44
Nahano naaho, ye Rurema
1 Nahano adetaga kwokuno:
«E Bahisiraheeri, beene Yakobo!
Keera nꞌgamùtoola, munakola bakozi baani.
Ku yukwo, mundegage amatwiri.
2 E beene Yakobo, keera nꞌgamùbumba, nanamùtoola.
Na buno, mukola bakozi baani.
Kiri neꞌkyanya mutâli zaazi butwa, nâli kizi mùlanga mu nda.
Kwokwo, mutayobohe! Mukuba, ngakizi mùtabaala.
3 E Bahisiraheeri, ikihugo kiinyu, kundu kikoli yumagusiri,
haliko, ngakizi kinywisa, na ngishyose mweꞌnyiiji.
Abandu beꞌkibusi kyawe, ngabayijuza mwoꞌmutima gwani.
Na ngizi bagashaanira, halinde ku bashokuluza baabo.
4 Bagakizi kuluuduka nga kibingu,
banabe nga kiti íkimeziri ku ngombe yoꞌlwiji.
5 Mundu muguma angadeta kwokuno:
“Niehe, ndi wa Nahano.”
Ugundi, ti: “Naani, ndi mwene Yakobo.”
Ugundi anayiyandike mu kigasha, ti: “Niehe, ndi wa Nahano.”
Ugundi kandi anakizi koleesa iziina Hisiraheeri.»
6 Nahano woꞌbushobozi bwoshi, ali mwami waꞌBahisiraheeri, ye na Lukiza wabo.
Adetaga kwokuno: «Niehe nie ndangiriro, na ndi nie nyukizo.*44.6 Hisaaya 48.12; Bwigule 1.17; 22.13.
Ha nyuma lyani, ndaaye gundi Rurema.
7 Aaho! Nyandi gundi úli nga nie?
Iri angabiiri ali ho, ayimenyeese ku bweranyange.
Andondobolere íbikakoleka yaho keera,
ukulyokera ho nꞌgabiikira abandu baani.
Anadete kwakundi na íbigaki koleka.
8 «Mwehe, mwe bandu baani! Aaho! Mutakizi yoboha, mutanajugume.
Ka ndakagwanwa namùbwira ibyâye be, ukulyokera yaho keera?
Si mwe mulyagagi tumasi twani!
Ka halyagagi ugundi Rurema átali niehe? Nanga, maashi! Atayimbwa ho!
Nie Lwala lwinyu. Ndaanaye gundi ye nyiji.»
Imigisi, ndaabyo yangahanya
9 Ngiisi ábagweti bagabaaja imigisi, balyagagi tufwa-busha.
Kundu bali mu gihuuza, si ndaako kamaro ko ibahitiiri.
Ngiisi ábali mu gitangira ubumasi ziryagagi mbumi, banali bahwija.
Yehee! Si bâye teezibwe ishoni!
10 Ikyanya abandu bali mu yibaajira imigisi mbu yo bagakizi yikumba,
ndaabyo bayungusiri.
11 Iyo migisi, ku kasiisa, ngiisi ábali mu gibaaja, bali bandu naaho.
Kyo kitumiri balya booshi bâye teteerwe.
Aahago! Booshi bakumanage, gira bayibonese.
Yehee! Bagahuumirwa ngana!
12 Umutuzi weꞌbyuma ali mu duusa ikyuma mu kiiko, gira akityaze.
Ha nyuma, anakoleese amaboko gaage, mu kutula umugisi neꞌnyundo.
Si ikyanya ali mu ba ashalika, ananyoterwe.
Imisi yage inayami tera, analuhe.
13 Umubaaji weꞌbiti naye, ali mu koleesagya umugozi, mu kugera ulupahwa,
anatee lushoora kwoꞌmugisi noꞌmunduza,
abuli lubera noꞌmusumeeni.
Ha nyuma, analugooyage niꞌranda,
halinde injusho yagwo inasimiise.
Yugwo mugisi, banagubiike mwiꞌheero.
14 Hali ikyanya ali mu kuba ikiti kiija mu lubako,
kiba ngaaja-malungu, kandi iri kyoꞌmwerezi,
kandi iri kyoꞌmwalooni, kandi iri kindi-kindi.
Na kwakundi, angabyala ibiti byeꞌshindano,
kandi iri bikizi mera byonyene mu lubako, binakuluuduke neꞌnvula.
15 Yibyo biti, biguma bigagendi ba shaali.
Ali mu kizi zitwana, anakaluuke, kandi iri ayokye mweꞌmikate.
