43
Abahisiraheeri baguluulwa
1 E beene Hisiraheeri! Nahano, ye kamùbumba,
anadetaga kwokuno:
«Mutakizi yoboha! Si keera nꞌgamùhamagala mwiꞌziina liinyu,
nanamùguluula, halinde mwanaba bandu baani!
2 Kundu mwangalenga áhayisiri mwiꞌbenga lyaꞌmiiji,
tugaaba tuliriinwi.
Na kundu mwangajabuka inyaaja,
mutagazika.
Na kundu mwangalenga mu muliro, mutâye hiire.
Imbigi zaagwo zitâye mùsingoole.
3 Niehe, nie Nahano Rurema winyu!
Ndi Mutaluule waꞌBahisiraheeri, na ndi nie Lukiza winyu.
«Mu kumùguluula, nꞌgatanga ikihugo kyeꞌMiisiri,
kiri na kyeꞌKuushi na kyeꞌSheeba.
4 Emwe! Yabo bandu bingi, keera nꞌgabatanga, lyo nimùlonge.
Mukuba, nimùkuuziri, ninamùsimbahiri.
Mwehe, mwe muli neꞌkishingo bweneene imbere lyani.
5 «Aahago! Bwo tuliriinwi, mutayobohe.
Mwe naꞌbaana biinyu, ngamùgalula ukulyoka isheere, noꞌkulyoka imuga,
ninamùkuumanie imwani.
6 Ngabwira ikisaka neꞌmbembe:
“Muleke abandu baani banyijire. Mutabahangirire!”
Mungalulire bagala baani na banyere baani,
balyoke mu mahanga, heꞌkihugo kihekiiri.
7 Yabo booshi bayije imwani, kwo bali mu buuzibwa kwiꞌziina lyani.
Nie kababumba, gira mbalongere mwoꞌbulangashane.»
Abahisiraheeri bali tumasi twa Nahano
8 Abandu, kundu bahiiti amasu, si batabwini.
Na kundu bagweti amatwiri, si batayuvwiti!
Kundu kwokwo, mubaleetage imwani!
9 Ee! Mukuumanie ibinyamahanga byoshi.
Iyo myazi yoshi, mu migisi yabo, guhagi úgukagwanwa gwadeta kwo bigakoleka?
Si ndaagwo!
Iri yangahasha ukutulagula, ileetage utumasi twabo, tusise.
Kwokwo, lyo twangabayuvwiriza, tunayemeere, ti: «Kwo biri.»
10 Nahano adetaga kwokuno: «E Bahisiraheeri, si mwe mulyagagi tumasi twani!
Keera nꞌgamùtoola, kwo mube bakozi baani,
na ndoziizi mumenye kwo nie Rurema, munabe munyemiiri.
Ndaaye gundi Rurema úzindi tanga imbere lyani,
ndaanaye úwâye nzinde ho.
11 Niehe naaho nie Nahano.
Ndaanaye gundi úwangaguluula abandu, átali nienyene.
12 Nie kamùlagaania kwo ngamùkiza, kunali kwo bikaba.
Mu migisi íri mu yikumbwa mu mahanga, ndaaye gundi úkagwanwa agira kwokwo.
Si mwe mulyagagi tumasi twani!»
Kwokwo, kwo Nahano adesiri.
13 «Niehe nyamiri ndi ho, ukulyokera ku ndondeko.
Ikyanya ndi mu ba ngweti ngaakola, ndaaye úwangambangirira.
Ndaanaye úwanganyugutula umundu mu maboko gaani.»
Abahisiraheeri baguluulwa ukulyoka i Babeeri
14 E Bahisiraheeri, Nahano Lukiza winyu, anali ye Mutaluule, adeta kwokuno:
«Hiꞌgulu liinyu, ngalungika abasirikaani bagendi teera i Babeeri.
Inyiivi zaꞌkaaya kaabo, ngazivungula.
Balya Bababeeri banabuli bululuka.
15 E Bahisiraheeri! Niehe, nie Nahano, Umutaluule winyu.
Nie kamùlema, na ngola Mwami winyu.»
16 Nahano adetaga kwokuno:
«Yaho keera nꞌgaberaga injira mu nyaaja.
Iyo nyaaja, kundu yâli yisiri, haliko, nꞌgagibunduula mweꞌnjira.
17 Nꞌgaleeta ibikalage byaꞌbasirikaani beꞌMiisiri,
kuguma naꞌmagaare giꞌzibo, neꞌfwarasi.
Yibyo byoshi, byanayami bindikirwa!
Batâye ki yinamuke, bwo bakashereera booshi, nga kwoꞌlutambi lwiꞌtara luli mu zimuuka.
18 Aaho! Birya bya keera, byoshi, mukizi biyibagira.
Iri byangaba keera bikalenga, mutanakizi ki biyitoneesa kwo.
19 Lolagi! Ngolaga ngaagira igambo lihyahya.
Na buno, likola mu boneka. Ka mutalibwini?
Iyo munda mwiꞌshamba, ngaabera yeꞌnjira, ninahingiise mweꞌnyiiji.
20 Neꞌkyanya ngazishyosa mwo,
kiri neꞌnyamiishwa zigakizi nzimbaha, ngeꞌmirunga na banafufulu.
Keera nꞌgayitoolera abandu baani,
nganabaheereza amiiji, bakizi nywa.
21 Nie kabayibumbira, gira bakizi mbuuza!»
Nahano abuulania Abahisiraheeri
22 «E Bahisiraheeri, beene Yakobo! Si mutali mu ndabaaza!
Yoho wee! Keera mukannenuuka!
23 Mutakiri mu nzimbaha,
mu kundeetera ibibuzi biinyu, kandi iri bindi bitugwa.
Ndashubi mùzidohiiri, mbu mundangire amatuulo goꞌmushyano,
ndanamùhuuna kwo munyokere umubadu.
24 Iri muli mu gulaga amalaasi geꞌkishingo,
ndali nie muli mu gagulira.
Neꞌkyanya muli mu tanga amatuulo geꞌbinyule,
ndali nie muli mu ba mwagatangira.
Mukuba, mukoli nzidohiiri neꞌbyaha biinyu,
keera mwananduhya bweneene!
25 Kundu kwokwo, yibyo byaha biinyu, ndi mu bihotola.
Ee! Keera nꞌganabikoga, ndanâye ki shubi bikengeera. Mukuba, kwokwo kwo nꞌgashungika nienyene.
26 «Mungengeeze ngiisi byo muli mu njumuza kwo, gira tubibuulane.
Ee! Mundereke, gira tulole iri muganzinda.
27 Aaho! Bashokuluza biinyu, bo bakatangi yifunda mu byaha.
Kiri neꞌbirongoozi biinyu, nabo banahuna imbere lyani.
28 Ku yukwo, kundu nꞌgataluulaga abagingi biinyu,
ngola ngabateeza ishoni.
Ngola ngaaleka Abahisiraheeri, beene Yakobo, bakizi tukwa.
Ngaaleka bashereezibwe lwoshi-lwoshi.»