47
Akaaya keꞌBabeeri kayogogozibwa
1 Nahano adetaga kwokuno: «E Babeeri,
ugoke, unayibwandalike mu luvu.
Utakiri mwami, utanâye ki huuzibwe mbu ubuyahiri, kandi iri mbu unonosiri.
2 Leero naawe, uyabiirage ulushyo, ugendi shya umushyano!
Uhogolage ikihunika kyawe, kiri niꞌkanju lyawe liija!
Ikyanya ugajabukaga inyiiji, uboneese ibibero.
3 Leero abandu bagaabona ngiisi kwo usigiiri bukondwe,
halinde banakizi kuteeza ishoni.
Ngayihoola ngana.
Ndaanaye úgambuza.»
4 Lukiza witu ali mu buuzibwa Nahano woꞌbushobozi bwoshi,
anali ye Rurema Mutaluule waꞌBahisiraheeri.
5 «Haliko wehe, e kaaya keꞌBabeeri!
Utâye ki buuzibwe Mugoli waꞌmaami.
Si ukizi bwatalaga mu kihulu, buzira kudeta.
6 Balya bandu baani, nꞌgatee barakarira,
nanabahana mu kuleka bagwatwe mu maboko gaawe.
Naawe, utanabakejeerera.
Kiri naꞌbashaaja mu kati kaabo, wanakizi babetuza imiteekerwa mizito-mizito.
7 Wâli kizi yihaya kwokuno: “Niehe, nyamiri ndi mugoli.”
Utâli zaazi kebukwa, mbu uyisalize ku byâye be.
8 Yuvwagwa! Buno, we gweti ugayisimiisa mu byaꞌmagala!
Uki vwagariiri, iri unayihaya kwokuno: “Ha nyuma lyani, ndaaye gundi!
Ndâye be namufwiri, ndanâye fwirwe naꞌbaana!*47.8 Bwigule 18.7-8.”
9 Si yago mahanya gombi, gagayami kuhikira ku lusiku luguma!
Ku lwolwo lusiku, ugafwirwa naꞌbaana, unabaagage namufwiri!
Kwokwo kwo bigaaba, kundu ulyagagi mulozi sizigirye,
unali munamaleere waꞌkaminuuza.
10 «Kundu ugweti ugayifunda mu bitali nga byo, utayobohiri,
unagweti ugayihaya, mbu: “Si ndaaye úmbwini!”
Yehee! Ubwenge bwawe noꞌbumenyi bwawe, si bikoli kutebiri.
Binagweti bigakulabiza, mu kukudeteesa, ti: “Ndi niehe naaho.
Ndaanaye gundi ye twangageranwa!”
11 Kundu kwokwo, ikyanya ubuhanya bugakuhikira, utagaki buyiyeka.
Ugahuura inguuke, utaganagiyinanuula kwo.
Kundu utabwini kwo we wangalongaga amakayu,
masaasa atabukwa, ugayami shereera lwoshi-lwoshi.
12 Ewe! Birya biheeko byawe, na yago maleere,
wâli kizi biyilala mwo ukulyokera ubwanuke bwawe.
Aaho! Buno, ugendererage naaho noꞌkukizi bikoleesa!
Si hali ikyanya wangabigenduukirwa mwo.
Hali neꞌkyanya wangabikoleesa mu kukangana!
13 Abandi, ikyanya bâli kizi kuhanuusa-hanuusa,
wanayami luha!
Aahago! Balya banabwenge beꞌndonde, babe bo bagakuyegeera,
gira bakukize!
Ee! Bagirage bakizi langiiza indonde,
banakulagule íbigaakuba kwo mu ngiisi mwezi, banakufuuse mu kati kaabyo.
14 Lolagi! Yabo banabwenge beꞌndonde, bagaki singooka nga kishuka kyumu.
Ngiisi ábalangaliiri indonde, balyagagi busha.
Bali nga byasi íbikola mu mala duba mu muliro.
Umuliro mwene yugwo, ndaaye mundu úwangagukaluuka.
15 Balya biira baawe mwâli kizi kola kuguma, ukulyokera mu bwanuke bwawe.
Kundu kwokwo, ndaaye kiri noꞌmuguma wabo úwangakukiza.
Si ngiisi muguma agakizi habuka kwage-kwage.»