28
Akaaya keꞌSamariya, Nahano agakahana
Yayewe imwaꞌkaaya keꞌSamariya!
Si abatuulaga baamwo, Abahifurahimu, balyagagi balalwe!
Banagweti bagayihaya, mbu kalimbiri ngoꞌlushembe,
na mbu ho kayubasirwi, hayinamusiri mu ndekeera íri mweꞌnagiira.
Kundu kwokwo, kakola ngoꞌtwaso útukoli yumagusiri.
Yako kaaya koonyene, yubwo bulalwe bwo bugakatindimaza.
Lolagi! Yako kaaya, Nahano agalungika ibikalage byaꞌbasirikaani, gira bagendi kateera.
Bagayami yija bali nga nvula yoꞌlugungu íyatundwa neꞌkihuhuuta.
Yabo basirikaani bagakayifuka mwo ngoꞌmwijulire muhamu gwaꞌmiiji,
banakahongoleke haashi.
Ehee! Yako kaaya, kundu abalalwe bâli kizi kayihayira,
si abandi bagayiji kahinyata-hinyata.
Yako kaaya, kundu kâli limbiri nga lushembe úlukalukwa noꞌtwaso twija-twija,
lwanâli teresirwi mu ndekeera íri mweꞌnagiira,
haliko yutwo twaso tukola mu yumaguka.
Yako kaaya kashushiini noꞌmutiini úgwakoma imbere lyeꞌkyanya.
Ngiisi úli mu gubona, ali mu yami gutwa, anagulye.
Hagatama, Nahano woꞌbushobozi bwoshi, ye gaaba nga lushembe úlwalukwa mu twaso twija bweneene. Yulwo lushembe lugaaba lubuyahiri ngana, lunahaabwe abandu baage ábaki sigiiri. Lyeryo, lyo agaheereza abatwi beꞌmaaja ubwitegeereze, gira bakizi zitwa ku njira íkwaniini. Naꞌbasirikaani ábagaaba bali mu lwira irembo lyaꞌkaaya, agakizi bakania indege.
Abalalwe bagayiriza ubuleevi
Halikago buno, abatwali baꞌBahisiraheeri bakoli lalusiri neꞌdivaayi.
Iyo ndalwe ikoli gweti igabafuka iyo munda neꞌyo munda.
Emwe! Abagingi naꞌbaleevi, amaavu neꞌdivaayi keera byabalalusa ngana-ngana.
Ikyanya bali mu bona amabone, gali mu ba gahushiri.
Neꞌkyanya bali mu twa imaaja, bali mu kizi buligania.
Utushasha twabo, twoshi tukoli yijwiri kweꞌbishazi.
Idavwangira likoli kwiziri hooshi.
Balya Bahisiraheeri bagweti baganjekeereza kwokuno:
«Uyo Hisaaya, ka mwangamúyuvwa?
Aahago! Akoli loziizi ukuyigiriza banyandi?
Ka tulenge útwayongoolwa bigingo?
10 Si agweti agadaada, mbu:
“Ba-ba-ba, bo-bo-bo, da-da-da, do-do-do!”»
11 Kwokwo, Nahano akolaga agakizi ganuuza abandu baage mu gindi-gindi ndeto,
mu kukoleesa indeto yeꞌmahanga.* 28.11-12 1 Bakorindo 14.21.
12 Nahano âli mali gwanwa alagaania abandu baage kwokuno:
«Haahano ho mugaluhuuka!»
Na kwakundi: «Mwe muluhiri, nie gamùluhuusa.»
Kundu kwokwo, batasiimiri kwo bamúyuvwe.
13 Ku yukwo, amagambo ga Nahano, imwobo gagayuvwikana kwokuno: «Ba-ba-ba, bo-bo-bo, da-da-da, do-do-do!» Kwokwo, ha nyuma bagaagwa lugali, banavunike. Bagagwatwa mu mubashu, banatwalwe imbohe.
 