Neꞌzindi, anakizi baaja mweꞌmigisi, anabuli kizi giyikumba.
16 Aahago! Ku zeezo shaali, angazitwana, anayokye mweꞌnyama,
analye, halinde anayigute.
Neꞌkyanya ali mu ba akaywiri, anakaluuke.
Anayimwemuze, ti: «Keera nakaluuka!
Na ngola mu bona ulukeera lwoꞌmuliro.»
17 Ngiisi ízasigala, angazibaaja mwoꞌmugisi gwage.
Yugwo mugisi, anakizi gufukamira mu kuguyikumba,
iri anadeta: «Ewe! Si we ndi mu yikumba. Ungizagye, ma!»
18 Yabo bandu, si balyagagi bizeeze! Ndaanahyo bayiji.
Amasu gaabo, kiri naꞌmenge gaabo, bikubisirwi.
Batangabona íhiteerwa ku shinda, batanganasobanukirwa.
19 Mu kati kaabo, si ndaaye mwenge kandi iri mwitegeereza, úwangayisaliza, ti:
«Ishaali nguma, nꞌgazitwana, nanaziyokya mweꞌmikate.
Neꞌzindi nanaziyokya mweꞌnyama, nanagilya.
Na ízikasigalaga, nanazibaaja mweꞌkyagaza kyoꞌmugisi.
Yoho wee! Si ulushaali úlusigiiri, lwolwo, lwo ngweti ngayikumba!»
20 Aahabi! Inzaliro zaabo, ziryagagi ku munyota-kiiko naaho.
Umundu mwene uyo, akoli habusiri, atanganahasha ukuyikiza.
Anakoli vujuusiri mu bitali nga byo.
Mu kati kaabo, ndaaye úwangatumburukwa, mbu adete:
«Yoho wee! Kino nvumbiiti, gulyagagi mugisi kafwa-busha!»
Abahisiraheeri, Nahano atâye bayibagire
21 «E Bahisiraheeri, beene Yakobo! Si muli bakozi baani!
Aahago! Yago magambo, mukizi gakengeera.
Nienyene, nie kamùbumba. Ndanâye mùyibagire, kiri neꞌhiniini.
22 Amahube giinyu, keera nꞌgagahotola,
nga kibungu íkiri mu nyerera mu kyanyaanya.
Nanakumuula ibyaha biinyu nga ndara.
Aaho! Bwo keera nꞌgamùguluula, mungulikirage.»
23 Ewe igulu! Uyimbage ku bushambaale.
Si Nahano keera akakola bweneene!
E kihugo, ukizi banda akabuuli, awi yiyi yiyi!
Na niinyu mwe migazi! Muyitulikanie mu kuyimba,
kuguma neꞌmbako, neꞌbiti byayo byoshi.
Nahano keera akaguluula Abahisiraheeri, beene Yakobo,
anabayereka ubulangashane bwage.
24 Nahano, Lukiza wawe, akakubumba mu nda ya nyoko.
Anadetaga kwokuno: «Ibindu byoshi, nie kabibumba.
Ee! Nienyene nie katabika igulu, nanabumba neꞌkihugo.
25 Abaleevi beꞌkinyoma, ndi mu babuligania.
Naꞌbalaguza, ndi mu bakubika.
Abenge, kundu bangagiraga mbu badete, haliko ndi mu bahubiisa.
Kundu basomiragi, si ngayerekana ngiisi kwo balyagagi bahwija.†44.25 1 Bakorindo 1.20.
26 Si abakozi baani, boohe, ikyanya bali mu deta amagambo, ndi mu gakwiza.
Ngiisi byo nꞌgagwanwa nabatuma kwo badete, byo na byebyo ndi mu gira.
Nabwira akaaya keꞌYerusaleemu kwokuno:
“Abandu bagashubi kutuula mwo.”
Noꞌtwaya tweꞌBuyuda, ninatubwire: “Bagaki yubakulula inzitiro zaawe.
Ee ma! Ibiguuka byawe, ngashubi biyubakulula.”
27 Amabenga gaꞌmiiji, ngagahamuliza, ti: “Mukame!
Kiri neꞌnyiiji ziinyu, ngazikamya.”
28 Ngadetaga hiꞌgulu lya mwami Kiiro kwokuno:
“Kiiro akola agarongoora abandu baani!
Ngiisi byo njungisiri, ye gabikwiza.”
Uyo Kiiro naye anakyulage kwaꞌkaaya keꞌYerusaleemu kayami yubakululwa,
anabwire inyumba yani: “Ewe! Indaliro zaawe, bazibiikage!”»