26
Ulwimbo lwoꞌbuhimi
1 Ku yikyo kyanya, Abayuda booshi bagakizi yimba kwokuno:
Twehe, akaaya kiitu kalyagagi kazitire.
Ee! Rurema ali mu tukiza ku njira yeꞌnzitiro ngomu.
2 Aaho! Muyigulage inyiivi zaꞌkaaya,
gira ngiisi ábakwaniini imbere lya Rurema bayingire,
balya ábali bemeera imbere lyage.
3 E Rurema, ikyanya abandu bakulangaliiri ku mitima yabo yoshi,
uli mu baheereza umutuula nirizina.
4 Mukizi langaalira Nahano isiku zooshi.
Mukuba ye Lwala lwitu lweꞌmyaka neꞌmyakuula.
5 Ikyanya abandu bali mu ba bayidundulisiri, ali mu batindimaza.
Yabo bandu, kiri naꞌkaaya kahamu ko batuuziri mwo,
ali mu kahongola ngana,
kanasigale kilundo kyaꞌmabuye mu luvu.
6 Yako kaaya, ngiisi ábashubi kekeriiri, banabe bashubi tindimaziibwi,
bo bali mu kahinyata-hinyata.
7 E Rurema woꞌkuli, ikyanya abandu bali mu ba batungiini,
uli mu bagololera injira.
8 E Nahano, tukulindiriiri, tunali mu kulikira imaaja zaawe.
Tukuyifwijiri, tunali neꞌkyedu kyoꞌkukizi kuhuuza.
9 Ngiisi bushigi, umutima gwani guli mu kuyidula.
Gunaki kuyiduziri, halinde na shesheezi.
Ikyanya uli mu tuyereka íbikwaniini,
lyaꞌbandu bali mu biyiga, banatuule bwija.
10 Si banangora-mabi, boohe, kundu wangabagirira bwija,
ndaazo ngesho nyija zo bali mu yiga.
Bagenderiiri naaho ukukizi bihuuka.
Na kundu ulyagagi Nahano woꞌbulangashane, si batakutwaziizi.
11 E Nahano, yabo babi, kundu ukolaga ugabahana,
haliko, batakutwaziizi.
Aaho! Ubayerekage ngiisi kwo ukuuziri abandu baawe,
halinde banateezibwe ishoni.
Na bwo ubikiiri abagoma baawe umuliro,
ugire ubajigiivye mwo.*26.11 Baheburaniya 10.27.
12 E Nahano, byoshi byo tuli mu gira,
we mu tugenduukiza byo.
Aaho! Utuheerezagye umutuula gwawe.
13 E Rurema Nahamwitu,
kundu abandi bakulu bâli tutwaziri,
haliko wehe naaho, we tugakizi gingika.
14 Yabo bandi batwali, si keera bakafwa,
batanâye ki zuuke mu bafwiri!
Keera ukabahana, wanabaminika.
Mu kati kaabo, ndaanaye úwangaki kengeerwa.
15 E Nahano, keera ukayushuula umulala gwitu,
wanayushuula kiri neꞌmbibi zeꞌkihugo kiitu.
Ku yukwo, tugweti tugakuhuuza.
16 E Nahano, ikyanya twâli kizi gooka, twanakulooza.
Ku kyanya tukahanwa, twanakutakira.
17 Twâli riiri ngoꞌmukazi úkola úgaabuta.
Ali mu liruuka bweneene, iri anagaya-gaya noꞌmukero.
18 Nyiitu, twâli riiri nga tukola mu liibwa noꞌmukero.
Haliko, ho twangabusiri umwana,
tukabutaga imbuusi naaho!
Ndaabyo tukagira, mbu tuleete ubukize mu kihugo,
ndaanabo bandu bo tukakiyushuula kwo.
19 Abandu baawe, kundu bakoli fwiri,
haliko bagashubi zuuka, banabe bagumaana.
E birunda, kundu mukiri mu kuzimu,
muzuukage, munabande akabuuli.
Kundu indara ikiri mu mùbwikira,
haliko iri mu yerekana kwo hagaaba ulusiku luhyahya.
Abafwiri bagalonga ukuzuuka bakola bagumaana.
Nahano agaholeezania
20 E bandu baani, mugendi yingira mu bisiika biinyu,
munahamike inyiivi.
Munatee yibisha mwomwo,
halinde ku kyanya uburaakari bwa Nahano bugahooha.
21 Lolagi! Nahano akola agalyoka mwiꞌgulu.
Abandu beꞌkihugo bakiri mu gira amabi,
kinatume agabahana hiꞌgulu lyago.
Abiitani, kundu bâli kizi yona umuko mu kihugo,
haliko yugwo muko, gutagaki shubi bishama.