Mutuli gwa kabiri
40
Ikitaabo kyoꞌkuholeezania
(40–55)
Nahano alagaania Abahisiraheeri kwo agabaguluula
1 Rurema winyu adetaga:
«Mukizi holeeza abandu baani. Ee! Mukizi baholeeza.
2 Yabo bandu beꞌYerusaleemu, mubamenyeese bwija-bwija,
kwoꞌbuja bwabo keera bwamala, keera banakogwa ibyaha byabo.
Ee! Ibyaha byabo byoshi-byoshi, keera Nahano akabahaniiriza hiꞌgulu lyabyo ubugira kabiri.»
3 Umundu agweti agayiberekania kwiꞌzu lihamu, ti:
«Mushongaanize Rurema Nahamwitu injira mwiꞌshamba.
Ee! Mugendi múgololera yo, halinde alonge ho agakizi lenga bwija.*40.3-5 Mataayo 3.3; Mariko 1.3; Luka 3.4-6; Yohana 1.23.
4 Ngiisi kabanda kakizi fulirwa.
Na ngiisi mugazi, na ngiisi higangazi, bikizi shaabulwa.
Injira zeꞌngofola, zigololwe.
Na ngiisi áhali ibihomogolo, hasimaanibwe.
5 Haaho, lyoꞌbulangashane bwa Nahano bugayerekanwa.
Abandu booshi kuguma, bagabubona.
Kwokwo, kwo Nahano adesiri.»
6 Izu ligweti ligaadeta: «Uberangire!»
Nanabuuza: «Aaho! Biki byo nangaberangira?»
Na wa naye, ti: «Udetage kwaꞌbandu booshi bali nga byasi.
Kundu bali mu ba banonosiri,
halikago, bali mu ba, ngoꞌtwaso naaho útugweti tugaholoka.†40.6 Yakobo 1.10-11; 1 Peturu 1.24-25.
7 Ikyanya Nahano ali mu tufuuha,
ibyasi binayami bogama, noꞌtwaso tunafwifwitire.
Ku kasiisa, abandu balyagagi nga byasi naaho.
8 Ibyasi biri mu bogama, noꞌtwaso tuli mu holokera haashi.
Halikago, igambo lya Rurema, lyohe,
liyamiri liri ho imyaka neꞌmyakuula.»
9 E Sayuni, ulyagagi ndumwa yoꞌkuleeta Imyazi Miija.
Kwokwo, uzamuukirage kwiꞌrango lyoꞌmugazi, gira ugimenyeese.
E Yerusaleemu, ugendi berangira, utanagire mbu uyobohe.
Ugendi bwira utwaya tweꞌBuyuda: «Lola! Rurema winyu, yonago!»
10 Nahano Rurema agweti agayija mu bukalage bwage.
Ali mu twala abandu ku bushobozi bwaꞌkahebuuza.
Na bwo agabahemba, ali mu yija agweti imbembo zaabo.‡40.10 Hisaaya 62.11; Bwigule 22.12.
11 Balya bandu baage, ali mu balanga, nga kwoꞌmungere ali mu langa ulukuuli lweꞌbibuzi.
Ali mu kizi batengetera mu maboko gaage.
Bali nga byanabuzi, bwo batuuziri hoofi-hoofi noꞌmutima gwage.
Ngiisi ibibuzi íbikiri mu yoza, ali mu birongoora ku butuudu.§40.11 Hezekyeri 34.15; Yohana 10.11.
Ndaaye úwangayigera Rurema
12 Aahago! Nyandi gundi keera úkagera inyaaja mu maboko gaage?
Kandi iri akoleesa ukuboko, mu kugera ikyanyaanya?
Nyandagi úyiji ubuzito bweꞌkihugo,
keera anagera imigazi noꞌtugangazi noꞌlugero?
13 Nyandi úkasobanukirwa neꞌshungi za Nahano?
Na nyandi úwangamúhanuula?*40.13 Barumi 11.34; 1 Bakorindo 2.16.
14 Ka Nahano angahanuusa umundu?
Kandi iri, ka angayigirizibwa, gira alonge ukusobanukirwa na íbiri biija?
Umundu, ka angamúyereka ngiisi kwo agaatwa imaaja ku njira yoꞌkuli? Nanga, maashi!
