!»
5 Abandu bagakizi libuzania,
halinde ngiisi mundu anakizi hagana noꞌmutuulani wage.
Imisore, igakizi shundeeza abashaaja,
noꞌtufwa-busha, tugakizi shundeeza abanalushaagwa.
6 Ku yikyo kyanya, umundu agakizi bwira mwene wabo ye babutanwa:
«Si we ki hiiti ibyambalwa. Aahago! Ube we gaaba mutwali witu.
Bino biguuka, we kolaga ugabiyimangira!»
7 Halikago, uyo mwene wabo, agabanaakira kwokuno:
«Hafe! Ndaako kamaro ko nimùhitiiri!
Si mu mwani, ndahiiti ihiteerwa ku shinda,
hiba hyokulya kandi iri hyambalwa.
Ku yukwo, bitangaziga kwo munyimike, mbe mutwali winyu!»
8 Abandu beꞌYerusaleemu, bakola mu siitara.
Abandu beꞌBuyuda, bakola mu kizi gwa haashi.
Mukuba, bagweti bagahagana na Nahano yenyene,
mu kukizi deta íbitali nga byo, na mu kukizi gira amabi.
Kundu Nahano alyagagi woꞌbulangashane,
si bagweti bagamúgayiriza.
9 Ikyanya umundu ali mu lola ku malanga gaabo,
anayami menya kwo bakoli yifuuziri mu byaha.
Birya byaha, batali mu bibisha abaabo.
Na bwo batali mu bibisha, bakola nga bandu beꞌSoodoma.
Yayewe imwabo! Si bongwa bagweti bagayikululira umwama!
10 Ngiisi ábakwaniini, ugendi babwira kwo bagagenduukirwa.
Ee! Ngiisi byo bagweti bagahimbukira kwo, bâye bilongere kweꞌmbembo.
11 Halikago banangora-mabi, boohe, yayewe imwabo!
Bagaahanwa, ukukulikirana naꞌmabi gooshi go bâli kizi kola.
12 Ibirongoozi byanuke, bo bakola mu ndibugiza abandu baani.
Si abakazi bo bakoli batwaziri!
E bandu baani, si abimangizi biinyu keera bakamùhabura,
mutanakiri mu gira íbikwaniini.
Nahano ahana abimangizi baꞌbandu baage
13 Nahano akola ibiringiini ukutwa imaaja.
Akoli yimaaziri, gira ahane abandu baage.
14 Agweti agalega abashaaja, kuguma naꞌbandi bimangizi baꞌbandu baage kwokuno:
«Si mwe mukashereeza Abahisiraheeri, banali nga ndalo yani yeꞌmizabibu.
Mu nyumba ziinyu, muyijwiri ibindu byo mukanyaga abakeni.
15 Aahago! Kituma kiki mugweti mugavindagaza abandu baani,
halinde banabe banakahuku?»
Kwokwo, kwo Nahano Rurema woꞌbushobozi bwoshi adesiri.
Ihano imwaꞌbakazi beꞌYerusaleemu
16 Nahano adetaga kwokuno:
«Abakazi beꞌYerusaleemu, bagweti bagayikangaata.
Ehee! Amagosi gaabo, bali mu genda bagabangalaziizi.
Amasu gaabo, gagweti gagakizi kimura, mu kuyeruzania.
Banali mu kizi genda ku mulimbo,
iri banalasa amayunga ku magulu gaabo.
17 Kundu kwokwo, nie Nahano ngaleeta imbala mu mishaku yabo.
Na ngolaga ngakunguula amatwe gaabo.»
18 Balya bakazi beꞌYerusaleemu, baloziizi ukuyilimbiisa. Kyo kitumiri bali mu kizi yambala imigufu yeꞌnooro mu magosi gaabo. Kundu kwokwo, ku yikyo kyanya, Nahano agabanyaga byoshi-byoshi, ngeꞌngolo za ku magulu, neꞌmirondo yeꞌkituku-tuku, neꞌmibano yeꞌmishaku, 19 neꞌmbete za ku matwiri, neꞌngolo, neꞌnjungi, 20 neꞌbihunika, neꞌmigufu ya ku kigeregere, neꞌmikaba íkalukwa, neꞌbiheeko, noꞌlushumbi, 21 neꞌmbete za ku minwe, neꞌza kwiꞌzuulu, 22 neꞌbyambalwa íbilimbiri, naꞌmakanju, noꞌmwingiro, neꞌndaha zoꞌkuhagata, 23 neꞌbilolero, naꞌmakanju miija, neꞌmirondo yoꞌkusoosa kwiꞌtwe, neꞌmirembeezo ya kwingi-kwingi.
24 Ho bangakizi huumura amalaasi, bagakizi baya akatuuru.
Na ho bangabiiri bayambiiti umukaba mwija,
bagakizi shweka umugozi.
Na ho bangabiiri bashanuziizi umushaku bwija,
bagakizi mwebwa imbala.
Na ho bangabiiri bayambiiti imirondo yoꞌmulimbo,
bagakizi yambala amasuuzu.
Na ho bangabiiri banonosiri bweneene,
bagasigala batetiirwi neꞌshoni.
25 Abashosi biinyu bakola bagayitwa ku ngooti.
Kiri naꞌbasirikaani biinyu, banaminikwe mwiꞌzibo.
26 Kwiꞌrembo lyaꞌkaaya, abandu bagakizi liruuka bweneene.
Abakazi bagakizi yivuruguuza mu luvu,
nga bandu keera ábashahulwa ibindu byabo byoshi.