22
Amabone hiꞌgulu lyeꞌYerusaleemu
1 Ino ndumwa idesiri hiꞌgulu lyeꞌndekeera yaꞌmabone.
E Yerusaleemu, maki gano?
Si mweshi mukoli shoniiri ku nyumba!
2 Kituma kiki mugweti mugabanda akabuli,
na kituma kiki akaaya kali mwoꞌmulengo neꞌkisegengo?
Ee! Abandu baawe keera bakafwa, neꞌbirunda byabo bikoli kabuliirwi hooshi.
Kundu kwokwo, litali izibo írikabayita.
3 Abakulu biinyu booshi, bakatibita.
Kundu kwokwo, bakagwatwa mbira, buzira kulasha kiri noꞌmwambi.
Na ngiisi ábakagwanwa naꞌbagoma, banabiikwa mbohe.
Kiri na booshi ábâli mali toloka, nabo banagwatwa!
4 Kwokwo, namùbwira: «Abandu baani keera bakashereezibwa.
Aahago! Mundeke ngana ndee balirira ku kimombo.
Mutandwaze! Mutanagire mbu mumboleeze.»
5 Luno lusiku lwatutwisa indege ngana-ngana!
Nahano woꞌbushobozi bwoshi atubiisiragi mwaꞌkalugi,
anatushengusa lwoshi-lwoshi!
Mu ndekeera yaꞌmabone, abandu bagweti bagalibatana mwo.
Inzitiro zaꞌkaaya, keera bakazihongolera haashi,
banakola mu tabaaza imweꞌmigazi.
6 Abasirikaani beꞌHelamu naꞌbeꞌKiiri, bakolaga mu kuumana,
banakoli hagasiri imiheto neꞌsiribo.
Baguma bali mu genda mu magaare giꞌzibo, naꞌbandi ku fwarasi.
7 E Yerusaleemu! Indekeera zaawe, kundu ziryagagi nyiija,
haliko keera zikayijula mwaꞌmagaare giꞌzibo.
Na ábali mu gendera ku fwarasi, bakolaga kwiꞌrembo lyawe,
banakoli loziizi ukukuteera.
8 Inzitiro zoꞌkusiikira ikihugo kyeꞌBuyuda, keera zikayihongoleka haashi.
Mu siku za mbere, mwâli kizi langaalira ibilwaniiso,
mwanatibitira ho bisigwirwi, áhali mu detwa nyumba yoꞌLubako.*22.8 nyumba yoꞌLubako 1 Baami 7.2-5; 10.16-17.
9 Mwanagendi tanduula inzitiro zaꞌkaaya ka Dahudi,
gira mumenye ho mugazilingaania.
Mwanayijuza amiiji mu kirigo íkiri hiꞌfwo.
10 Ha nyuma, mwanalola inyumba zeꞌYerusaleemu,
mwanazihongolaga kwo, mbu mulonge amabuye goꞌkukania inzitiro.
11 Mwanahumbira ikindi kirigo ha kati keꞌbibambazi bibiri,
gira mulonge ukukuumania amiiji ga mu kirya kirigo kya mbere.
Kundu kwokwo, mutanatwaza Rurema,
anali ye wâli mali gwanwa ashungika ukulyokera keera kwo yibyo byoshi bigakoleka.
12 Ku yikyo kyanya, Nahano woꞌbushobozi bwoshi akamùbwira,
kwo muliruuke, munabululuke ku kimombo.
Munakunguulwe amatwe, munayambale amasuuzu,
mu kuyerekana kwo mukoli jengiirwi.
13 Haliko, lolagi buno! Si muki gweti mugashambaala,
iri munayilala mu bitalaalwe!
Munakiri mu baaga ingaavu neꞌbibuzi,
munalye inyama, iri munanywa neꞌdivaayi.
Munakiri mu deta, ti:
«Tukizi lya, iri tunanywa!
Si kusheezi tugaafwa!†22.13 1 Bakorindo 15.54.»
14 Nahano woꞌbushobozi bwoshi, keera anyereka
kwo kiri na ku lusiku lwo mugaafwa kwo,
gano mabi giinyu gatâye kogwe!
Kwokwo, kwo Nahano woꞌbushobozi bwoshi, adesiri.
Indumwa ya Rurema hiꞌgulu lya Sebuna
15 Mundu muguma, iziina lyage ye Sebuna, âli riiri mwimangizi weꞌbindu byeꞌbwami. Kwokwo, Nahano Rurema woꞌbushobozi bwoshi ananduma imwage kwokuno:
16 «E Sebuna, maki gano? Biki byo ugweti ugaagira?
Nyandagi úkakuhanguula kwo uyihumbire ishinda hano?
Aahago! Kituma kiki ugweti ugagiyibaajira mu luno lwala?
17 Ewe! Kundu uli mutasumbwa, Nahano agaki kugwata,
anakuzuuze-zuuze, anakushulugute.
18 Ee! Agakugonya-gonya, anakushulugute mu mbinga, nga kabumbu.
Yeyo munda, yo ugagendi fwira.
Amagaare gaawe giꞌzibo, kundu galimbiri,
haliko, gagasigala haaho.
Si ugweti ugajamburiisa inyumba ya nahamwinyu!
19 Kundu we twaziri, ngakushikula mu butwali bwawe.
Na kundu ukuziibwi bweneene, haliko, ngaki kutindimaza.
20 «Ku kyekyo kyanya, ngatumira umukozi wani Heryakimu mugala Hirikiya, 21 na nyabiire ikanju lyawe, ninamúyambike lyo. Ninamúyimike, mu kumúshweka umukaba gwawe. Agatwala ahandu haawe. Ye gaaba yishe waꞌbatuulaga beꞌYerusaleemu, kiri naꞌbeꞌBuyuda booshi.
22 «Ngamúsikiiriza noꞌlwiguzo lwaꞌkajumiro ka Dahudi. Iri angayigula ulwivi, ndaaye úwangaki luyigala. Neꞌri angaluyigala, ndaaye úwangaki luyigula.‡22.22 Bwigule 3.7.
23 «Uyo Heryakimu, ngamúsikamya ngana-ngana! Agaaba neꞌmisi, nga musumaari úgwakomerwa mu mbahwa ngomu. 24 Beene wabo booshi, abakulu, kiri naꞌbato, ye bagakizi sikamira kwo nga birugu íbyamanikwa ku musumaari muguma.»
25 Kundu kwokwo, Nahano woꞌbushobozi bwoshi adetaga kwokuno: «Yugwo musumaari, kundu gukakomerwa mu mbahwa ngomu, haliko gugaki tera. Ee! Hagaatama gunaliike, gunatibukire haashi. Kwokwo, ngiisi bindu íbikananikwa kwo, binashereezibwe.»