42
Umukozi úwatoolwa na Nahano
1 Lolagi! Uyu, keera nꞌgamútoola, anali ye mukozi wani.
Keera nꞌgamúkania umutima, ananzimisiizi bweneene.
Ngamúbiika mwoꞌmutima gwani,
gira amenyeese ibinyamahanga ngiisi íbikwaniini imbere lyani.*42.1-4 Mataayo 12.18-21.
2 Uyo mukozi wani atagakizi banda akashiba, kandi iri kuyamiza.
Izu lyage, ndaaye úgaliyuvwa mu njira.
3 Ikyanya isanga likoli gingiiri, atagalidongoola.
Neꞌkyanya itara likola mu fwifwitira, atagalizimya.
Agayihangaana, halinde abandu balonge ukuli kwabo.
4 Atâye vunike umutima, atanâye hebuure.
Agayitanga, halinde abandu booshi balonge íbikwaniini.
Kwokwo, ikyanya agayigiriza,
ibinyamahanga bigakizi biika amagambo gaage kwoꞌmulangaaliro.
5 Nahano Rurema ye kalema igulu, analiyajuula.
Ye kanagangaaza ikihugo na íbikimeziri mwo, ye nali mu heereza abandu baamwo ubugumaana.
Kiri neꞌbindi biremwa, Nahano ye mu bibiika mwoꞌmuuka,
binabe bigumaana.†42.5 Mikolezi 17.24-25.
Nahano adetaga kwokuno: 6 «Niehe, nie Nahano.
Keera nanakubwira kwo ukizi kulikira íbikwaniini.
Ngakugwatira ku kuboko, mu kukulanga.
Ku njira yawe, nganywana ikihango naꞌbandu baꞌmahanga gooshi,
iri na ngizi batanguulira.
7 Ugakizi humuula imbumi,
unakizi shwekuuza imbohe.
Kundu zitundamiragi mu kihulu mu nyumba zeꞌmbohe,
ugazilyosa mwo.
8 «Niehe nie Nahano. Yiryo iziina, liri lyeꞌmwani naaho!
Ubulangashane bwani, ndagabushangiira noꞌgundi yeshi.
Ndanâye leke ubwivuge bwani buhaabwe imigisi.
9 Lolagi! Ngiisi byo nꞌgagwanwa nadeta, keera byakoleka.
Na buno, ngola mu menyeesa ibihyahya.
Ee! Ngola mu mùganuulira byo, bítazi koleka.»
10 Mukizi yimbiraga Nahano ulwimbo luhyahya!
Mukizi múyimbira lwo, hooshi mu kihugo.
Mukizi múyimbira, mwe muli mu balama mu nyaaja,
na mwe biremwa íbiziri mwo.
Mukizi múyimbira, mwe bandu ábatuuziri mu mbeka zeꞌkihugo.
11 Ngiisi ábatuuziri mwiꞌshamba, bakizi múyimbira kwiꞌzu lihamu!
Na ábatuuziri mu maheema geꞌKedaari, bakizi múhuuza.
Abatuulaga beꞌSeela babandage utubuuli, awi yiyi yiyi!
Ee! Bakizi banda utubuuli kwiꞌrango lyoꞌmugazi.
12 Abatuulaga ba mu tulira, nabo
bakizi huuza Nahano.
13 Nahano agagenda mwiꞌzibo, alyagagi kikalage.
Ikyanya agagendi lwa, agaaba ali musirikaani úkoli rakiiri.
Ikyanya agakizi teera abagoma, agakizi banda akashiba,
anakizi bayamulula lwoshi-lwoshi.
Rurema alagaania abandu baage kwo agabatabaala
14 Nahano adetaga kwokuno:
«Nâli yamiri ndi munyerere. Ee! Nâli hulisiri, shee!
Haliko buno, ngolaga ngabanda akaluulu, ngoꞌmukazi úgweti úgaabuta,
anabe agweti agayinekeera, iri anahemagira.
15 «Ngashereeza imigazi noꞌtugangazi, bihinduke ishamba.
Ibyasi byoshi, ngabiyumya.
Ngayumya neꞌnyiiji neꞌbirigo, bihinduke luumagu.
16 Ngakizi leeza imbumi mu njira yo zitayiji,
na nzirongoore ho zitazindi lenga.
Na mbahindulire ikihulu, gube mulengeerwe.
Ngakizi balingaaniza ho bagakizi lenga.
Byebyo, byo njungisiri ukugira, ndanâye bileke.
17 «Halikago abandi, si boohe, babiisiri umulangaaliro imweꞌmigisi,
banali mu gibwira mbu: “Mwe tukola tugakizi yikumba.”
Aahabi! Si yabo bandu bagateteerwa ngana!»
Abahisiraheeri bali bimeme na mbumi
18 «E bimeme, mugirage muyuvwirize.
Na mweꞌmbumi, muloleekeze, lyo mubona.
19 «Aahago! Nyandi úhumiri? Si ali umukozi wani, Hisiraheeri!
Na nyandagi úli kimeme? Si ali ngiisi ye ndumiri!
Ndaaye úhumiri nga balya bandu baani!
Umukozi wani, ye humiragi bweneene!
20 «E Bahisiraheeri! Kundu keera mukabonaga amagambo mingi,
si mutagatwaziizi kiri neꞌhiniini.
Na kundu amatwiri giinyu gayigusiri,
si ndaabyo muli mu tami yuvwa.»
21 Nahano ayamiri ali mwemeera.
Kyo kitumiri akakuza amigirizo gaage, gakizi ba gaꞌkahebuuza.
22 Halikago abandu baage, keera bakashahulwa ibindu.
Yabo booshi, keera bakayihongoleka mu buhya,
kandi iri kutwalwa mu nyumba yeꞌmbohe.
Keera bakanyagwa, ndaanaye úkabafuukiza ibindu.
Bakatwalwa imbohe, ndaanaye úkagendi baguluula yo.
23 Yago magambo ga keera, nyandi úwangagayuvwiriza,
halinde anasobanukirwe na íbigaki yija?
24 Twe beene Yakobo, ikyanya twâli kizi nyagwa,
nyandi uwâli kizi tunyagiisa? Ka atali Nahano?
Ee! Keera tukamúhubira, twanalahira ukukulikira injira zaage.
Kiri neꞌmaaja zaage, tutanazitwaza.
25 Kyo kikatuma agaturakarira bweneene,
anatuleka tuyogogozibwe mwiꞌzibo lyeꞌngunguula.
Uburaakari bwage butusokaniini nga ngulumira.
Kundu kwokwo, tutazi sobanukirwa.
Yubwo buraakari, kundu bukahambiri tujigiivya,
si tutaki butwaziizi.