15 Si imwage, amahanga gooshi galyagagi nga ndonyi yaꞌmiiji naaho íyatonyera mu kirugu!
Binalyagagi nga lukungu naaho ku lugero.
Ali mu gera aba mu tulira nga lukungu ngana.
16 Ibiti byoshi byeꞌLebanooni, bitangakwiza ishaali,
mbu lyo Nahano alonga umuliro ku katanda kaage.
Kiri neꞌbitugwa, kundu bangabikumania byoshi,
mbu bamútangire amatuulo ágakwaniini, bitangakwira.
17 Imbere lya Nahano, ibihugo byoshi biri nga ndaabyo.
Agweti agabibona nga kindu busha,
na nga kindu kizira kamaro.
18 Aahago! Wangagera Rurema na nyandi?
Ashushiini na bikagi?†40.18 Mikolezi 17.29.
19 Ka bangamúshushaania noꞌmugisi? Nanga maashi!
Si umugisi, naluganda muguma ye mu gubiija.
Noꞌgundi, anagubugiirize kweꞌnooro,
anagulimbiise, mu kugubiika kwoꞌmugufu gweꞌharija.
20 Yizo nooro, umukeni iri angazibula,
ali mu toola imbahwa zoꞌmundalamuuka.
Analooze naluganda,
gira amúbaajire umugisi úgujingiriiri.
21 Aahago! Ka mutazi yuvwa? Ka mutazi na sobanukirwa?
Ka ndaaye mundu keera úkakubwira ukulyokera keera?
Heꞌkihugo kikabumbirwa, ka mutazindi sobanukirwa?
22 Rurema ayamiragi abwatiiri hala, hiꞌgulu lyeꞌkihugo.
Ikyanya ali mu langiiza abandu, bali mu boneka ngaꞌmahaazi naaho!
Ali mu tanuula igulu ngiꞌheema, gira akizi lituula mwo.
23 Si abatwali, boohe, agweti agabatindimaza.
Naꞌbatwi beꞌmaaja ba mu kihugo, ali mu bahindula babe tufwa-busha.
24 Yabo batwali balyagagi nga mbuto.
Ikyanya ziri mu byalwa, zinatondeere ukumera.
Haliko, ikyanya ziri mu yisa imizi mwiꞌdaho,
haaho, ali mu zifuuha, zinayami bogama.
Imbuusi ngayu iri mu yami ziyehuulira hala nga byula!
25 Ulya Mutaluule abuuzagya: «Aaho! Nyandi ye muganjushaania?
Ka hali ugundi úli nga nie?»
26 Muyinamulage amasu, gira mulangiize mwiꞌgulu!
Aaho! Yizo ndonde zooshi, nyandi úkazibumba?
Si Rurema ye mu yerekana ngiisi nguma yazo,
anakizi gibuuza kwiꞌziina lyayo.
Na bwo ye mwene ubushobozi bwaꞌkahebuuza,
ndaayo íri mu teereka, kiri neꞌnguma.
27 E Bahisiraheeri, mwe mukabutwa na Yakobo!
Kituma kikagi muli mu yidodomba kwokuno:
«Ala nie! Amalibu gaani, si Nahano atagabwini. Rurema wani atagweti agandwaza!»
28 Ka mutazi yuvwa? Ka mutazi sobanukirwa?
Nahano, ye Rurema weꞌmyaka neꞌmyakuula!
Ye kabumba byoshi íbiri mu mahanga gooshi.
Atâye luhe, atanâye yolohe.
Ndaanaye úwangasobanukirwa noꞌbwenge bwage.
29 Ikyanya abandu bali mu ba baluhiri, ali mu bakania,
halinde banashubi kana indege.
30 Kiri neꞌmisore iri mu luha, inatere indege.
Ee! Abatabana bali mu shenguka, banasiitare.
31 Halikago, ikyanya bali mu biika Nahano kwoꞌmulangaaliro,
lyeꞌndege ziri mu kana buhyahya.
Banabe nga nyunda úgweti úgakizi balala buzira kushagaania ibyubi hiꞌgulu.
Yabo batabana, kundu bangasuula umulindi, batagaluha.
Na kundu bagayitonda, batangahola.