34
Rurema agaahana abagoma baage
1 E binyamahanga, mutegage amatwiri.
E bandu mweshi, na naawe e kihugo, kuguma na byoshi íbikuli mwo, muyuvwirize.
2 Nahano akoli mùrakariiri mweshi, kuguma naꞌbasirikaani biinyu booshi.
Keera anahiga kwo agamùminika mweshi, halinde munashaazibwe mu kihugo.
3 Ibirunda biinyu bigakabulirwa imbuga,
halinde ibaya lyabyo linalungiire,
noꞌmuko gwabyo, gunagolombe ku migazi.
4 Igulu ligabungwa-bungwa, nga kwo bali mu bunga ikitaabo kibungirize.
Indonde íziryagagi kwiꞌgulu zooshi, zinajongoloke,
zinayume nga bibabi byeꞌmilandira,
kandi iri nga bishulu byumu byoꞌmutiini.
Zooshi zinabugumukire mu kihugo.* 34.4 Mataayo 24.29; Mariko 13.25; Luka 21.26; Bwigule 6.13-14.
5 Yabo Bahedoomu, nie Nahano ngoli hiziri kwo ngabaminika lwoshi-lwoshi.
Ingooti yani igadobekwa mu muko yaho mwiꞌgulu,
inayami batibulirwa kwo.
6 Irya ngooti yani ikoli yijwiri umuko gweꞌkipanga,
na gweꞌkihebe, kiri na gweꞌbyanabuzi, kuguma neꞌbinyule byeꞌnyama yeꞌfiko.
Yehee! Nahano akolaga agatanga ituulo mu kaaya keꞌBosira.
Akola agayita abandu bingi mu kihugo kyeꞌHedoomu.
7 Kundu abashosi bangabiiri bali neꞌmisi nga yeꞌmbogo, kandi iri yeꞌshuuli,
halikago, ukufwa bagaafwa naaho.
Kirya kihugo kyoshi kigakwira mwoꞌmuko naaho-naaho.
Noꞌluvu lunanywerere mweꞌbinyule byabo.
8 Lwolwo lusiku, lwo Nahano agayihoolaga kwo.
Ee! Mu gwogwo mwaka, lyo agayihoola abagoma beꞌSayuni.
9 Utudota tweꞌHedoomu tugahinduka kabulimbo.
Kiri noꞌluvu lugagulumira.
Ikihugo kyoshi kigahinduka kabulimbo ákayasiri umuliro.
10 Yugwo muliro gunagenderere ukukizi yaka ubushigi niꞌzuuba.
Ikyusi kigakizi tuuma,
halinde yikyo kihugo kinasigale mushaka imyakuula.
Ndaanaye mundu úwâye kilenge mwo.† 34.10 Bwigule 14.11; 19.3.
11 Kirya kihugo, banakasare bo bakola bagakituula mwo,
kuguma na banafufulu, na banamujongo.
Nahano agakishereeza lwoshi, kinasibe.
12 Yikyo kihugo, abatwali baamwo booshi bagaamala.
Abaluzi nabo, bananyerere.
13 Inyumba zaabo, kundu ziryagagi zoꞌmulimbo, leero zigaamera mweꞌmigenge.
Inzitiro zaabo nazo, zinamere kweꞌbidata, neꞌmihanda-njovu.
Yibyo biguuka binabaagage igomberano lyeꞌmirunga, na banafufulu.
14 Ibimburu, nabyo bigatuula mwo, kuguma neꞌndama ku mulinga.
Utusa tugakizi hamagalana,
tunalongage ahandu hoꞌkuluhuukira.
15 Banyunda bagayubaka mweꞌngisha, banateerere mwo,
banalaalire, halinde amagi ganaberwe.
Kiri neꞌngukuma zigakizi huutira mwo,
ngiisi nguma neꞌyabo, lukwe-lukwe.
16 Nga mwangasomiri mu kitaabo kya Nahano,
mwangagwaniini kwo biyandisirwi kwokuno:
«Ndaakyo kiremwa, kiri neꞌkiguma íkyâye bulike,
ndaanakyo íkigaabula ikyabo.»
Mukuba, Nahano yenyene keera akyula.
Umutima gwage gwonyene, gwo gugabikuumania kuguma.
17 Zirya nyamiishwa zooshi, keera Rurema akazigabulira ikihugo.
Ngiisi nguma, keera akagiheereza ikyayo,
zinayamiri zituuziri mwo, halinde imyaka neꞌmyakuula.