30
Ubuhanya bwa ábali mu langaalira i Miisiri
1 Nahano adetaga kwokuno:
«E baana baani, yayewe imwinyu,
si mulyagagi bahuni! Munali mu yilundira ibyaha ku bindi bingi.
Muyamiri muli mu shungika ibyeꞌmwinyu, kundu bitanzimisiizi.
Muli mu nywana ikihango neꞌbinyamahanga,
buzira kutee hanuusa Umutima gwani.
2 Muli mu gendi tabaaza Abamiisiri,
buzira kumbanuusa.
Munakoli biisiri Faraho kwoꞌmulangaaliro, kwo ye gamùkiza.
3 Aahabi! Kundu mwangayihega ku Faraho,
si mugalonga ishoni naaho, iri munayigeraniza.
4 Uyo Faraho, biri ukuli kwo atwaziri ahandu hingi,
ukulyoka i Sowani, halinde kiri neꞌHanesi.
5 Kundu kwokwo, abandu iri bangamúlangaalira, bagateteerwa ngana.
Ulya Faraho, ndaabwo butabaazi mugalongaga imwage.
Si agakizi mùteeza ishoni naaho, iri munajambuurwa.»
6 Ku biloziri inyamiishwa za mwiꞌshamba lyeꞌkisaka, Rurema adetaga kwokuno:
«Abandu baani bali mu genda bahesiizi bapunda neꞌngamiya akanyamwala keꞌbindu,
banaberuuze mu namuhirye wiꞌshamba,
anali mwaꞌmagoorwa ga kwingi-kwingi, naꞌmakuba.
Muli ifiizi zeꞌndare, naꞌmabuguma gaazo.
Muli neꞌmijoka yaꞌmanjoka-njoka, neꞌbindi bihuume byeꞌmijoka.
Bali mu gendi tengula Abamiisiri, mbu lyo babatabaala.
Kundu kwokwo, balya Bamiisiri, ndaabyo bagabahanyira.
7 Ee! Abamiisiri, ubutabaazi bwabo buli ndaabwo.
Kyo kitumiri keera nꞌgabayinika iziina Kingisho-ngisho kyoꞌmujoka, kafwa-busha.»
Abandu bali babitwitwi
8 Nahano anabwiraga Hisaaya:
«Ewe! Yaga magambo, ugayandike mu kitaabo,
gira abandu beꞌYerusaleemu batangirwe ubumasi,
ngiisi kwo bayamiri bali bahuni, banakoli tebesiri.
Yubwo bumasi buganayama ho, halinde imyaka neꞌmyakuula.
9 Yabo bandu, kundu Nahano ali mu bayigiriza, si batamútwaziizi.
Bali mu yifunda mu bibeesha naaho.
10 Kundu bali mu kizi yerekwa amabone,
si bayamiri bali mu longooza beene go, ti:
“Nanga! Galya mabone giinyu, mugatwikire kwo.”
Banakizi naakira naꞌbaleevi kwokuno:
“Mulekage ukukizi tumenyeesa íbiri ukuli.
Si mukizi tubwira naaho amagambo ágatusimisiizi.
Mukizi tubwira ibinyoma.
11 Mutwikire ukukizi tubwira hiꞌgulu lyoꞌlya Mutaluule waꞌBahisiraheeri.
Munashaagage mu njira yinyu ítungiini.”»
12 Nahano, Umutaluule waꞌBahisiraheeri, anashuvya kwokuno:
«Kundu ngweti ngamùyerekeza, si keera mwanjajaaka.
Munali mu biika umulangaaliro ku binyoma, iri munalibuzania.
13 Yikyo kyaha kiinyu kigayami mùleetera ubuhanya.
Kigaaba nga kibambaazi íkishuumiri, kinali mwoꞌbulali.
Yikyo kibambaazi, kiri mu tee hengama.
Masaasa atabukwa, kinayami yihongoleka haashi.
14 Ee! Mugapwamuuka, nga nyungu íyarasaanuka lwoshi-lwoshi.
Ingyo ízigasigala, ziri niniini bweneene,
halinde zitanaki shobole ukulahulirwa kwoꞌmuliro,
kandi iri kuvwomerwa kwaꞌmiiji.»
15 Nahano Rurema, Umutaluule waꞌBahisiraheeri, ashubi detaga kwokuno:
«Iri mwangangalukira, munatuuze mu kati kaani, lyoki mwangakizibwa.
Ee! Mwangalonga imisi naaho, mu kutuuza, iri munambiika kwoꞌmulangaaliro.
Haliko mwehe, yago miija, mukoli galahiiri lwoshi.
16 Mukadeta, ti: “Twehe, íbitugooziri, tulonge ifwarasi, gira tukizi suula umulindi.”
Yukwo kusuula umulindi kwinyu, kugaaba naaho mu kupuumuka.
Ka mutoniri kwo zirya fwarasi zigamùtabaala?
Aahabi! Si ifwarasi za ábali mu mùhiiva, zo zigasuula umulindi ku zeꞌmwinyu.
17 Mu yabo bagoma, muguma naaho agabiika ikikando,
abandu biinyu kihumbi banayami puumuka.
