15
Rurema agashereeza i Mohabu
1 Ino ndumwa ya Rurema, iri hiꞌgulu lyeꞌkihugo kyeꞌMohabu.
Akaaya keꞌHari naꞌkeꞌKiiri, twombi tukashaabulwa,
twanayami shereezibwa mu bushigi buguma naaho.
2 Abamohabu booshi, ikyanya bakabona íbikakoleka ku bandu beꞌNebo naꞌbeꞌMedeba,
banayami banda akashiba, ti yoho wee!
Abandu beꞌDibooni, bagenda mu nyumba yeꞌmizimu yabo,
gira bagendi lirira mwo.
Yabo booshi keera bakunguulwa imishaku, kiri neꞌnyanwa.
3 Yabo bandu bakola mu genda mu njira bayambiiti amasuuzu,
mu kuyerekana umwizingeerwe.
Mu ngiisi nyumba, kiri na mu lubuga lwaꞌkaaya,
Abamohabu bakola mu nduulu.
4 Abandu beꞌHeshibooni, naꞌbeꞌHereyale, nabo bakola mu bululuka.
Amazu gaabo gakola mu yuvwikana hala, halinde mu kaaya keꞌYahasa.
Balya Bamohabu, kiri naꞌbasirikaani baabo, bakoli shengusiri,
banakola mu banda akashiba!
5 Yabo Bamohabu, umutima gwani gukoli jengiirwi hiꞌgulu lyabo.
Keera batibita halinde i Sowari, kiri neꞌHegulaati-Sherishiya.
Banakola mu zamuukira i Luhiti, iri banalira.
Bwo keera bakashereezibwa,
bakola mu genda i Horonayimu bali mu lira.
6 Kiri naꞌmiiji geꞌNimurimu gakoli kamiri.
Bweꞌmbuto mbishi zahangaluka, ikishuka kikoli yumagusiri.
Ndaakizo mbuto ízikiri mu mera.
7 Ibindu íbikoli sigiiri, abandu bakola mu bikuumania,
banabiseehere ku kyambu kyeꞌMyerebi.
8 Yaho hooshi mu kihugo kyeꞌMohabu, abandu bakola mu liruuka.
Yukwo kulira kwabo, kukoli hisiri halinde i Hegulayimu, kiri neꞌBeeri-Herimu.
9 Ulwiji lweꞌDibooni, lukoli yijwiri mwoꞌmuko.
Kundu kwokwo, Rurema agaki yushuulaga mweꞌkindi kihano.
Abamohabu ábasigiiri, bakola bagerwa naaho.
Kundu bakatee kira, haliko Rurema agaki batumira indare,
zibayilale mwo, zinabayite.