24
Amabone hiꞌgulu lyoꞌkusherebera kweꞌkihugo
1 Lolagi! Nahano akola agashereeza ikihugo, anakisige mushaka.
Naꞌbatuulaga baamwo, anabashaabule.
2 Hatagaki ba ulubibi ha kati koꞌmundu ngana, noꞌmugingi,
kandi iri ha kati koꞌmuja, na nahamwabo,
kandi iri ha kati koꞌmuja-kazi, na nabuja,
kandi iri ha kati koꞌmuguzi, na nakuguza,
kandi iri ha kati ka úwakaaba, na úwakaabana,
kandi iri ha kati ka úli mu yishuza umwenda, na úli mu guyishuzibwa.
3 Ikihugo kigashereezibwa, kishahulwe lwoshi-lwoshi.
Kwokwo, kwo Nahano adesiri.
4 Ikihugo kikoli yumagusiri.
Neꞌmbuto zooshi zikoli hangalusiri.
Abakulu ba kino kihugo bataki kaniri.
5 Abandu ábatuuziri mu kihugo, keera bakiyulubaza.
Bataki simbahiri imaaja za Rurema, batanaki mútwaziizi.
Kundu bakanywana ikihango na Rurema, kyanâli kyeꞌmyakuula,
haliko bakakihongola.
6 Kyo kitumiri ikihugo kikoli daasirwi.
Na ábakituuziri mwo, keera bakatwirwa ulubaaja kwo bahuba.
Yohoo! Bakola mu singooka!
Na ábakoli sigiiri bali bagerwa naaho.
7 Abandu booshi ábashubi shambiiri, buno bakoli jengiirwi.
Imizabibu keera yayumaguka, neꞌdivaayi yabulika.
8 Ingoma zitakiri mu laka.
Noꞌlujongo lwaꞌbanabitalaalwe keera lwamala.
Kiri neꞌnzeeze zitakiri mu zihwa ku bushambaale.
9 Abalalwe batakiri mu yimba,
kiri neꞌbilalusa byoshi keera byabalulira.
10 Akaaya keera kashereezibwa, kanashaka.
Inyumba zooshi zikoli hamisirwi, lyo zitashahulwe mweꞌbindu.
11 Abandu bagweti bagahuuna idivaayi mu njira.
Kundu kwokwo, amalega gooshi gakoli maziri.
Ikihugo kitaki shambiiri.
12 Akaaya kakoli sigiiri biguuka bimaata,
neꞌnyiivi zaako keera zavungulwa-vungulwa.
13 Mu kihugo kyoshi, abandu bakoli sigiiri bagerwa naaho.
Bakola mindeereka nga kiti kyoꞌmuzehituuni, kandi iri nga mizabibu,
ku kyanya biri mu ba keera byayimbulwa.
14 Kundu kwokwo, ngiisi ábasigiiri bagweti bagabanda akabuuli, awi yiyi yiyi!
Ábakola imuga, bagweti bagahuuza iziina lya Nahano.
15 Na ábali isheere, bagweti bagamúyivuga.
Yehe ye Nahano Rurema waꞌBahisiraheeri.
Iziina lyage, likizi huuzibwa kiri na mu bandu ba mu tulira.
16 Tuyuvwiti ngiisi kwo bagweti bagayimbira Nahano,
halinde ku mbeka zeꞌkihugo.
Banali mu deta: «Rurema ayivugwe, bwo ye kwaniini!»
Lyeryo, nanadeta: «Yayewe imwani! Yayewe imwani!
Ngoli hubagiiri! Ngoli hubagiiri!»
Ingulani zigenderiiri ukugulana!
Ee! Ingulani zigenderiiri ukugulana.
17 Mwe mutuuziri mu kihugo!
Buno, mukola imbere lyeꞌkihuumula, neꞌkishimo, neꞌmibashu.
18 Ikyanya umundu agayuvwa izu lyeꞌkihuumula,
anagirage mbu atibite, agagendi yihongoleka mu buhya.
Neꞌkyanya agalooza ukubulyoka mwo,
anayami bashwa mu mubashu.
Mwiꞌgulu, mugatibuka gobwe-gobwe.*24.18 Mwiꞌgulu, mugatibuka gobwe-gobwe. Kandi iri «Utwazo twa mwiꞌgulu tugayigulwa.» Kuli kudeta kugaaba kihuhuuta kandi iri mwijulire. Ndondeko 7.11; 8.2.
Na mu kihugo, indaliro zinajugumbane.
19 Ikihugo kikoli vunisiri.
Ee! Keera kyabereka, mu kujuguuvibwa.
20 Ikihugo kikola mu yifuka iyo munda neꞌyo munda nga mulalwe.
Kinakola mu jugumbana nga luhinda mu kihuhuuta.
Bwaꞌbandu keera bayifunda mu byaha bweneene, kikoli zidohiirwi.
Kwokwo, kikola bu gwa kifudeete, kitaganaki shubi jingirira.
21 Ku lwolwo lusiku, Nahano agahaniiriza abatwali ba mwiꞌgulu, anahaniirize kiri naꞌbaami ba mu kihugo. 22 Booshi bagakumanibwa kuguma, banalashwe mu nyumba yeꞌmbohe. Mwomwo, mwo bagashwekerwa imyaka mingi, halinde ku kyanya bâye twirwe kweꞌmaaja.
23 Ha nyuma, Nahano woꞌbushobozi bwoshi
ye gakizi twala i Yerusaleemu, ku mugazi Sayuni.
Abatwali beꞌYerusaleemu, bagayibonera ubulangashane bwage.
Yubwo bulangashane, bwo bulangashiini bweneene,
kinatume izuuba noꞌmwezi bigaboneka nga bifwifwitiiri.
*24:18 24.18 Mwiꞌgulu, mugatibuka gobwe-gobwe. Kandi iri «Utwazo twa mwiꞌgulu tugayigulwa.» Kuli kudeta kugaaba kihuhuuta kandi iri mwijulire. Ndondeko 7.11; 8.2.