25
Ulwimbo lwoꞌkuyivuga Rurema
1 E Nahano, we Rurema wani.
Ngweti ngakuhuuza, iri ninayivuga iziina lyawe.
Mukuba, ngiisi byo uli mu gira, biryagagi bya kahebuuza!
Wâli mali gwanwa wabishungika ukulyokera keera.
Na buno, bikola mu koleka.
2 Akaaya kaꞌbagoma, inzitiro zaako, keera zikahongolwa.
Na buno, ikoli sigiiri naaho ndundo yaꞌmabuye.
Ee! Kalya kaaya, kundu bakakayubakira inzitiro ngomu,
haliko, katakiri ho, katanâye ki yubakululwe.
3 Ibinyamahanga, kundu balyagagi banambamba,
haliko bakola bagakugingika.
Na kundu bali balangi, banatuuziri mu twaya twabo tuzitire,
si bagakizi kusimbaha.
4 Ikyanya abandu bakolaga noꞌbukaholwe, uli mu balanga.
Ee! Uli mu langa abakeni ku kyanya bakoli goozirwi.
Abagoma, ikyanya bakola mu bahonda-honda,
balyagagi nga kihuhuuta kikayu, íkiri mu yipukula ku kibambaazi,
kandi iri ngiꞌdugumbo yiꞌzuuba írigweti ligakizi babaza.
Kundu kwokwo, ukiri mu bakingira.
5 Yabo bagoma bakatuteera, ngiꞌzuuba likayu lya mwiꞌshamba.
Kundu kwokwo, ugweti ugabahangirira.
Uli nga kimbehwa kyeꞌkibungu, íkiri mu fwifwitiza izuuba.
Yabo bandu, kundu balyagagi banambamba,
banali mu yimba ku bwikangaate, si ugweti ugabahulisa.
6 Nahano woꞌbushobozi bwoshi agagirira abandu booshi
ulusiku lukulu ku mugazi Sayuni.
Ee! Agababaagira ibitugwa íbishishiri, binali neꞌnyama zeꞌbinyule,
anabazimaane neꞌdivaayi nunu bweneene.
7 Ku gwogwo mugazi Sayuni, Nahano agalyosa ikihunika íkyâli tumbikiiri abandu booshi,
kyanâli kizi bajengeeza.
8 Ee! Nahano Rurema agaamala ulufu, halinde imyakuula.
Na kundu abandu booshi bakiri mu lira ku migenge,
haliko iyo migenge, agagihotola ku malanga gaabo.
Na kundu bakateezibwa ishoni mu kihugo,
haliko yizo shoni, zigaamala.
Kwokwo, kwo Nahano adesiri.* 25.8 1 Bakorindo 15.54; Bwigule 7.17; 21.4.
9 Ku yikyo kyanya, abandu bagadetaga, ti:
«Rurema witu, uyo! Ye twâli lindiiri kwo agatukiza.
Na buno, keera atukiza.
Aaho! Tushambaale mu kati kaꞌmalega.»
10 Nahano agakizi langa i Yerusaleemu.
Si Abamohabu, boohe, agabahinyata-hinyata.
Bagaaba ngiꞌsukiro íri mu hinyatwa mwaꞌmashe geꞌngaavu.
11 Bagakizi lambuula amaboko, mbu bashaage mwo,
ngoꞌmundu úli mu yoga.
Kundu kwokwo, Nahano agaamala ubwikangaate bwabo,
kuguma neꞌmikolezi yabo mibi.
12 Inzitiro zoꞌtwaya twabo, kundu ziryagagi ngomu,
haliko Nahano agazihongola, anazibumbulike haashi.