27
1 Yulwo lusiku, Nahano agaahana ikingisho-ngisho kyoꞌmujoka Levyataani, gulya úgutuuziri mu nyaaja. Yugwo mujoka, kundu guli mu kizi puumuka, gunali mu yizonga-zonga, si Nahano agayomola ingooti yage, anayami guyita.
2 Ku yikyo kyanya, tugayimba ulwimbo hiꞌgulu lyeꞌndalo nyiija yeꞌmizabibu:
3 «Iyo ndalo, nie Nahano ngakizi gihahala ngiisi lusiku, iri na ngizi givwomerera.
Ndaaye mundu úgayiji gishereeza,
bwo nyamiri ndi mu gilanga ubwakya-ubwayira.
4 Iyo ndalo, ndakiri mu girakarira.
Kundu kwokwo, iri nangagigwana mweꞌmigenge neꞌmihanda-njovu,
yoki, ngayiji gilwisa, halinde na ngisingoole.
5 Umundu iri angatibitira imwani, tutee nywana.
Ee! Leka atee yija tunywane.»
6 Mu siku ízigayija, abandu baani bagaaba nga bameziri imizi.
Ee! Abahisiraheeri bagaashoga, banayase kwaꞌkaaso.
Neꞌkyanya bagayera, ibitumbwe byabo bigakwira mu kihugo kyoshi.
7 Aaho! Ka mutoniragi kwo Rurema akahana Abahisiraheeri,
nga kwo akahana abagoma baabo?
Nanga, maashi! Si atakabaminika, nga kwo akaminika abandi!
8 Akabahungiisa naaho, mu mahanga.
Bali nga bandu ábakafuuhwa noꞌmuuka gwage, ukulyoka isheere.
9 Kwokwo, kwo Rurema agahotola amabi gaꞌBahisiraheeri.
Mango ayusagya, ututanda twoshi tweꞌkipagaani tugavungulwa,
tunasigale luvu naaho.
Ndaagwo mugisi gwa Hasheera úgugasigala,
kandi iri akatanda koꞌkuguyokera kwoꞌmubadu.
10 Tulya twaya twaꞌBahisiraheeri, kundu twâli tuzitire
leero tugasigala biguuka.
Tuganajandwa ngana, halinde tunabe ngiꞌshamba.
Ingaavu naaho, zo zigakizi vyagira mwo, zinakizi liisa ibyasi bya mu matavi.
11 Yabo Bahisiraheeri balyagagi nga matavi ágayumuusiri.
Ikyanya gali mu konyoka, abakazi banakizi yiji gashenya.
Yabo Bahisiraheeri balyagagi bizeeze,
ndaanalyo igambo basobanukiirwi.
Kundu Rurema ye kabalema, si atakiri mu baholeeza.
Kundu ali Mulemi wabo, atakiri mu bayuvwirwa indengeerwa.
12 Kundu kwokwo, ku yikyo kyanya, Nahano agatondeera ukukuumania abandu baage, muguma-muguma, nga kwo bali mu hulumula ingano. Balya bandu, bagalyokera ku lwiji Hefuraati, halinde ku lubibi lweꞌMiisiri.
13 Ku yulwo lusiku, ikibuga kihamu kigadihirizibwa.
Mu kati kaꞌBahisiraheeri, baguma bagaaba bagwasirwi imbohe
mu kihugo kyeꞌHasuriya, na mu kyeꞌMiisiri.
Balya booshi, bagagalulirwa i Yerusaleemu,
gira bagendi yikumba Nahano ku mugazi gwage mutaluule.