35
Rurema agaholeeza abandu baage
1 Mu yizo siku, kiri niꞌshamba lyâye shagaluke.
Kundu liki yumagusiri, lyâye ki shambaale.
Indagiriro zâye hiirwe, zinayase ngiꞌpamba.
2 Yutwo twaso tugayasa ku bwingi,
iri tunayimba ku busiime, noꞌkubanda akabuuli.
Lirya ishamba ligaaba likoli limbiri ngana-ngana, ngeꞌmigazi yeꞌLebanooni,
na ngoꞌmugazi Karimeeri, neꞌndekeera yeꞌSharooni.
Haahago, lyaꞌbandu booshi bagaabona ubulangashane bwa Nahano,
banabone kwo Rurema ali wa kahebuuza.
3 Amaboko gaawe, kundu gangaba gakoli teziri, si ugasikamye.
Naꞌmadwi kwakundi, kundu gangaba gakoli luhiri, ugakanie.*35.3 Baheburaniya 12.12.
4 Abandu, iri bangaba bakoli vunisiri indege, mubabwire:
«Mutayobohe, muyihe ikise, Rurema winyu agayiji mùyihoolera.
Ee! Agayiji hana abagoma biinyu. Yengwa, agayiji mùkiza.»
5 Haaho, lyeꞌmbumi zigatondeera ukubona.
Neꞌbitwitwi binayuvwe.†35.5 Mataayo 11.5; Luka 7.22.
6 Utundende tunakizi ganga nga kabale.
Ibimeme binakizi banda akabuuli, awi yiyi yiyi, iri binayimba.
Lyeryo, amiiji ganashyokage mwiꞌshamba,
ganabire kiri na mu luumagu.
7 Ishamba, kundu liduusiri, si ligatenga mweꞌnyaaja.
Uluumagu lunazununuke mwoꞌtudota.
Ibundo lyeꞌmirunga ligaamera mweꞌkibingu, naꞌkaliri.
8 Iyo munda igaaba injira mbamu.
Iyo njira, iziina lyayo «Njira yaꞌbataluule bali mu lenga mwo».
Abandu ba Rurema naaho, bo bagagilenga mwo.
Si abanabitalaalwe boohe, batâye hanguulwe.
Kiri naꞌbahwija, ndaaye úgagiterekera mwo.
9 Mwiꞌyo njira, mutâye lenge indare,
kandi iri izindi nyamiishwa ndangi.
Iyo njira, ngiisi bo Rurema agaaba aguluula naaho,
bo bâye gilenge mwo.
10 Ee! Iyo njira, ngiisi bo Nahano agaaba keera akiza, bo bagagigaluka mwo,
banayiji yingira mu kaaya keꞌSayuni, bagweti bagayimba ku bushambaale.
Bagakizi ba naꞌmalega, halinde imyaka neꞌmyakuula, mu kati koꞌbushambaale.
Umwizingeerwe neꞌkimombo, bigaaba keera byamala lwoshi-lwoshi.