31
I Miisiri, ndaabwo butabaazi úbuli yo
1 Yayewe, imwa ngiisi ábali mu gendi tabaaza Abamiisiri!
Ehee! Si balangaliiri kwo bagakizibwa, bwo bahiiti ifwarasi,
na ábali mu zigendera kwo, kuguma naꞌmagaare mingi giꞌzibo!
Batalangaliiri Nahano, Umutaluule waꞌBahisiraheeri,
batanali mu mútabaaza.
2 Kundu kwokwo, Rurema alyagagi mwitegeereza,
anali noꞌbushobozi bwoꞌkuhana.
Neꞌkyanya ali mu kyula, atali mu yishuhiza.
Agweti agahagana na banangora-mabi,
anaminike ngiisi ábali mu bayibiika kwo.
3 Aaho! Yabo Bamiisiri, si balyagagi bandu ngana! Batanali bandi boꞌkuyikumbwa.
Kiri neꞌfwarasi zaabo, si biri bitugwa naaho,
zitanagweti ubushobozi bwa mu mitima.
Ikyanya Nahano agababangulira ukuboko kwage,
ngiisi ábali mu gira mbu babatabaale, bagasiitara.
Na ábagatabaalwa kwakundi, banayideedeke haashi.
Kwokwo balya booshi, banashereezibwe kuguma.
Rurema agalanga i Yerusaleemu
4 Nahano akambwiraga kwokuno:
«Ikyanya ikihagarusi kyeꞌndare kandi iri injuuke yayo iri mu yita ikitugwa,
iri mu kiyimangira kwo, iri inalunduma.
Na kundu abangere bangashololokera ho,
banakizi gira ulujongo, mbu bagiyimule,
itali mu batwaza.
Mukuba yulwo lujongo lutangagiyobohya.
Kwo na kwokwo, Nahano woꞌbushobozi bwoshi, agamanukiraga ku mugazi Sayuni,
gira ayiji teera abagoma.
5 Nga kwoꞌtunyuni tuli mu balala mu kyanyaanya, mu kulanga ingisha,
kwo na kwokwo, Nahano agakizi langa i Yerusaleemu.
Ee! Agakizi gihahalira, iri anagishuutira, halinde anagiguluule.»
6 E Bahisiraheeri, si keera mukahagana na Nahano! Aaho! Mumúgalukirage. 7 Lusiku luguma, ngiisi muguma winyu âye twikire ukuyikumba imigisi. Si biri bindu naaho byo mukatula mu harija na mu nooro, mu kukoleesa amaboko giinyu mabi!
8 Abahasuriya boohe, bagayitwa ku ngooti.
Neꞌyo ngooti itagaaba yaꞌbandu,
si igaaba ya Rurema, bwo ye gabaminika.
Yabo Bahasuriya, ikyanya bagagibona, bagatibita.
Kundu kwokwo, imisore yabo igagwatwa,
banakizi koleesibwa ku kahaati mu buja.
9 Yabo Bahasuriya bagahuumirwa.
Abakulu baabo, ikyanya bagabonaga amarembera giinyu giꞌzibo,
bagaagira mbu bapuumuke.
Umuliro gwa Nahano guli mu kizi yaka hiꞌgulu lyaꞌkaaya keꞌSayuni.
Ibengesheeshe lyagwo liyamiri haaho i Yerusaleemu.
Kwokwo, kwo Nahano adesiri.