14 E batwali beꞌYerusaleemu, si muli mu honyolezania!
Aahago! Muyuvwage igambo lya Nahano.
15 Mugweti mugakizi yihaya, mbu:
«Twehe keera tukanywana ikihango na Narufu, kuguma neꞌnakwere.
Kwokwo, irya nguuke, ikyanya igayija, itagaki tugwa kwo.
Tugweti tugayilangaalira mu kudeta ibinyoma, na mu kuhendana.»
16 Si Nahano Rurema adetaga kwokuno:
«Lolagi! Mu kaaya keꞌSayuni, keera nabiika mwiꞌbuye.
Yiryo ibuye, keera likagezibwa,
linali liꞌbuye lyoꞌkusikamya akagongo koꞌlutaliro.
Umundu, iri angalibiika kwoꞌmulangaaliro, atagaki shenguka. 28.16 Zaburi 118.22-23; Barumi 9.33; 10.11; 1 Peturu 2.6.
17 Ngakizi koleesa íbikwaniini, lukizi ba nga lugero lwani.
Na ngoleese noꞌkuli, kukizi ba nga nevu yaꞌbuubasi.»
Si ubutibitiro bwinyu, buli mu yubakwa ku binyoma.
Kwokwo, invula yoꞌlugungu igayiji bushereeza.
Umwijulire gunayiji buhongoleka haashi.
18 Kirya kihango kyo mukanywana na Narufu, kigahongolwa.
Kundu mukalagaana neꞌnakwere, mutagatabaalwa.
Irya nguuke, mango yahikaga, mugakizi nyanyagwa haashi.
19 Yugwo mwijulire, gugakizi lenga ngiisi lusiku.
Gugakizi yija mwiꞌzuuba, kiri na mu bushigi.
Noꞌbuzinda, mugatwalwa ngana.
Yikyo kihano, ngiisi ábakisobanukiirwi, bagashenguka ngana.
20 Mugaaba ngoꞌmundu úkagira mbu agwejere ku ngingo,
yanamúyofihira.
Neꞌkibwikwa kyage, kyanamúniihira.
21 Haaho, Nahano agaaba akoli shavwiri, anakizi lwa,
nga kwo akalwa naꞌBafirisiti ku mugazi Perazimu,
na nga kwo akalwa naꞌBahamoori mu ndekeera yeꞌGibyoni.
Leero, agayiji gira ibya kundi-kundi byo mutashubi langaliiri.
22 Si ikihugo kyoshi kyaꞌBahisiraheeri, Nahano woꞌbushobozi bwoshi akoli hiziri kwo agakishereeza. Aahago! Mutwikire ukukizi shekerezania. Buzira kwokwo, imigozi igagenderera ukumùfyetereza ingingwe.
Rurema ali mu hana ku njira yoꞌkuli
23 Mundegage amatwiri, munyuvwirize.
24 Umulimi, ka ayamiri ali mu hinga ngiisi kyanya?
Aahabi! Si ali mu byala!
25 Ikyanya ali mu ba keera ayusa ukukunguula indalo,
ali mu byala mbuto zaage, ngeꞌngoole, neꞌbizaari.
Anali mu byala neꞌngano ahandu haayo, kiri noꞌbulo, neꞌzindi mbuto.
26 Si Rurema wage ye kamúyigiriza ngiisi kwo agakizi gira.
 
27 Mu kunyogola imbuto niini ngeꞌngoole, abandu batangakoleesa inyundo mbamu.
Si bali mu zikoma neꞌngoni niini.
Neꞌbizaari, bitali mu leezibwa kwiꞌgaare,
si biri mu komwa neꞌhiti.
28 Neꞌngano, bwo iri novu, batali mu gikoma lunda-twika.
Si bali mu gikoma, mu kugireeza kwaꞌmapine giꞌgaari.
Kundu kwokwo, batagenderiiri ukukizi givungula-vungula.
29 Gano miiga galyosiri imwa Nahano woꞌbushobozi bwoshi.
Ali mwitegeereza bweneene,
anali mu hanuulana ku njira yeꞌkitangaaza.

*28:11 28.11-12 1 Bakorindo 14.21.

28:16 28.16 Zaburi 118.22-23; Barumi 9.33; 10.11; 1 Peturu 2.6.