57
1 Abandu ábakwaniini imbere lya Rurema, ikyanya bali mu fwa,
abandu batakiri mu yitoneesa hiꞌgulu lyabo.
Ndaanaye úsobanukiirwi kwo bakafwa,
lyo batayiji libuuka.
2 Ee! Ikyanya abandu ba Rurema bali mu fwa,
lyo bali mu longa umutuula.
Ubuhanya imwa ábali mu yikumba imigisi
3 Si mwehe mulyagagi baana baꞌbalozi! Mukanabutwa naꞌbashule!
Aahago! Muyegeere hano.
4 Nyandagi ye muli mu honyoleza, mbu honyo!
Nyandi ye mugweti mugahondoolera?
Si mwehe muyamiragi muli banabibeesha,
munali mu hindulira Rurema ingoto!
5 Muli mu yegera mwiꞌdako lyeꞌbiti byeꞌmyalooni, na mwiꞌdako lyeꞌbindi biti byeꞌbihunda,
hanabe ho mugagendi yivyulira mwoꞌlulungumizi.
Muli mu yitira abaana biinyu mu nyaala, ku ngombe zeꞌnyiiji,
gira mubatange amatuulo imweꞌmigisi.
6 Munali mu gendi toola amabuye mabaaje mu ndekeera,
gira gabe go mugakizi yikumba.
Munagweti mugagayikumba, mu kugayonera kwaꞌmatuulo geꞌdivaayi,
iri munagatangira na geꞌmishyano.
Yago mabi gooshi, ka nangakizi mu yuvwira indengeerwa hiꞌgulu lyago? Aahabi!
7 Si muli mu kizi gira ubushule ku marango,
iri munatanga amatuulo imweꞌmigisi!
8 Munali mu mbindulira ingoto!
Munakoli bishiri imigisi ha nyuma lyeꞌmiryango.
Munali mu hogola imirondo, munashonere ku ngingo, gira musambane.
Munayamiri musiimiri abashule, iri munakizi baliha, lyo mubasambana.
Munali mu henekera ubukondwe bwabo!
9 Muli mu yidadabika amalaasi, kiri naꞌmavuta,
gira mugendi simiisa umuzimu Moleki.*57.9 Kandi iri: mwami.
Munali mu lungika abandu iyo munda neꞌyo munda, kiri neꞌnakwere,
mbu bagendi yiloogeza byoꞌkuyikumba.
10 Yibyo bitalaalwe byoshi, keera bikakushundeeza bweneene.
Kundu kwokwo, utali mu yaga, ti: «Muluho gwa busha, guno!»
Si ukiri mu yiheereza ikise,
mu kugenderera mu byebyo bitalaalwe.
11 Aahago! Mukoli yobohiri nyandi, halinde mukizi mbwira ikinyoma?
Kituma kiki mutakiri mu ndwaza, kandi iri ukungengeera?
Ngeeka mutakiri mu nzimbaha, bwo ngola kyanya ndi munyerere!
12 Yago mabi, kundu mugweti mugaatona kwo biri biija,
haliko ndaabyo gagamùyungula.
13 Aaho! Iyo migisi yinyu, ikyanya mugagitabaaza,
ikabaagage yo igamùtabaala!
Si iri mu yehuulwa neꞌmbuusi.
Kiri neꞌkyanya mugagifuuhira umuuka, gugagiyehuulira hala.
Si ngiisi ábali mu ba banyegamiiri,
boohe, bo bagahyana ikihugo, kuguma noꞌmugazi gwani mweru.
Rurema ali Munandengeerwa
14 Nahano adetaga kwokuno: «Muvwaruke, mulingaanie injira!
Mugishongaanie, halinde abandu baani balonge ukulyoka mu mahanga.»
15 Rurema ayamiri ho imyaka neꞌmyakuula!
Ali Mweruuka, anatuuziri mwiꞌgulu bweneene.
Anadetaga kwokuno:
«Nduuziri mwiꞌgulu bweneene, hanali hataluule.
Na kwakundi, nduuziri kuguma na ngiisi úli mutuudu,
anabe ayibiisiri haashi.
Ee! Yabo batuudu, bwo bali mu yibiika haashi,
kyo kitumiri ngabaheereza imisi mihyahya.
16 Ndagayama ndi mu mùlega, ndaganakizi mùrakarira.
Iri nangagiziri kwokwo, imitima yaꞌbandu yangakengeera yahola,
na ndi nie kababumba.
17 Íbitumiri nꞌgarakarira Abahisiraheeri,
bwo bâli kizi gungana, mu kuyilundira ifwaranga.
Kwokwo, nanabahaniiriza ku buraakari bwani,
nanabahindulira ingoto.
Kundu kwokwo, baki genderiiri ukukizi yifunda mu byebyo bitalaalwe.
18 Yago mabi go bâli kizi gira, keera nꞌgagabona.
Kundu kwokwo, ngabakiza, na ngizi barongoora.
Bwo bakola mu lira, ngakizi baholeeza,
19 halinde banakizi nyivuga.
«Ngiisi ábali hala, na ábali hoofi kwakundi,
yabo booshi, ngakizi baheereza umutuula nirizina, na mbakize.†57.19 Bahefeso 2.17. »
Kwokwo, kwo Nahano adesiri!
20 Haliko, banangora-mabi boohe, balyagagi nga kihuhuuta íkyatuza mu nyaaja.
Si bali mu birindula amiiji niꞌjolera, buzira kuluha.
21 Rurema wani adetaga kwokuno:
«Balya banangora-mabi, ndaagwo mutuula bâye longe!‡57.21 Hisaaya 48.22.»