45
Nahano atoola mwami Kiiro
1 Nahano adetaga kwokuno, hiꞌgulu lya Kiiro, umutaluule wage:
«Ngakusikamya, gira uhime abaami beꞌmahanga,
halinde ubamale imisi lwoshi-lwoshi.
Ngayigulaga inyiivi zoꞌtwaya, zitanâye ki yigalwe.
2 Ngakizi gwanwa imbere lyawe, gira ngusemaanize imigazi.
Inyiivi ízikagirwa mu miringa, ngakizi zivungula,
na ndwise neꞌbyuma byoꞌkuzihamika.
3 Ibihinda byoshi íbishubi bishirwi, ngakuheereza byo.
Kwokwo lyo ugaamenya kwo nie Nahano, Rurema waꞌBahisiraheeri,
na kwo nie ndi mu kuhamagala kwiꞌziina lyawe.
4 E mwami Kiiro, ka uyiji íbitumiri nꞌgakuhamagala kwo uyiji ngolera?
Na kituma kiki nꞌgalumbuusa iziina lyawe, kundu utâli nyiji?
Íbitumiri nꞌgagiraga kwokwo, biri hiꞌgulu lyoꞌmukozi wani Yakobo, umutoolwa wani.
5 Niehe, nie Nahano. Ndaanaye gundi Rurema úli ho.
Kundu utâli nyiji, si ngweti ngakusikamya.
6 Kwokwo lyaꞌbandu booshi balongaga ukumenya kwo hatayimbwa gundi Rurema,
ukulyokera isheere halinde imuga.
Niehe naaho, nie Nahano, ndaanaye gundi.
7 Nie kalema umulengeerwe neꞌkihulu.
Nie mu gira umundu abe muhiirwa, kandi muhanya.
Birya byoshi, nie mu bigira, bwo nie Nahano.
8 «Ngiisi íbikwaniini, niehe Nahano nie kabibumba.
Kwokwo, e igulu! Umanulage ubuhimi, bukizi yija nga nvula.
E kihugo! Ikyanya bugayija, ubuyakiire, halinde bunamere.
Ee! Ubuhimi noꞌbukize bigamera kuguma.
Kwokwo, lyo tulonga ukukizibwa.»
Rurema ashobwiri byoshi
9 Yayewe imwa ngiisi ábagweti bagahagana noꞌMulemi wabo.
E balya! Si tuli nga kirugu kiꞌbumba!
Aaho! Kiꞌbumba lyangabuuzagya umubuuvi:
«Bikagi ugweti ugaagira? Si ndaabyo wahanya!*45.9 Barumi 9.20.»
10 Yayewe imwa ngiisi mwana úli mu bwira yishe:
«Ewe! Ibuta liki ubusiri?»
Anabwire na nyina: «Kituma kikagi wambuta kwoku?»
11 Nahano ali Mutaluule waꞌBahisiraheeri, anali ye mulemi wabo.
Adetaga kwokuno:
«Si mugweti mugambuuza, mbu biki íbyâye be?
Munali mu mbuuza ku biloziri abaana baani.
Ikyanya ndi mu kola igambo,
muli mu kizi mbamuliza hiꞌgulu lyalyo.
12 Kundu kwokwo, nie kalema ikihugo, na booshi ábakituuziri mwo.
Kiri niꞌgulu, nie nꞌgalitabika naꞌmaboko gaani,
nanaliyijuza indonde kandaharuurwa.
13 Uyo Kiiro, nie kamúleeta, gira akolage ngiisi íbikwaniini,
na ngizi múrongoora mu kati ka byoshi.
Yoyo, ye gashwekuula abandu baani,
anayubakulule akaaya kaani keꞌYerusaleemu.
Kundu kwokwo, ndaakyo kitulire kyo agaalya.»
Kwokwo, kwo Nahano woꞌbushobozi bwoshi adesiri.
14 Nahano adetaga kwokuno:
«Abamiisiri bagaaba bandu baawe,
kuguma naꞌBahendyopiya, naꞌBasheeba.
Ibindu byabo, we bigayegukira.
Bagakizi yija bakushalagiiri nga mbohe ízishwesirwi neꞌmigufu,
banakizi kufukamira, iri banadeta:
“Ku kasiisa mutuliinwi na Rurema. Ndaanaye gundi úli ho.”»
15 E Bahisiraheeri, Rurema winyu, kundu atabonesiri,
haliko ye Lukiza.
16 Ikyanya abandu bali mu baaja imigisi, bagateezibwa ishoni.
Balya booshi, bagateteerwa.
17 Si Abahisiraheeri boohe, keera Nahano akabakiza halinde imyaka neꞌmyakuula.
Batâye ki longe ishoni, batanâye ki teteerwe.
18 Nahano Rurema, ye kabumba igulu, neꞌkihugo, anabisikamya.
Na íbitumiri akagiraga kwokwo, kutali mbu kituule kimaata. Nanga, maashi!
Si akabumba abandu kwo bakituule mwo,
anadetaga kwokuno: «Nie Nahano, ndaanaye gundi.
19 Ndali mu detera mu kwaha, kandi iri mu kihulu.
Ndanabwiziri beene Yakobo kwo bakizi ndooza ku kimaama. Nanga, maashi!
Niehe, nie Nahano.
Na ngiisi byo ndi mu deta, biri byoꞌkuli, binakwaniini.
20 «Mwe mukafuushukaga mu mahanga!
Mukuumane kuguma, munanyijire.
Bandu baguma bali mu gugumira imigisi, ikanabaajwa mu biti naaho!
Haliibwi! Si balyagagi bahwija naaho!
Irya migisi, kundu itashobwiri ukubakiza, si bakiri mu gitabaaza.
21 Balya bandu, mubabwirage kwo banyijire.
Ee! Tuganuulire kuguma!
Ngiisi íbiri mu koleka buno, nyandagi úkagwanwa abiyerekana?
Ka hali úkagwanwa abimenyeesa? Nanga, maashi!
Si niehe Nahano naaho nie kabideta!
Kwokwo, ndaaye gundi Rurema, átali niehe.
Nie Lukiza úkwaniini, na ndi Rurema woꞌkuli.
Ndaaye gundi úli ho!
22 Mweshi, mwe mulyagagi mu mahanga gooshi! Mungalukire, lyo mukizibwa.
Nie Rurema, ndaanaye gundi.
23 Keera nꞌgabiika umuhango, nanabiika indahiro kwiꞌziina lyani,
kwo ngiisi mundu âye ki fukame imbere lyani, anadete kwo nie Rurema.
Yiri igambo, nalideta ku njira íkwaniini, litanâye ki hinduke.†45.23 Barumi 4.11; Bafiripi 2.10-11.
24 Abandu bagaadeta hiꞌgulu lyani kwokuno:
“Nahano naaho, ye mu gira íbikwaniini,
ye na mwene ubushobozi.”»
Haliko, ngiisi ábakamúrakarira,
boohe, bagakizi múyijira bali jabati-jabati, banateezibwe ishoni.
25 Si hiꞌgulu lya Nahano, Abahisiraheeri bagakizi haruurwa kwo bo bakwaniini,
banakizi múhuuza.