29
Akaaya keꞌYerusaleemu katonderwa
1 Yayewe imwawe, e Yerusaleemu! Ulyagagi kaaya ka mwami Dahudi,
neꞌsiku zaawe ngulu ziyamiri zigenderiiri umwaka ku gundi.
2 Kundu kwokwo, ngola ngakulibuza, halinde unalire ku kimombo.
Ugaaba nga katanda ákayijwiri kwoꞌmuko.
3 E Yerusaleemu, ngakusokanania ibiso byaꞌbasirikaani,
banayubake inzitiro ízishuumiri, gira balonge ubulyo bwoꞌkukuteera.
4 Ewe! Si uganyanyagwa haashi.
Ha nyuma, ugakizi yidodombera i kuzimu, kwiꞌzu liniini.
Ikyanya izu ligahulukaana,
ligaaba nga lya kishu, íkiri mu lyosibwa mwiꞌheero.
5 Kundu kwokwo, abagoma baawe, bagatumuulwa nga lukungu.
Na kundu balyagagi katundu, banali banambamba,
si bagalyosibwa ngana, nga byula íbiri mu yehuulwa.
Masaasa atabukwa, yibyo byoshi bigayami koleka.
6 Nie Nahano woꞌbushobozi bwoshi, na ndi nie gamùlwira.
Ngayija mu mukungulo, na mu misisi, na mu lujongo,
na mu kihuhuuta kya kwingi-kwingi, na mu muliro úguli mu jigiivya.
7 Yibyo binyamahanga, ikyanya bigayiji teera i Yerusaleemu,
booshi bagayami zimiira ngana, nga birooto.
Mu kulooza ukuteera i Yerusaleemu, bagaaba bagisokaniini.
Kundu kwokwo, bagazimiira ngana ngaꞌmabone ga mu bushigi.
8 Umunamwena, ikyanya ali mu loota ibirooto, ali mu bona kwo agweti agaalya.
Si mu kusisimuka, anakanguke mu kuyuvwa kwo aki shalisiri.
Kiri noꞌmundu únyotiirwi, ali mu loota kwo akola mu nywa amagoloovi.
Si mu kusisimuka, anabe aki nyotiirwi.
Kwo na kwokwo, ikyanya abagoma bagayiji teera umugazi Sayuni,
bagaatona kwo bagamùhima, shoobe!
9 Munahuumirwe ngana, munabe munyerere.
Muyigirage nga mbumi, mbu lyo mutakizi bona.
Mukizi laluka ngana, halinde munakizi bambaajira.
Si yukwo kulaluka kwinyu, kutabaagage ku njira yaꞌmaavu.
10 Aahago! Nahano ye tumiri mukubisirwi.
Kiri naꞌbaleevi biinyu, keera akabahumaaza amasu.
Naꞌbanamabone kwakundi, keera abakubika.*29.10 Barumi 11.8.
11 Galya mabone, si gali nga mwazi úguyandisirwi mu kitaabo kishweke, kinabiisirwi kwaꞌkamangu. Iri mwangakiheereza umusomi, mbu akisome, anayami shuvya kwokuno: «Aahabi! Kino kitaabo, kiki shwesirwi, kinabiisirwi kwaꞌkamangu. Aahago! Kutagi kwo nangaki kisoma?» 12 Yikyo kitaabo, iri wangakiheereza dindirye, mbu akisome, naye, ti: «Ipwi! Ndayiji ukusoma.»
Nahano aki genderiiri ukukola ibisoomeza
13 Nahamwitu adetaga kwokuno:
«Bano bandu bagweti bagaadeta kwo bali beꞌmwani.
Kundu bali mu yigiraga mbu banzimbahiri, kuli ku tunwa naaho.
Si imitima yabo ikoli yisuuziri hala!
Ikyanya bali mu nyikumba,
bali mu kulikira imihango naaho, yo bakayigirizibwa naꞌbandu.†29.13 Mataayo 15.8-9; Mariko 7.6-7.
14 Ku yukwo, ngashubi bakolera ibisoomeza bya kwingi-kwingi.
Mu kati kaabo, abanabwenge bagaatera ubwenge bwabo.
Na kundu bali beeshu, si ubweshu bwabo bugaahera.‡29.14 1 Bakorindo 1.19.»
Inzaliro zaꞌbandu, Nahano aziyiji-yiji
15 Yayewe imwa ábali mu gira mbu babishe Nahano byo bashungisiri.
Muli mu kola amabi mu kihulu, iri munadeta:
«Si ndaaye útubwini!
Aaho! Ngiisi byo tuli mu gira, nyandi úgabimenya?»
16 Kundu mwadeta kwokwo, si mwahwijikala ngana.
Aahago! Ka mubwini kwoꞌmubuuvi ye muguma niꞌbumba?
Ikirungu, ikyanya kyabumbwa, ka kyangabwira umubuuvi, ti:
«Ewe! Si utali we kambumba!»
Kandi iri «Si wehe, ndaabyo uyiji!§29.16 Hisaaya 45.9; Barumi 9.20. » Nanga, maashi!
17 Umenye kwo masaasa atabukwa, ulubako lweꞌLebanooni lwâye hinduke ndalo nyiija.
Iyo ndalo, nayo inashubi shushaana noꞌlubako.
18 Ku yikyo kyanya, ngiisi íbiyandisirwi mu kitaabo,
kiri neꞌbimeme bigabiyuvwa.
Imbumi nazo, kundu zâli riiri mu kihulu namudidi,
haliko zigahumuulwa, zinalongage ukubona.
19 Ngiisi ábatindimaziibwi, Nahano agabashambaaza.
Na ábakekeriiri bagashambaala mu kati ka Rurema, Umutaluule waꞌBahisiraheeri.
20 Si banangora-mabi boohe, bagaahera ngana.
Na ábali mu honyolezania, bagaamala.
Bwo bakuuziri ukugira amabi, bagaminikwa duba.
21 Ikyanya abandu bali mu banganizania, bagaherera
kuguma na ábali mu tegana imbere lyaꞌbatwi beꞌmaaja,
kiri na ábali mu hana abandu bazira buhube.
22 Nahano, Lukiza wa Hiburahimu, abwiraga Abahisiraheeri kwokuno:
«Abandu baani batâye ki teteerwe,
batanâye ki teezibwe ishoni.
23 Niehe nie Mutaluule wa Yakobo, na ndi Rurema waꞌBahisiraheeri.
Aahago! Ikyanya bagabonaga ngiisi kwo ndi mu bagashaanira,
banabonage na kwaꞌbaana baabo bakoli luguusiri,
lyo bagakizi huuza iziina lyani, banakizi nzimbaha.
24 Haaho, ngiisi ábakoli habusiri, bagashubi tumburukwa.
Na kundu bâli kizi yidodomba, haliko leero bagayemeera ukuhanuulwa.»