33
Ubuhanya hiꞌgulu lyaꞌBahasuriya
1 Yayewe imwinyu, mwe Bahasuriya!
Kundu mugweti mugaminikana,
si mwenyene mutazindi minikwa.
Na kundu batazindi mùtanga mu bagoma,
si mwehe mugweti mugatangana mwo.
Yuvwagwi! Ikyanya mugaaba keera mwashereezania,
lyo na niinyu mugashereezibwa.
Neꞌkyanya mugaaba keera mwayusa ukusongerana mu bagoma,
lyo na niinyu mugasongerwa mwo.
2 E Nahano, tukubiisiri kwoꞌmulangaaliro.
Aaho! Utukejererage!
Ukizi tusikamya ngiisi shesheezi.
Neꞌkyanya tugakizi longa amalibu, unatukize.
3 Ibinyamahanga, ikyanya biri mu yuvwa izu lyawe,
biri mu yami puumuka.
Ee! Ikyanya uli mu yimukaga naaho,
bali mu yami shaabuka.
4 Nga kwokulya amahaazi gali mu maliiriza indalo,
kwo na niinyu, ibindu biinyu bigashahulwa.
5 Nahano atuuziri mwiꞌgulu, anali mu gingikwa bweneene.
Agayijuza akaaya keꞌSayuni mwoꞌkuli, na íbikwaniini.
6 Mwe bandu beꞌYerusaleemu, Nahano ye lutaliro lwinyu lukomu.
Agakizi mùkiza, iri anamùheereza ubwitegeereze, noꞌbumenyi.
Iri mwangalonga ubugale,
mukwaniini mukizi músimbaha.
7 Lolagi! Kundu abasirikaani biinyu bali bikalage,
si leero bakola mu bululuka mu njira.
Kiri na ábakatumwa kwo bagendi huuna umutuula,
nabo banagaluka bakola mu lira ku kimombo.
8 Imitalimbwa ikolaga, shee!
Ndaaye úkiri mu gilenga mwo.
Kundu bakanywana ibihango mbu balongage umutuula,
haliko birya bihango, keera bakabihongola.
Kiri na byoꞌtumasi tukalagaania, bataki bitwaziizi.
Ndaanaye úkiri mu simbahana.
9 Ikihugo kikoli ginunusiri, kinakoli yumagusiri.
Kiri neꞌmigazi yeꞌLebanooni, keera ikateezibwa ishoni, inakoli yumagusiri.
Indekeera nyiija yeꞌSharooni ikoli yumiri ngiꞌshamba.
Ku mugazi Bashaani, na ku gweꞌKarimeeri, ibiti byoshi bikola bizira bihunda.
10 Nahano adetaga kwokuno: «Buno, ngola ngayimuka,
na nyerekane ngiisi kwo ndi kikalage bweneene.
Ee! Ngolaga ngagingikwa mu bandu.
11 E Bahasuriya, si mulyagagi busha, nga byasi, noꞌbukere.
Imbuusi ngayu íri mwoꞌmuliro, igayiji mùjigiivya.
12 Abandu biinyu bagalashwa mu muliro nga migenge.
Gugabajigiivya, halinde banasigale munyota-kiiko.
13 Mwe mutuuziri hala, yuvwagwi ngiisi byo nakola.
Na niinyu mwe mutuuziri hoofi, muyiji yiga hiꞌgulu lyoꞌbushobozi bwani.»
14 Abanabyaha ba mu Sayuni, batatwaziizi Rurema.
Kyo kitumiri bakoli yobohiri, banakola mu juguma.
Bali mu deta, ti: «Yugu muliro, si guli mu jigiivya ngana-ngana!
Aahago! Nyandagi úwangaki tuula ho?
Si guyamiri guli mu yaka bweneene.
Aaho! Nyandagi úwangaki guyigooyera?»
15 Abandu bangakira, iri bangakizi gira íbikwaniini,
banabe bagweti bagaadeta ibyoꞌkuli,
banabe batagweti bagalyalyania, mbu lyo bagala,
banabe batanali mu lya ikitulire.
Kiri noꞌkuyuvwa igambi lyoꞌkuyitana, batasiimiri,
batanaloziizi ukubona íbitali nga byo.
16 Abandu mwene yabo, boohe bo bagatuula mu butoge,
banakizi langwa nga bandu ábatuuziri mu kaaya kazitire.
Bagakizi longa ibyokulya íbiri tiita,
banakizi nywa amiiji ngiisi lusiku.
17 Mugayibonera umwami, kwo agweti agagingikwa,
munabone na ngiisi kweꞌkihugo kitabisiri bweneene.
18 Lyeryo, munakengeere ngiisi kwo mwâli kizi libuzibwa bweneene, munayibuuze kwokuno:
«E balya, balya bakulu beꞌmahanga, hayi balyagagi?
Baguma baabo, si bâli kizi turamburiisa imirambu. Aaho! Buno bali hayi?
Na ngiisi ábâli kizi haruura iminyago íkashahulwa mu kaaya kiitu, nabo balyagagi hayi?»
19 Yabo banabwikangaate bali mu deta indeto yo mutayiji.
Kundu kwokwo, mutagaki shubi babona.
20 Mwehe, mulangiizagye ku mugazi Sayuni.
Haaho, ho tuli mu shambaalira isiku ziitu ngulu.
Mukizi langiiza i Yerusaleemu.
Si ko kaaya kiija koꞌmutuula,
kanali ngiꞌheema íritâye twalwe ahandi.
Imisumaari yalyo yoꞌkuligwasa, itâye kuulwe.
Kiri neꞌmigozi yalyo, itâye twisibwe.
21 Mu kalya kaaya, mwo Nahano agayiyerekana kwo ali munabushobozi.
Tugakizi tuula ha butambi lyoꞌtudota, kiri neꞌnyiiji mbamu.
Si amashuba gaꞌbagoma, kundu gangaba gali nangungubanga,
goohe, gatagakizi bilenga mwo.
22 Nahano, ye mu tuheereza imaaja, ye nali mu zitwa.
Ye na mwami witu. Ye gakizi tulanga, halinde tunakizibwe.
23 Abagoma biitu, imigozi keera yateraga ku nguliro yaꞌmashuba gaabo.
Kwokwo, amatanga gatakiri mu yanuulwa.
Balya bagoma, ibindu byabo íbikanyagwa, bigagabulwa.
Na bwo bigaaba kanyamwala, kiri neꞌbirema bigalonga kwoꞌmutuli.
24 Mu batuulaga booshi beꞌYerusaleemu,
ndaaye úgashubi deta, mbu: «Ngoli lwaziri!»
Mukuba yabo booshi, ibyaha byabo bigaaba keera byakogwa.