46
Imizimu yeꞌBabeeri yayidendereka
1 Imizimu Beeri*46.1 kandi iri Baali. na Nebo, yeꞌBabeeri, leero ikola mu goka.
Iyo mizimu yo ishuba mu kizi lengezibwa naꞌbandu ku bisegengo, ikoli ba miteekerwa naaho, íri mu twalwa neꞌbitugwa.
Na bwo ikola mizito, ikoli bizidohiiri bweneene.
2 Iyo mizimu ikola mu goka.
Itanaki shobwiri ukuyikiza. Si yoshi, ikolaga mu twalwa mu mbohe!
3 Nahano adetaga kwokuno: «E Bahisiraheeri, beene Yakobo, mwe mukoli sigiiri!
Mundegage amatwiri.
Ukulyokera ku lusiku lwo mukabutwa kwo,
nâli kizi mùhahala.
4 Nganayama ndi Rurema winyu, halinde ku kyanya mwâye be bashaaja,
munabe mukoli hiiti invwi.
Ee! Nie kamùbumba.
Kwokwo, ngakizi mùkuya-kuya, na ngizi mùtengetera, na ngizi na mùkiza.
5 «Aaho! Ka halyagagi ye mwanganjushania? Aahabi!
Ndaaye tuyumiini!
6 Bandu baguma bali mu yona inooro zaabo, neꞌharija,
gira bakoleese umutuzi weꞌnooro, abalingaanize imigisi.
Irya migisi, ikyanya iri mu ba ikolaga ibiringiini,
banatondeere ukugifukamira, iri banagiyikumba.
7 Bali mu kizi gibetula ha bitugo, banagendi gishinga ahandu halebe.
Haaho, ho iri mu beera, itanashobwiri ukugira kwo ihashaage.
Na kundu abandu bangagitakira, itangahasha ukubashuvya.
Na kundu bangaba bagoozirwi, itashobwiri ukubatabaala.
8 «E ma! Si mukolaga bahuni.
Yago magambo, mukizi gayitoneesa kwo.
Mutagayibagire, si mukizi gakengeera.
9 Mukizi kengeera ibya keera.
Niehe nie Rurema. Hatanayimbwa gundi. Ndaanaye tuyumiini.
10 Ngiisi íbiri mu koleka,
nâli mali gwanwa nabimenyeesa ukulyokera ku ndondeko.
Kundu bitâli zaazi koleka,
haliko, nâli mali gwanwa namùmenyeesa byo.
Ngiisi byo njungisiri, byo biri mu koleka.
Ee! Ngiisi byo ndoziizi, byebyo, byo ndi mu gira.
11 Yizo shungi zaani, ndi mu hamagala umundu wani
ukulyoka isheere, ayiji zikwiza.
Uyo mundu alyagagi nga nyunda úgweti úgabalala mulindi.
Kwokwo, ngiisi byo nâli mali gwanwa nadeta, ngabikola.
Ee! Ngiisi byo njungisiri, ngabikoleesa.
12 Si mwehe muli mindagabika!
Munakoli yidulumbisiri mu bitali nga byo.
Kundu kwokwo, munyuvwirize.
13 Ngiisi íbikwaniini, ngola ngabigira.
Bitaganaki tinda, si ngola ngamùkiza bwobuno.
Ngola ngakiza akaaya keꞌSayuni.
Na mbiike ubulangashane bwani mu Bahisiraheeri.»