50
Nahano adetaga kwokuno:
«Ka nꞌgamùguza mu buja, lyo ndiha imyenda? Nanga!
Ka nyoko atakiri ho, mbu bwo nꞌgamúyimula,
mu kumúyandikira amaruba goꞌkumúlahira?
Nanga, maashi! Yago maruba, iri gangaba gali ho, muganyereke.
Si mwehe, íbitumiri mukaguzibwa, biri hiꞌgulu lyeꞌbyaha biinyu.
Kiri na nyoko, naye akayimulwa hiꞌgulu lyoꞌbuhuni bwinyu.
Ikyanya nꞌgayija, si ndaaye mundu ye nꞌgagwana!
Ikyanya nꞌgayiguza, ndaaye úkayitaba.
Aaho! Ka mutoniragi kwo ndashobwiri ukumùkiza?
Si ndi mu yami kamya inyaaja mu kudeta naaho!
Neꞌnyiiji kwakundi, ndi mu zikamya, libe ishamba,
halinde ifwi zooshi zinayami fwa, zinabole.
Kiri neꞌkyanyaanya, nie tumiri kiri mu hinduka kihulu.
Na ndi mu kibwikira noꞌmwizingeerwe.»
Umukozi wa Nahano
Nahano Rurema akanjoboleesa ukudeta ku njiri íkwaniini.
Kwokwo, ikyanya abandu bali mu ba bakoli luhiri, ndi mu bakania indege.
Ngiisi shesheezi, Nahano ali mu zindukiri nvyula,
ananyereke ngiisi kwo aloziizi.
Nahano Rurema ali mu ndabaala ukuyiga.
Ndali mu mútenguha, ndanali mu múhindulira ingoto.
Ikyanya abandu bâli mu ngubula ingoni, na mbatege umugongo.
Neꞌkyanya bakanguula ulwanwa, nanabatega amatama.
Kiri neꞌkyanya bali mu mbonyoleza, noꞌkundwira amate,
ndali mu babisha amalanga.* 50.6 Mataayo 26.67; Mariko 14.65.
Nahano Rurema, bwo ali mu ndabaala,
ndagateezibwa ishoni.
Keera nahiga kwo ngakizi gira ngiisi byo aloziizi,
na nyiji kwo ndagaki teteerwa.
Aaho! Nyandi úkiri mu mbuulania?
Si Rurema akola hoofi, ye na gweti úgambulanira.
Kwokwo, uyo mugoma ayijage tubuulane.
Ee! Anyegeerage, ayiji ndega!
Lolagi! Nahano Rurema ye mu ndabaala.
Aaho! Nyandagi kandi úki shobwiri ukundwira ulubaaja? 50.9 Barumi 8.33-34.
Balya bagoma baani booshi, bagahula nga mirondo,
akashwa kanabakegete.
 
10 Mu kati kiinyu, nyandagi úyobohiri Nahano,
anabe asimbahiri umukozi wage?
Iri wangaba ukiri mu genda mu kihulu buzira itara,
ugire ukizi yihega ku Nahano Rurema, unamúbiike kwoꞌmulangaaliro.
11 Si mwehe mugweti mugatwana umuliro gwinyu naaho,
mbu lyo mulonga ukubona!
Ngahwe! Gendereragi na gwogwo,
gubaagage gwo mugabiika kwoꞌmulangaaliro.
Kundu kwokwo, lolagi ngiisi byo Nahano agamùhemba ubuzinda:
ikyanya mugagwejera, mugalyanirwa bweneene!

*50:6 50.6 Mataayo 26.67; Mariko 14.65.

50:9 50.9 Barumi 8.33-34.