32
Umwami úkwaniini agayija
1 Lolagi! Hâye yime umwami úgakizi twala ku njira íkwaniini.
Abatwali baage nabo, bagakizi twa imaaja ku njira íkwaniini.
2 Ngiisi muguma wabo, agaaba nga handu haꞌbandu bagakizi yisiika umunyaga.
Na kundu invula yoꞌmusiluula yangavuduka, agabatabaala, halinde batalobe.
Bagaaba nga nyiiji íziri mu nywesa ishamba írihangalusiri,
banabe nga lwala úlugiziri ikimbehwa mwiꞌshamba.
3 Ngiisi ábabwini, amasu gaabo gatâye ki humaale.
Na ngiisi ábayuvwiti, amatwiri gaabo gagayama gategiiri.
4 Ngiisi ábatashobwiri ukushuvya bwija, leero bagayitonda.
Na ngiisi ábali mu kukumiza, leero bagatwisa mu kudeta bwija.
5 Abahwija batagaki yivugwa mbu bo bakulu.
Kiri noꞌtufwa-busha, abandu batagaki tugingika.
6 Umuhwija agweti agaravwanga,
iri anakizi shungika naaho ukugira amabi.
Ali mu higula imbere lya Nahano,
iri anakizi mútyoza.
Ikyanya ali mu bonaga ábashalisiri, atali mu bashaluula.
Kiri na ábanyotiirwi, atali mu baheereza amiiji mbu banywe.
7 Balya banangora-mabi bagweti bagateberezania.
Kundu abakeni bangaba bo bakwiriiri ukulonga ukuli kwabo,
yabo babi boohe, bali mu babangaaniza, lyo babanyage ibindu byabo.
8 Si abandu biija boohe, bali mu tabaalana,
kinatume bakiri mu sikama.
Ihano imwaꞌbakazi beꞌYerusaleemu
9 E bamaawe, si muyamiri mujeberiiri, ndaanabyo muhahiiri!
Aaho! Muyimukage, mundege amatwiri.
10 Ehee! Kundu muki yiyuvwiti kwo mujeberiiri,
halikago ha nyuma lyoꞌmwaka muguma naaho, mugashundeera.
Ku yikyo kyanya, ndaakiyo mizabibu ígaaba isigiiri, mbu mugiyimbule.
11 E bakazi, kundu muki jeberiiri, ndaanabyo muhahiiri,
si mukwiriiri mulengage mweꞌkinyukura.
Aaho! Mukaturure ibyambalwa biinyu,
munakenyere amasuuzu, mu kuyerekana kwo mukoli jengiirwi.
12 Mukizi yikomomba ku kikaraza.
Mukizi liruuka mukuba indalo ziinyu, kundu zishubi dehiri, zinashubi jojesiri kweꞌmizabibu mingi, halikago iyo mizabibu, ndaakiyo.
13 Ikihugo kyaꞌbandu baani, kigaamera mweꞌmigenge, neꞌmihanda-njovu naaho.
Utwaya twinyu, neꞌnyumba ziinyu, kundu bishuba mwoꞌbushambaale,
si leero yubwo bushambaale butakiri ho.
14 Kiri naꞌkajumiro kagasigala kamaata.
Utwaya twoshi, kundu tushuba mwoꞌlujongo, si tugasigala mushaka.
Ulwingo lweꞌnaazi, kiri naꞌkaaya kazitire koꞌkutibitira mwo,
byombi bigasigala biguuka, halinde imyaka neꞌmyakuula.
Linasigale naaho igombaniro lya bapunda ba mu kishuka,
neꞌbibuzi binakizi ragirira mwo.
Umutuula gugaboneka ku kyanya ukuli kugayimanga
15 Bulya buhanya bugagenderera kwokwo,
halinde ku kyanya Nahano agatuyijuza mwoꞌMutima gwage ukulyoka mwiꞌgulu.
Haahago, liꞌshamba ligahinduka ndalo yeꞌnagiira.
Iyo ndalo nayo, inahinduke lubako.
16 Imaaja zigakizi twibwa ku njira íkwaniini, kiri na mwiꞌshamba.
Kiri na mwiꞌrya ndalo yeꞌnagiira, abandu bagakizi kulikiriza íbikwaniini.
17 Yukwo kuli, ikyanya bagakukulikiriza, lyo bagalonga umutuula.
Abandu banabe batuuziri noꞌmutuula noꞌbutoge, halinde imyaka neꞌmyakuula.
18 Ee! Abandu baani bagatuula mu kati koꞌbutoge,
hanabe noꞌmunyerere, halinde banalonge ukuluhuuka.
19 Kundu invula yoꞌlugungu igashereeza ibiti mu lubako,
na kundu akaaya kagayami yihongoleka haashi,
20 haliko, mwehe mukiri bahiirwa.
Mukuba, mukiri mu byala imbuto ha tudota.
Ingaavu na bapunda muli mu kizi biteereza.