2
I Yerusaleemu, kali kaaya koꞌmutuula
(Mika 4.1-3)
1 Yaga mabone, gadesiri hiꞌgulu lyeꞌkihugo kyeꞌBuyuda, na hiꞌgulu lyaꞌkaaya keꞌYerusaleemu. Hisaaya, mugala Hamoozi, ye kagabona.
2 Mu siku zeꞌmberuuka, umugazi úguyubasirwi kweꞌnyumba ya Nahano,
gwo gwâye gingikwe ukuhima igindi yoshi.
Gwâye shuume bweneene, ukuhima utugangazi twoshi,
halinde aba mu mahanga gooshi banakizi gushololokera.
3 Yugwo mugazi, abingi baabo bagakizi guyija kwo, iri banadeta:
«Muyije tuzamuukire ku mugazi gwa Nahano,
halinde mu nyumba ya Rurema wa Yakobo!
Mango twahika, agatuyigiriza injira zaage,
halinde tukizi zikulikira.»
Iyo munda i Sayuni, yaꞌmigirizo hiꞌgulu lya Nahano gagakizi lyoka.
Ee! Igambo lya Nahano, haaho i Yerusaleemu ho tugaliyigirizibwa.
4 Yibyo binyamahanga, Nahano agakizi bihambuula,
halinde banatuule mu kati koꞌmutuula.
Ingooti zaabyo, zigaatulwa mweꞌfuka zoꞌkuhinga.
Kiri naꞌmatumu, gagaatulwa mweꞌmigushu.
Ndaagwo mulala úgugaki gendi lwisa ugwabo,
batanâye ki yikomereze kwiꞌzibo.*2.4 Yuheeri 4.10.
5 E beene Yakobo, muyijage,
tukizi genda mu mulengeerwe gwa Nahano!
Mumenye kwo tugatwirwa ulubaaja
6 E Rurema, yabo beene Yakobo, kundu balyagagi bandu baawe,
haliko keera wabajandirira.
Keera bakanayahukirwa naꞌmahimba mabi gaꞌbandu beꞌsheere,
banakola mu kizi laguza ngaꞌBafirisiti.
Si bakola mu koomerana neꞌbinyamahanga!
7 Mu kihugo kya beene Yakobo, inooro neꞌharija bikiri mwo yondo-yondo,
halinde ibihinda byabo biyijuliiri.
Bahiitagi neꞌfwarasi kandaharuurwa.
Kiri naꞌmagaare gaabo giꞌzibo, galuguusiri ngana.
8 Kuguma na yibyo, kirya kihugo kiyijwiri mweꞌmigisi.
Iyo migisi, kundu abandu bakagiyibaajira naꞌmaboko gaabo boonyene,
haliko baki gweti bagakizi giyikumba!
9 Yabo bandu bagaki teezibwa ishoni, banateteerwe.
E Rurema, utakolwe kwo wabakoga kiri neꞌhiniini!
10 Aahago! Mugendi yifunda mu nyaala,
munayihumbire imihobo, gira muyibishe uburaakari bwa Nahano!
Si Nahano ali wa kukangana!
Noꞌbushobozi bwage, buli bwaꞌkahebuuza.†2.10 Bwigule 6.15; 2 Batesaloniki 1.9.
11 Hâye ki be ulusiku, lwo Nahano naaho ye gakuzibwa!
Si abanabwihemye boohe, bagabiikwa haashi.
Ee! Abanabwikangaate bagakizi goka mu kati keꞌshoni.
12 Ngiisi ábagweti bagayikuza,
mu lwolwo lusiku, Nahano woꞌbushobozi bwoshi agabahana, anabatindimaze.
13 Ingaaja-malungu zooshi zeꞌLebanooni, kundu ziryagagi nyila,
haliko agazikuba.
Agaakuba neꞌbiti bihamu byoshi byeꞌmyalooni yeꞌBashaani.
14 Agasemania utunywangi-nywangi twoshi tweꞌmigazi,
kuguma noꞌtugangazi tula twoshi.
15 Anahongolage neꞌnyingo nyila zooshi,
kuguma neꞌnzitiro zooshi, kundu ziri ngomu.
16 Kiri naꞌmashuba gooshi, kundu galimbisiibwi bweneene,
agagashereeza.
17 Ku kirya kyanya, Nahano naaho ye gakizi huuzibwa.
Si abanabwikangaate boohe, bagatindimazibwa,
banagoke mu kati keꞌshoni.
18 Kiri neꞌmigisi yabo yoshi inamale.
19 Ikyanya Nahano agayiji jugumya ikihugo,
agakangana ku bulangashane bwoꞌbukalage bwage.
Haahago, abandu banagendi yifunda mu nyaala,
banahumbe neꞌbishimo, gira bagendi yibisha mwo.
20 Kundu abandu bâli mali tula imigisi mu harija, na mu nooro, haliko yulwo lusiku, iyo migisi igagendi kabulirwa áhali imbeba na banajoojo. 21 Ikyanya Nahano agayiji jugumya ikihugo, abandu bagagendi yibisha mu nyaala, na mu bishimo. Bagaaba baloziizi ukutibita uburaakari bwage, kiri noꞌbulangashane bwage.
22 Aahago! Kituma kiki muki gweti mugabiika umulangaaliro ku bandu?
Si booshi bagaafwa!
Aaho! Kuti kwo bangaki mùtabaala?