51
Abandu beꞌSayuni bagaguluulwa
1-2 Nahano adetaga kwokuno:
«Mukoli fitiirwi bweneene ku bikwaniini, munaloziizi ukungulikira.
Aaho! Mundegage amatwiri. Muloleekeze ku Hiburahimu!
Uyo Hiburahimu ali ngiꞌbuye lyo mukalyosibwa mwo.
Rurema yenyene akamùlyosa mu lwajwe.
Uyo Hiburahimu, bo na mukaage Saara, bo bashokuluza biinyu.
Aaho! Mukizi bakengeera.
Uyo Hiburahimu, ikyanya nꞌgamúhamagala, ndaaye mwana ye âli hiiti.
Kundu kwokwo, nanamúgashaanira, halinde anaba mubusi ngana-ngana.»
3 Kwokwo, naꞌkaaya keꞌSayuni, kundu kakashaka,
haliko Nahano agaki kaholeeza, mu kushubi kashakuulula.
Kundu kakoli ba ngiꞌshamba,
halikago, agaki kahindula, kabe nga ndalo yeꞌHedeni, irya ndalo ya Nahano.
Abandu bagakizi kashambaalira mwo,
iri banatanga kongwa, mu kuyimba inyimbo zoꞌbwivuge.
4 «Mwe bandu baani! Munyuvwirize bwija.
Bwo mulyagagi bandu baani, mundege amatwiri.
Ngakizi yigiriza abandu imaaja zaani, na íbikwaniini,
halinde bikizi molekera ibinyamahanga byoshi.
5 Ngola ngamùkiza, namùleetere ibyoꞌkuli.
Yibyo byoꞌkuli, ngabileetera kiri neꞌbinyamahanga byoshi,
mu kukoleesa ubushobozi bwani.
Yabo booshi bakolaga bagandangaalira,
halinde mbatabaale.
6 Muyinamulage amasu, munalegamire mwiꞌgulu,
munalole na haashi mu kihugo.
Yiryo igulu liganyerera duba nga kyusi.
Neꞌkihugo kinahule nga mulondo.
Ngiisi ábakituuziri mwo, bagaafwa nga saazi.
Kundu kwokwo, ubukize bwani bwohe, bugaaba bweꞌmyaka neꞌmyakuula.
Ubwija bwani butâye male.
7 «Mwe musobanukiirwi na íbikwaniini!
Munyuvwirize.
Mwe mukulikiiri amigirizo gaani!
Kundu abandu bagweti bagamùgayiriza, mutabayobohe.
Ikyanya bali mu mùhonyoleza, mutakizi batwaza.
8 Yabo bandu, akashwa kagaki balya, nga kwo kali mu tetemba imirondo.
Ibizimu nabyo, bigabatetemba, nga kwo biri mu tetemba ubwoya bweꞌkibuzi.
Kundu kwokwo, ubwija bwani bwohe, bugayama ho imyaka neꞌmyakuula.
Ubukize bwani bugagendera mu bibusi byoshi.»
9 E Nahano woꞌbushobozi bwoshi! Vyuka maashi! Uvyukage!
Ukizi koleesa ubushobozi bwawe, nga kwo wâli kizi gira yaho keera.
Aaho! Ka utali we katema-tema kirya kingisho-ngisho Rahabu?
Ka utanali we katumita kirya kingisho-ngisho kyoꞌmujoka gwa mu nyaaja?
10 Na kundu inyaaja yâli yisiri bweneene, we kagikamya.
Ukagibera mweꞌnjira, halinde abandu baawe banajabuka.
11 E Nahano! Bwo ukaguluula abandu baawe, bagaki galuka i Yerusaleemu,
bagweti bagatamba-tamba ku kisegengo.
Emwe! Bagaaba bashambiiri imyaka neꞌmyakuula!
Umwizingeerwe neꞌkimombo, bigaaba keera byamala lwoshi.
Amalanga gaabo gagaaba gakoli yijwiri ibimwemwe.
12 Nahano adetaga kwokuno:
«Mumenye kwo niehe, nie ndi mu mùholeeza.
Aaho! Kituma kiki muki yobohiri abandu, banali ba kufwa naaho?
Si bagaahera nga byasi!
Kituma kiki baki gweti bagamùkanga?
13 Si nie Nahano, nie kamùbumba!
Aaho! Kituma kiki wanyibagira?
Nie katabika igulu, nanabiika neꞌndaliro zeꞌkihugo.
Aahago! Yabo banakahambwa, kituma kiki muki bayobohiri?
Kundu bâli kizi mùlibuza, banagire mbu bakizi mùshereeza,
haliko leero bakolaga hayi?
14 Abandu, kundu baki shwesirwi mu mbohe,
si bakola bu shwekuulwa buzira kutinda.
Batagafwira mwo, bataganakena ibyokulya.
15 Nie Rurema Nahamwinyu.
Ndi mu kunduza inyaaja, halinde imidunda yayo inakizi lunduma.
Iziina lyani, nie Nahano woꞌbushobozi bwoshi.
16 Keera nakuheereza amagambo, gira ukizi gadeta.
Ngamùbwikira naꞌmaboko gaani, mu kumùlanga.
Nie kayajuula igulu. Nie kanabiika indaliro zeꞌkihugo.
Keera nanabwira abandu beꞌSayuni kwokuno:
“Mwehe, mwe bandu baani.”»
17 E Yerusaleemu, uvyukage, unayimuke! Keera Nahano akakurakarira,
anakuhana ku bute bwage, kwo buli nga divaayi mu rusoozo.
Iyo divaayi, wanagigutiira.
Neꞌkyanya ukagimala lwoshi, wanatondeera ukubambaajira.*51.17 Bwigule 14.10; 16.19.
18 Kundu ukabuta abaana bingi bweneene,
haliko ndaaye úsigiiri, mbu akurongoore.
Kiri na mu baana bo ukalera, ndaaye úwangakugwatira ku kuboko.
19 Ubuhanya bwa kabiri-kabiri, keera bukakugwata.
Ee! Ubuhanya bwa mbere, ukashereezibwa, wanaminikwa.
Noꞌbwa kabiri, wanalonga ishali, niꞌzibo.
Ndaanaye úkakuyuvwirwa indengeerwa, mbu ayiji kuholeeza.
20 Abaana baawe, Nahano Rurema keera akabarakarira, anabakanukira bukayu.
Buno, bakola ngoꞌtusa útwagwatwa mu mutego.
Bagweti bagaholera mu njira, banakoli gilambamiri mwo.
21 E Yerusaleemu, unyuvirizagye!
Ukola mu libuuka, unakoli lalusiri, kundu utazi nywa ikilalusa.
22 Nahano Rurema, ye mu bulanira abandu baage.
Anadetaga kwokuno: «Ikyanya nꞌgamùhana,
kwâli riiri nga rusoozo lwaꞌmaavu.
Mukalunywera kwo, mwanabambaajira.
Kundu kwokwo, yulwo rusoozo, ngakushaagiza lwo,
utanâye ki hanwe ku buraakari bwani.
23 Yulwo rusoozo, ngolaga ngaluheereza ngiisi ábagweti bagamùlibuza.
Si bâli kizi mùbwira:
“Gwejeraga buubi, gira tukutandale kwo!”
Wanabategaga umugongo, ibe nga njira yo bagafina-fina kwo.»