16
Ikihugo kyeꞌMohabu kyatabaaza i Yerusaleemu
1 Mwami weꞌYerusaleemu, mumútwalirage imirambu yeꞌbibuzi.
Bilenge mwiꞌshamba lyeꞌSeela, halinde bihike ku mugazi Sayuni.
2 Abakazi beꞌMohabu bakolaga nga tunyuni útukayimulwa mu ngisha zaatwo.
Banakoli loziizi ukujabuka ulwiji Harinooni, gira bashaage mu kihugo kyabo.
3 Yabo Bamohabu bakola mu bwira Abayuda kwokuno:
«Mututabaale, maashi! Mutubwirage ngiisi kwo tugaagira.
Mutulange naꞌbagoma biitu,
nga kweꞌkimbehwa kiri mu tulanga kwiꞌdaruule liꞌzuuba.
Mutubishage, mutanatuleke mu maboko gaꞌbagoma.
4 Twe Bamohabu, keera twayimulwa mu kihugo kiitu.
Aahago! Mutuhanguule tuyiji tuula mu kihugo kiinyu.
Utubishage na banangora-mabi.»
Twe Bamohabu, kundu bâli kizi tunyaga,
haliko yubwo bunyazi bugaki mala.
Ngiisi ábakiri mu tuvindagaza,
bâye himwe, banahere mu kihugo.
5 Haahago, lyoꞌmwami wa mwiꞌkondo lya mwami Dahudi agayija.
Ubutwali bwage bugasikama,
mukuba agakizi rongoora abandu bwija, na mu kati koꞌbwemeera.
Agakizi twa imaaja ku kuli,
iri anakulikiriza íbikwaniini.
6 Keera tukayuvwa kwaꞌBamohabu bali mu yikangaata,
na kwo bali banabihayo, banali mu gayirizania.
Kundu kwokwo, yubwo bwikangaate, bulyagagi bwa busha.
7 Buno balya Bamohabu, bakola mu lirira ikihugo kyabo.
Booshi bakola mu gongeera,
iri banayidula imikate íkagirwa mu mizabibu i Kiiri-Hareseeti.
8 Indalo zeꞌHeshibooni, na zeꞌShibima keera zashweshwetera,
zitanakiri mu yeza imizabibu.
Iyo mizabibu, si abatwali beꞌbinyamahanga keera bakagishereeza!
Ubwa mbere, yâli kizi landira kiri neꞌYazeeri,
na mwiꞌshamba hooshi, halinde inahike ku nyaaja.
9 Na bweꞌyo mizabibu yeꞌShibima isherebiiri,
yabo bandu beꞌYazeeri, tukola mu lirira kuguma.
Tunakola mu lirira kuguma naꞌbandu beꞌHeshibooni naꞌbeꞌHereyale.
Si batâye ki yimbule ibitumbwe,
batanâye ki bande akabuuli ku bushambaale!
10 Batagaki shambaala ku kisegengo.
Mu yizo ndalo zeꞌmizabibu, ndaakibwo bushambaale, kandi iri malega,
kandi iri kuyimba, kandi iri kubanda akabuuli.
Ndaanaye úkiri mu kanda ha kikandiro.
Batanakiri mu banda utubuuli, mukuba Rurema keera akabahulisa.
11 Umutima gwani gukola mu lirira ikihugo kyeꞌMohabu.
Ngolaga nga kinubi íkiri mu laka ku kigandaaro.
Ee! Umutima gwani gukola mu lirira akaaya keꞌKiiri-Heresi.
12 Abamohabu bagagendi lola imbeero zaabo kwiꞌrembo,
banagire mbu bagendi tabaaza imizimu yabo, shoobe!
Na kundu bagagenda mu mbeero zaayo,
si ndaaye úgaahasha ukubakiza.
13 Yago gooshi, Nahano âli mali gwanwa agaadeta hiꞌgulu lyeꞌMohabu. 14 Haliko buno, adetaga kwokuno: «Ha nyuma lyeꞌmyaka ishatu, balya Bamohabu bagasigala bandu bagerwa naaho, banabe tufwa-busha. Ngiisi byo bâli kizi yikangaata kwo, bikola bigashombwa bweneene! (Iyo myaka ishatu igakulikirana neꞌndagaano yo sheebuja âli mu kizi gira noꞌmukozi.)»