23
Indumwa hiꞌgulu lyaꞌkaaya keꞌTiiro
1 Ino ndumwa iri hiꞌgulu lyaꞌkaaya keꞌTiiro.
Mwe beene amashuba ágalyosiri i Tarasisi! Mugire mulire ku kimombo.
Si ibyambu byeꞌTiiro keera byashereezibwa!
Yako kaaya kakola mushaka.
Iyo myazi, mukatee giyuvwa mu kihugo kyeꞌKipuro, inali yoꞌkuli.
2 Mwe mutuuziri ku ngombe yeꞌnyaaja, na mwe badandaza beꞌSidooni!
Mutakizi deta-deta, si muhulikage naaho.
Indumwa ziinyu, zâli gweti zigajabuka mu banamuhirye beꞌnyaaja.
3 Mu kudandaza, bo bâli kizi leeta ingano ukulyoka i Miisiri.
Ee! Bâli kizi gula ingano ku ngombe yoꞌlwiji Niire,
banagendi giguliikiza ibinyamahanga.
4 E Sidooni, we kikalage kya mu nyaaja.
Kundu kwokwo, ufwagage ishoni!
Si inyaaja igateezibwa ishoni, nga mukazi úwayidesa, ti:
«Ndazindi yuvwa umukero gwoꞌkubuta,
ndanazindi shuusa umwana, aba woꞌbutabana kandi iri woꞌbunyere!»
5 Abamiisiri, ikyanya bagayuvwa ngiisi kwaꞌkaaya keꞌTiiro kashereezibwa,
bagashenguka ngana-ngana!
6 Mwe batuulaga beꞌmbande zeꞌTiiro,
mugalukire i Tarasisi, mugendi banda yaꞌkashiba.
7 E Tiiro, ka kwoku kwaꞌkaaya kiinyu kakolaga?
Si yaho keera, wâli kizi shambaala bweneene!
Abatuulaga baawe, si bâli kizi gendi dandaliza i mahanga!
8 Aahago! Yukwo kushereezibwa kwinyu,
nyandagi úkakushungika?
Abadandaza baawe, si bâli bagangambale nga baluzi,
banâli kizi gingikwa hooshi mu kihugo!
9 Úwashungika kwoku, ali Nahano woꞌbushobozi bwoshi.
Yaba bandu, kundu bâli kizi yikangaata,
haliko Rurema analooza ukubatindimaza.
Na kundu bâli gweti bagashaagwa,
halikago anashungika ukubateeza ishoni.
10 E bandu beꞌTarasisi, si mutaki hiiti ikyambu!
Leero, mukolaga mugakizi lima indalo ngaꞌBamiisiri.
11 Nahano keera akagolola ukuboko kwage ku nyaaja,
anajugumya amaami mu kihugo.
Anagweti agakyula kweꞌnzitiro zeꞌKaanani zihongolwe.
12 Nahano akadeta: «E bandu beꞌSidooni,
si keera mwasherebera, mutanâye ki shambaale!
Mukolaga nga munyere úwagumbiirwa.
Kundu mwangakoli jabukira i Kipuro,
haliko mutagalonga ho mugaluhuukira.»
13 Lolagi! Ikihugo kyeꞌBabeeri kituuziri kimaata, buzira bandu.
Abahasuriya keera bakakihindula libe gomberano lyeꞌnyamiishwa.
Bakatee yubaka inzitiro, banazikoleesa mu kukiteera.
Abasirikaani baabo, banayifundaga mu nyumba zoꞌmulimbo.
Na ngiisi byo bakagwana mwo, banabishahula.
Akaaya koonyene, bakakahongola, kanasigwa bikola biguuka.
14 Mwe bandu ba mu mashuba geꞌTarasisi!
Mubandage akashiba, bwaꞌkaaya kiinyu, kundu kâli kazitire, haliko keera kakahongolwa.
15 Ku yikyo kyanya, abandu bagaahisa imyaka makumi galinda bakayibagiiri. Ee! Iyo, yo myaka mwami angatuula ho. Ha nyuma, kalya kaaya kagaaba ngoꞌmukazi mushule, úli mu yimbwa kwokuno:
16 «E bulambe woꞌmukazi, we kayibagirwa!
Yabiiraga ikinubi kyawe, unazunguluke mu kaaya,
iri unaziha inyimbo nyiija-nyiija.
Uyimbe inyimbo za kwingi-kwingi,
lyo ulonga ukushubi kengeerwa.»
17 Abandu beꞌTiiro, mango iyo myaka makumi galinda yakwira, Nahano agabakejeerera lyo bagashubi kizi dandaza. Kundu kwokwo, bagashubi yifunda mu bwobwo bushule, kuguma naꞌbandu baꞌmahanga gooshi. 18 Ibindu byabo bitagaki lundwa mu bihinda. Si bigataluulwa mu bandu ba Nahano, gira bikizi baliisa, binakizi bayambika.