Abataanu baabo nabo, bagamùshindibuka kwo mweshi.
Mugasigala naaho ngeꞌkiti kishinge kyonyene kwiꞌrango,
kinamanisirwi kweꞌhisanganira hiꞌrembera.»
Nahano agashaanira abandu baage
18 Kundu kwokwo, Nahano ali Rurema woꞌkuli.
Analoziizi ukumùgirira amiija, noꞌkumùyuvwirwa indengeerwa.
Bahiriirwi booshi ábamúlangaliiri.
19 E bandu beꞌSayuni, mwe mutuuziri i Yerusaleemu!
Ku kasiisa, mutâye ki bululuke.
Iri mwangatabaaza Nahano,
agakizi mùyuvwa, anamùshuvye duba.
20 Nahano akatee mùheereza amakuba ngiisi lusiku nga mukate,
anakizi mùheereza naꞌmalibu nga miiji.
Kundu kwokwo, atagagenderera ukukizi bishama.
Si mugakizi múbona masu ku gandi, yenyene anashubi mùyigiriza.
21 Hali ikyanya mwangahabukiraga ilulyo, kandi iri ilumosho.
Kundu kwokwo, mugayuvwa izu, ligweti ligamùbwira:
«Injira íkwaniini ino, mukizi gikulikira.»
22 Kwokwo, irya migisi yinyu, mukola mugagibona kwo iyulubiiri, munagikabulire.
Kundu yangaba íkatulwa mu harija, kandi iri mu nooro, mugagibwira, ti:
«Muyihereere! Si mulyagagi ngiꞌjolera!»
23 Haaho, Nahano agashubi mùniekeza invula ku kyanya íkikwaniini. Munakizi byala imbuto, zinahembe, zinayere bweneene. Kiri neꞌbitugwa biinyu, munakizi biteereza. 24 Ishuuli zo mugweti mugalimiisa, kiri na bapunda, mugakizi biyuhirira ibyokulya íbiri tiita. Na mu kubiyuhirira, bigamùhuuna kwo mukizi koleesa inyiibo, neꞌmbahwa.
25 Ku yikyo kyanya, abagoma biinyu bagaaba keera baminikwa. Neꞌnyingo zoꞌtwaya twabo, zinabe zikola mishaka. Haliko mwehe, mu ngiisi migazi noꞌtugangazi, mugakizi hinga inyiiji.
26 Umwezi gugakizi yaka bweneene ngiꞌzuuba. Niꞌzuuba nalyo, umulengeerwe gwalyo, gugakizi yaka ubugira kalinda, ukuhima izindi siku. Kwokwo kwo bigaaba, ku kyanya Nahano agakizi lunga inguma zaꞌbandu baage. Kundu âli kizi bamotola, haliko agaki baholeeza.
Rurema agashereeza ikihugo kyeꞌHasuriya
27 Langiizi! Nahano akola mu yija ukulyoka hala.
Uburaakari bwage bukoli yasiri. Neꞌkyusi kikola mu tutumuka.
Ikyanya ali mu detaga, amagambo gaage gali mu babaza nga muliro.
28 Akola mu fuuha umuuka ngoꞌmwijulire,
halinde gunahike mwiꞌgosi lyaꞌbagoma baage.
Akola agaminika ibinyamahanga, nga ábali mu sheba umushyano naꞌkayungiro.
Agabiika ibyuma nga byeꞌfwarasi mu tunwa twabo,
mu kubatwala ho bagagendi shereezibwa.
29 E bandu ba Rurema, mwehe mugakizi yimba ku malega, iri munashambaala ngana-ngana, nga bandu ábakola mu yimba ku siku ngulu. Ubushambaale bwinyu bugaaba nga bwaꞌbandu ábakola mu zamuukira ku mugazi gwa Nahano, Ulwala lwaꞌBahisiraheeri. Bali mu kizi genda ku kisegengo, iri banalasa imiteera-teera.
30 Nahano agategeesa abandu amatwiri, balonge ukuyuvwa izu lyage lya kahebuuza.
Banabone ngiisi kwoꞌbushobozi bwage bugaakola ku buraakari.
Agashonooka mu muliro gwoꞌkujigiivya byoshi.
Anayije neꞌkihuhuuta kikayu íkiri mu vuduka mweꞌnvula nyingi yoꞌlugungu.
31 Nahano agalunduma, anatondeere ukukubula Abahasuriya ingoni,
halinde banakanguke bweneene.
32 Balya Bahasuriya, Nahano yenyene agakizi balwisa. Iyo ngoni, ikyanya agakizi bakubula yo ubugira kingi, Abahisiraheeri bagashambaala, iri banalasa ingoma neꞌnzeeze.
33 Uyo mwami waꞌBahasuriya, Nahano âli mali gwanwa ashungika kwo agamújigiiviza i Topeti.
Ee! Iyo munda, iri ikirimbi-rimbi, kinayisiri.
Yikyo kirimbi-rimbi, kiri mwiꞌbengesheeshe lyoꞌmuliro, gunali mweꞌshaali nyingi.
Yugwo muliro, Nahano agaguyasa, mu kugufuuha noꞌmuuka gwage, gunayami yaka nga lwiji úluli mwoꞌmuliro.